باتىس قازاقستان وبلىستىق حالىق شىعارماشىلىعى ورتالىعى ۇيىمداستىرعان شاراعا استانا, الماتى قالالارىنان, پاۆلودار, قىزىلوردا, وڭتۇستىك قازاقستان, ماڭعىستاۋ, اتىراۋ, اقتوبە, باتىس قازاقستان وبلىستارىنان 18 ۇمىتكەر قاتىستى. قازاقستان رەسپۋبليكاسىنىڭ مادەنيەت قايراتكەرى, قۇرمانعازى وركەسترىنىڭ مۇشەسى ماقسات تىلەپبەرگەن, قالامقاس وراشەۆانىڭ كەنجە قىزى اقمارال سارسەنعاليەۆا, باسقا دا تۋىستارى ارنايى كەلدى.
بۇل بايقاۋ – ومىردەن 35 جاسىندا قىرشىن كەتكەن ونەر يەسىنىڭ 50 جىلدىق مەرەيتويىن اتاپ وتكەن 2003 جىلدان باستاپ اراعا بەس جىل سالىپ ءوتىپ كەلەدى. وعان 18-35 اراسىنداعى ءانشى-تەرمەشى قىز-كەلىنشەكتەر, بۇرىن-سوڭدى باس جۇلدە الماعان ونەرپازدار قاتىسادى. ەكى بولىمنەن تۇراتىن سايىستا ولار تەرمە-تولعاۋلار مەن ۇزاق داستانداردى ورىندايدى. باستى ماقسات – كورىنبەي جۇرگەن تالانتتاردىڭ جۇلدىزىن جاعۋ, ءداستۇرلى جىرشىلىق ونەردى دامىتۋ.
- قازىلار القاسىنا حالىقتىڭ وكپەسى بولماعان سياقتى. سايىس باستالار كەزدە-اق حالىققا ايتتىم: تورەلىك ەتۋشى – قازاقستان رەسپۋبليكاسىنىڭ ەڭبەك سىڭىرگەن ءارتىسى ساۋلە تاۋداەۆا, قازاقستان رەسپۋبليكاسىنىڭ مادەنيەت قايراتكەرى, ءانشى-تەرمەشى, الماتىدان ارنايى كەلگەن ءبيبىجار ماحانبەتوۆا, كەش يەسىنىڭ تۋعان ءسىڭلىسى, قازاقستان رەسپۋبليكاسى مادەنيەت سالاسىنىڭ ۇزدىگى مەيرامگۇل وراش, قازاقستان رەسپۋبليكاسى مادەنيەت سالاسىنىڭ ۇزدىگى, جىرشى-تەرمەشى ارمات يسلامعاليەۆ – بۇلاردىڭ ءبارى دە عاريفوللانىڭ ءتول شاكىرتتەرى, باتىس ءان ءداستۇرىن جالعاستىرۋشى مىقتى ونەرپازدار عوي. ورالدان وقىپ, ورىستان ساباق العان ەڭ وسالى مەن بولدىم, - دەيدى قازىلار القاسىنىڭ توراعاسى قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, قازاقستان رەسپۋبليكاسى مادەنيەت سالاسىنىڭ ەڭبەك سىڭىرگەن قايراتكەرى, ءانشى-تەرمەشى قاتيموللا بەردىعاليەۆ.
قازىلار شىنىمەن دە ءادىل تورەلىك ەتكەن. القا توراعاسى قاتيموللا بەردىعاليەۆتىڭ ايتۋىنشا, بۇدان بۇرىن وتكەن بايقاۋدا ورىنداعان شىعارماسىن سول كۇيىندە قايتا بايگەگە سالماق بولعان ونەرپازدار بىردەن سايىستان شەتتەتىلگەن. «ونەرگە ولاي ءجۇردىم-باردىم قاراۋعا بولمايدى عوي» دەيدى ءانشى.
سونىمەن, بايقاۋدىڭ باس جۇلدەسى – 500 مىڭ تەڭگە ورال قالاسىنداعى قۇرمانعازى اتىنداعى ساز كوللەدجىنىڭ ءىىى كۋرسىندا وقىپ جۇرگەن ستۋدەنت ءامينا عاينەدەنوۆاعا بۇيىردى. ءبىرىنشى ورىن – قىزىلوردالىق ءزۇلفيا بايمۇرزيەۆاعا, ەىنشى جۇلدە – ماڭعىستاۋ وبلىسى, جاڭاوزەن قالاسىنان قاتىسقان جانار نۇرمۇحانوۆاعا, ءۇشىنشى ورىن – ورالدىق اقمارال كەمەلحانوۆاعا ءتيدى.
بۇدان بولەك بايقاۋدا باتىسقازاقستاندىق تانىمال جىرشى-تەرمەشىلەر اتىندا ارنايى جۇلدەلەر دە تاعايىندالعان ەكەن. جاقسىلىق سارسەنعاليەۆ اتىنداعى جۇلدە – ماڭعىستاۋلىق دامەگۇل ىزباساروۆاعا, قالامپىر راحيموۆا اتىنداعى جۇلدە – الماتىلىق جانارگۇل ساركەنوۆاعا, امانگەلدى عۇبايدۋللين اتىنداعى جۇلدە – اتىراۋلىق جاس تەرمەشى ارۋجان ەرىموۆاعا, كوشەرعالي ماكاروۆ اتىنداعى جۇلدە – استانا قالاسىنىڭ اتىنان شىققان زينات قاسىموۆاعا بۇيىردى.
- الماتىدا عارەكەڭنىڭ ستۋدياسىن ۇستاپ وتىرعان جانارگۇل ساركەنوۆادان كوپ ءۇمىت كۇتكەن ەدىم. دايىندىعى ناشارلاۋ بولدى. استانادان كەلگەن زينات قىزىمىز بۇرىن-سوڭدى جىرلانباعان «بايباراق باتىر» داستانىن تۇڭعىش تارتۋ ەتتى. ءسويتىپ, ارنايى جۇلدەدەن بولەك, «بايباراق باتىر» قورىنىڭ سىيلىعىنا يە بولدى. ال ەندى باس جۇلدە العان ءامينا عاينەدەنوۆا – جانىپ تۇرعان قىز ەكەن. وسى وتتى ءوشىرىپ الماسا, ءتۇبى تانىمال ونەرپاز بولادى, - دەيدى قاتيموللا بەردىعاليەۆ.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
سۋرەتتەردى تۇسىرگەن نۇربەك يحسان
