ەرلان ءجۇنىس. ەنتەلەحيا (پوەتيكالىق ويلار)

بۋمەرانگ

قار لاقتىرىپ وينادىق وتكەنگە,

ءوتىپ جاتقان ۋاقىتقا:

كوكتەمدە –

اينا سىندى.

 

كورۇعلى

كۇيزەلەدى الەم

تامىپ تۇسە الماي

قالام ۇشىنان...

 

جالعىزدىق

ءبىرىن ءبىرى

ىزدەر بولسا ادامدار,

بىلەر ەدى – جوعالعانىن ءبارىنىڭ...

 

مۇرات

جالقى تاۋدىڭ ەتەگىندە,

تاڭدا تۋعان كوبەلەك

شىڭىندا ءولدى,

جۇلدىزدارعا ەسكەرتكىش بوپ قاناتى.

 

ۋاقىت

ءبىر توپ بالا ماعان قاراي جۇگىردى,

قۇلاعىما جەتتى ءۇنى,

ەكپىنى – شاشىمدى اعارتتى.

 

ورتاعاسىر

ادىراسپان ءتۇتىنى

سىعان قىزداي بيلەيدى,

جانارىندا سايفتىڭ.

 

ەستەلىك

بالا كۇنگى داۋىسىم,

جاڭعىرىپ تۇر – الىستاعى تاۋلاردا,

عارىشتاعى əن سىندى.

 

جانجال

اعاش ۇيدەگىلەر وت جاقتى.

قۇپتاندا كۇن شىقتى.

جاپىراقتى ءشول قىستى.

 

قۇلاعان كومەتا

وت بولىپ

لاۋلاپ كەپ,

زاۋلاپ كەپ,

قارا جەرگە زىرق ەتتى

اۋىر ءسوز.

 

ايقاي

جۇلدىزدار

شىتىناپ قيرادى,

سىنىعى

جۇرەكتى تىلگىلەپ.

 

جاڭبىرلى تۇنگى ءتۇس

ءبىر باتىپ,

ءبىر شىعىپ,

قالقىپ ءجۇر قارۋلار,

بالالاردىڭ كوز جاسىندا.

 

پيگماليون

ءوز جانىن اقىن حالىقتا ساقتايدى,

ال حالىق بولسا –

اقىندا.

 

جاھاندانۋ

اپپاق دالاما

كىرىپ كەلدى الەم,

اياعىن سۇرتپەستەن.

 

ىڭعايسىزدانۋ

نەتكەن جۇمساق تۋعان جەر تاستارى,

نەتكەن قاتتى ەدى الاقانىم.

 

ۋاقىت قىتىعى

قىش قۇمىرا ىشىنەن

جاڭعىرىپ ەستىلدى

گومەر كۇلكىسى.

 

تسۋنامي

ۇرىككەن شاعالا

تەڭىزدى ساپىردى,

جاعالاۋدى شايدى.

 

تۋربۋلەنتتىلىك

قۇس شەڭگەلىندە

ۇشادى قويان,

ۇشاقتا الما دومالاي...

 

تىرشىلىك

تاۋلار تۇندە كوشەدى,

بالاپانى ۇلاردىڭ

جۇمىرتقاسىن جارعانشا.

 

تازالىق

ەلىكتىڭ لاعى وينايدى بالاممەنەن.

بابام اڭعا شىقپادى ما

ۇل تاپقاندا الالى.

 

جوڭىشقا

ءƏربىر جازدا مىنا بەلەس جاپ-جاسىل,

وزگەرمەيدى.

بىراق جىلدا تانىمايدى مەنى ولار.

 

اربا دوڭعالاعى

ات جالىققان əۋەننەن

قيالىندا بالانىڭ

موتسارت تۋدى.

 

قىر

قىرعا كەتىپ, قاڭعىردىم.

مەن قالاعا بارا المايمىن,

بالا قازدىڭ قاتايعانشا قاناتى.

 

كوشپەندى

بۇل تاۋ بۇرىن قىز بولىپتى دەسەدى,

مەن دە بۇرىن قۇس بولعام,

قوندىم با ەكەم يىعىڭا؟..

 

جاڭا ءومىر

باق ىشىنەن ۇشىپ شىعىپ بالاپان,

شيق-شيق ەتىپ كەزىپ ءجۇردى اۋلانى

كوك المانىڭ يىسىندەي.

 

تاراز شيەسى

شيراز سۇلۋىنىڭ ەرنىندەي,

شام ويشىلىنىڭ ۇياتىنداي,

افينا شەشەنىنىڭ تىلىندەي.

 

دƏلەلدەۋ

ءزىلزالانىڭ

دəلەلدەۋى قاجەت پە,

ول ءزىلزالا ەكەنىن؟

 

ءتۇس Əلەتى

كوز شىرىمىن السامشى,

شۋلاي قونىپ ۇستىمە,

الما اعاشتىڭ گۇلدەرى.

