بۇعان دەيىن دە ۇلكەندى-كىشىلى ساياسي وقيعالار قىرعىز ەلىندە قار كەتىپ, اۋا رايى جىلىنا باستاعاندا كورىنىس بەرگەنى بەلگىلى. بيىلعى كوكتەمدە دە سولاي بولدى... تاراتىپ ايتساق, بۇعان دەيىن ەل پارلامەنتىندەگى وپپوزيتسيالىق ءۇش فراكتسيا – «رەسپۋبليكا-اتا جۇرت», «اتا مەكەن» جانە «ونۋگۋ-پروگرەسس» پارتيالارىنىڭ دەپۋتاتتارى پرەمەر-مينيستر ساپار يساكوۆ ۇكىمەتىنىڭ 2017 جىلدى قورىتىندىلاعان ەسەبىنە قاناعاتتانبايتىندارىن مالىمدەگەن ەدى. ال وسىنىڭ الدىندا عانا پارلامەنتتە كوپشىلىك مانداتقا يە سوتسيال-دەموكراتيالىق پارتياسى مەن «قىرعىزستان» فراكتسياسىنىڭ دەپۋتاتتارى ۇكىمەتتىڭ وتكەن جىلدىڭ قورىتىندىسى تۋرالى وسى ەسەبىن قاناعاتتانارلىق دەپ باعالاعان-دى.
وتستاۆكاعا كەتكەن س.يساكوۆتىڭ ۇكىمەتى 2017 جىلدىڭ 26 تامىزىندا عانا قىزمەتتەرىنە كىرىسكەن بولاتىن. ەكس-پرەمەر ۇكىمەت قۇرامىن پارلامەنتتەگى كوپشىلىك كواليتسياسىنا كىرەتىن سوتسيال-دەموكراتيالىق پارتياسىنان, «بير بول» جانە «قىرعىزستان» فراكتسيالارىنان جاساقتاعان ەدى. ايتا كەتەيىك, س.يساكوۆقا دەيىن قىرعىزستان ۇكىمەتىنە قازىرگى پرەزيدەنت س.جەەنبەكوۆ باسشىلىق ەتكەن-ءدى.
ەل ۇكىمەتىنە سەنىمسىزدىك ءبىلدىرۋ ماسەلەسىن پارلامەنت وتىرىسىنىڭ كۇن تارتىبىنە «رەسپۋبليكا-اتا جۇرت» فراكتسياسىنىڭ جەتەكشىسى جىرگالبەك تۋرۋسكۋلوۆ شىعارعان. قىرعىزستاندىق بۇقارالىق اقپارات قۇرالدارىنىڭ حابارلاۋىنشا, اتالعان ماسەلەنى الدىمەن جوگوركۋ كەنەشتىڭ كونستيتۋتسيالىق زاڭناما, مەملەكەتتىك قۇرىلىم, سوت-قۇقىقتىق ماسەلەلەر جانە رەگلامەنت جونىندەگى كوميتەتى پارلامەنتتە ازشىلىقتى قۇرايتىن وپپوزيتسيالىق فراكتسيالاردىڭ ۇكىمەتكە سەنىمسىزدىك ءبىلدىرۋ تۋرالى ماسەلەنى تالقىلاۋعا شىعارۋىن قولداعان. بۇل ماسەلەنى, سونداي-اق سالالىق كوميتەتتەر دە, دەپۋتاتتار دا قاراعان ەكەن.
ال وتىرىستا داۋىس بەرۋگە قاتىسقان 106 دەپۋتاتتىڭ 101-ءى ۇكىمەتكە سەنىمسىزدىك ءبىلدىرۋدى قولداپ داۋىس بەرىپتى. بەس دەپۋتات بۇعان قارسى بولعان. ءسويتىپ ەل سەنىمىنەن شىعا الماعان س.يساكوۆتىڭ ۇكىمەتى سەگىز ايدان سوڭ وتستاۆكاعا كەتتى. ءاسىلى قىرعىزستان كونستيتۋتسياسىنىڭ 85-بابى بويىنشا جوگوركۋ كەنەش دەپۋتاتتاردىڭ ۇشتەن ءبىرىنىڭ باستاماسىمەن ۇكىمەتكە سەنىمسىزدىك ءبىلدىرۋ ماسەلەسىن قاراي الادى. سەنىمسىزدىك ءبىلدىرۋ تۋرالى قاۋلى جالپى دەپۋتاتتار سانىنىڭ جارتىسىنان كوبى داۋىس بەرگەن جاعدايدا قابىلدانادى. وسى تۇستا اتاپ وتەيىك, ۇكىمەتكە سەنىمسىزدىك بىلدىرگەن سوڭ پرەزيدەنت ۇكىمەتتى وتستاۆكاعا جىبەرۋگە نەمەسە پارلامەنت شەشىمىمەن كەلىسپەۋگە قۇقىعى بار.
قىرعىزستان پرەزيدەنتى سوورونباي جەەنبەكوۆ پارلامەنتتىڭ شەشىمىمەن كەلىستى, ۇكىمەتتى وتستاۆكاعا جىبەردى. پرەزيدەنتتىڭ ۇكىمەتتى قۇرۋدى كىمگە تاپسىرعانى جونىندە قازىرگە اقپارات جوق. بولاشاق پرەمەر-ءمينيستردىڭ اتى-ءجونى كوپ كەشىكپەي بەلگىلى بولىپ قالار.
ءاليسۇلتان قۇلانباي,
«ەگەمەن قازاقستان»