 

مازاسىزدىق

ينەلىك نەگە كوزىن جۇمبايدى,

نەگە تىپ-تىنىش

مىنا ءتۇن؟..

 

شاراسىزدىق

جالاڭاش جارتاستا

قالعيدى بارقىن,

قارعا داۋسىنان قۇلاعى تۇنىپ.

 

سەبەپسىزدىك

قۇستارعا جەم بەردىم

قولىمنان,

قاناتىن العام جوق.

 

بƏيەك

جاپىراقتان تامشى تامىپ تۇسكەنشە

دۇنيەدە دەگبىرسىزدىك تۋىلىپ,

ماعان ءوتتى.

 

كوتەرىلىس

ولار ۇزاق جىلدار بويى قول سوزدى –

اينالعانشا نايزاعا ول...

 

الليۋزيا

بالاعا دوپ جەر سەكىلدى.

جەر دوپ سەكىلدى بالا ەمەسكە.

 

ەسكى عيمارات

تاريحتا كىرەتىن ەسىك بار,

شىعاتىنى جوق.

شام – شىركەيلەر مازارى, جارىققا ۇمتىلعان.

 

كونە قۇمىرا

ادام ەگەر ءبəرىن دە ۇمىتا السا –

بوسار ەدى دە, قيرار ەدى,

تىنىشتىقتىڭ اششى داۋسىنان.

 

وركەنيەت

ادام ءوزىن ىزدەپ ءجۇرىپ

ءبىر كۇنى

تاۋىپ الدى مايمىلدى.

 

پيراميدا

سəبي كۇنىن تۇسىرە الماي ەسىنە,

سۋرەتىنە قارايدى ولار تاڭدانىپ.

 

جينالىس

كۇن استىندا كوپ ادام,

مەن ءبىر ماڭدا تىنشيمىن,

قۇس قاناتى كولەڭكەسىن تۇسىرگەن.

 

بالبال

ەكى قازاق سويلەسىپ تۇر دالادا,

قاراي قالسام,

تاس بوپ قاتا قالادى.

 

بۇزىلعان ءۇي

مىنا كىلت,

ەندى ەشبىر ەسىكتى اشپايدى.

 

قالاۋ

تاۋعا شىعىپ ايقاي سالعىم كەلدى دە,

ورمەلەدىم,

شىڭىندا –

سىبىرلاسىپ وتىر ەكەن ەكى ادام.

 

سيزيف

تاستىڭ

جانى,

ەركى,

ءمəنى,

سەرتى,

ىرقى,

قالاۋىنا – قارسىلىق!

 

گورگونا مەدۋزا

ەسكەرتكىشتەر –

ءوزى وزىنە تىكە قاراي العاندار.

 

جوعالعان ۇرپاق

قار جاۋىپ,

باسىلدى.

ەڭ سوڭعى اق ۇلپا

قايسىسى ەكەنىن ەشكىم دە بىلمەدى.

 

پىكىر

جايىن ءوزىن جاعالاۋعا لاقتىردى,

مۇحيت ونى سەزگەن جوق.

 

ءومىر اعاشى

جەلگە ىلەسىپ كەتتى جالعىز جاپىراق,

ەندى əلەم وزگەردى,

مۇلدە وزگەردى.

 

پايدالىلىق

جاپان تۇزدە جاتقان تاستى كوتەرمە.

 

پوليگون

دالا تولقىپ جاتىر تۇنىق تەڭىزدەي,

كورىنەدى اعارىپ

بابالاردىڭ سۇيەگى.

 

ا باو ا كۋ

ادام بالاسى ەسەيگەن سايىن,

ارماندارى

نەگە ۇسقىنسىز؟

 

دوريان گرەي

وزىنە الىپ ادام كۇناسىن,

سوزدەر ولەدى,

بەيۋاق.

 

كۇتۋ

جولعا قاراپ تۇردى جار.

جاپىراقتىڭ بوياۋى

اعىپ جاتتى كوزىنەن.

 

وكپەلەۋ

حات جازدى دا جىرتتى ونى.

كەيدە ادامعا جازۋ كەرەك جاي عانا,

تەڭىز تۇندە شۋلاعانداي.

 

قىزعانۋ

ساعان قاراپ تۇرعانداردى كورگەنشە,

اڭعارماپپىن,

كەتكەنىڭدى قۇلپىرىپ.

 

كوكتەم

قوڭىراۋ شالدى بەلگىسىز ءنومىر

ۇزدىكسىز,

ۇزدىكسىز جاۋدى جاڭبىر دا.

 

ديحوتوميا

مەن ساعان بارۋ ءۇشىن گۇل الامىن,

ال گۇلدى الۋ ءۇشىن ساعان بارام.

 

Əسەر

سۇلۋلار كەتەدى,

ولەڭدەر قالادى

الماتىدا.

 

داۋىل

سول تۇنگى نوسەردە

جاۋماعان جالعىز بۇلت -

شىندىقتىڭ بۇلتى ەدى.

 

ەرلان ءجۇنىس