بۇدان بولەك, ەلدە يندۋستريالاندىرۋ ۇدەرىستەرىنە قاتىستى دا اتقارىلعان جۇمىستار از ەمەس. وسى ورايدا قازاقستاننىڭ ءۇشىنشى جاڭعىرتىلۋى باستالعانىن, يندۋستريالاندىرۋ باعدارلاماسى ىسكە اسىرىلىپ جاتقانىن, «تسيفرلى قازاقستان» باعدارلاماسى قولعا الىنعانىن, «قازاقستان-2025» ستراتەگيالىق جوسپارى ازىرلەنگەنىن ايتۋعا بولادى. قازاقستاندا تەحنولوگيالىق رەۆوليۋتسيانىڭ, تەحنولوگيالىق جەتىستىكتەردىڭ مۇمكىندىكتەرىن پايدالانا وتىرىپ, ەكونوميكالىق دامۋ دەڭگەيىن ارتتىرۋعا كەڭىنەن جول اشىلىپ وتىر.
قازاقستان پرەزيدەنتى ن.نازارباەۆ بيىلعى جولداۋىندا ەلدىڭ قوعامدىق-ەكونوميكالىق دامۋىنىڭ نەگىزگى مىندەتتەرىن ناقتىلاپ بەردى. مەملەكەت باسشىسى بۇل جولداۋىندا قازاقستاننىڭ جاڭا تەحنولوگيالاردى, اسىرەسە تسيفرلى تەحنولوگيالاردى پايدالانۋ, ونەركاسىپ, اۋىل شارۋاشىلىعى, لوگيستيكا, قارجى, ەڭبەك جانە قۇرىلىس سالالارىن دامىتۋ دەڭگەيىن جاقسارتۋ ماسەلەلەرىنە كەڭىرەك توقتالۋى كوپتىڭ كوڭىلىنەن شىقتى دەپ ويلايمىز.
بۇعان قوسا, پرەزيدەنت الەۋمەتتىك مەنەدجمەنتتىڭ دەڭگەيىن كوتەرۋگە, سىبايلاس جەمقورلىققا قارسى كۇرەسۋگە جانە زاڭ ۇستەمدىگىن نىعايتۋعا مۇمكىندىك بەرەتىن الدىڭعى قاتارلى تەحنولوگيالاردى پايدالانۋ قازاقستاندى دامىتا تۇسەتىنىن, ءتيىمدى باسقارۋدى جانە ەكونوميكالىق دامۋدىڭ جىلدامدىعىن ارتتىرۋعا جول اشاتىنىن اتاپ ءوتتى.
قازاقستان پرەزيدەنتى نۇرسۇلتان نازارباەۆ الەمدىك ەكونوميكانى دامىتۋدىڭ قازاقستاندىق باعدارلاماسىن تانىستىردى. قازىرگى ۋاقىتتا الەمدىك ەكونوميكا ءالى دە قالپىنا كەلۋدە, ال مەملەكەتتەر ەكونوميكالىق دامۋدىڭ جاڭا جولدارىن زەرتتەپ جاتىر. وسىعان بايلانىستى حالىق شارۋاشىلىعىن دامىتۋدى ىنتالاندىرۋ جانە الەۋمەتتىك مەنەدجمەنتتىڭ دەڭگەيىن كوتەرۋ ءۇشىن تسيفرلى ەكونوميكا مەن ءتورتىنشى يندۋستريالىق رەۆوليۋتسيانىڭ تەحنولوگيالىق قۇرىلىمىن دۇرىس قولدانۋ اسا ماڭىزدى. بۇل ماسەلە بارلىق ەلدەردىڭ الدىندا كۇن تارتىبىندە تۇر.
وسى تۇرعىدان كەلگەندە, پرەزيدەنت ن.نازارباەۆتىڭ قازاقستان حالقىنا ارناعان جولداۋى ەلدى دامىتۋدىڭ تاماشا ءارى تولىققاندى جوسپارى بولىپ تابىلادى.
ءبىز ن.نازارباەۆتىڭ باسشىلىعىمەن قازاقستان بۇدان دا ۇلكەن جەتىستىكتەرگە جەتەتىنىنە سەنەمىز. ەلدىڭ ايماقتىق جانە حالىقارالىق ىستەرگە ىقپالى كۇشەيە تۇسەدى جانە حالىقارالىق مارتەبەسى جوعارى بولادى.
ليۋ حۋچين,
قحر ساۋدا مينيسترلىگى جانىنداعى
حالىقارالىق ساۋدا جانە ەكونوميكالىق ىنتىماقتاستىق اكادەمياسىنىڭ اعا عىلىمي قىزمەتكەرى
قازاقستانداعى الەۋمەتتىڭ الەۋەتىن ارتتىرۋعا باعىتتالعان قۇجات – «پرەزيدەنتتىڭ بەس الەۋمەتتىك باستاماسىندا» ۇلتتىق تۇتاستىقتى نىعايتۋعا, الەۋمەتتىك سالانى بەكەمدەۋگە ەرەكشە كوڭىل بولىنگەندىگىن اتاپ وتكىم كەلەدى. ماسەلەن, باسپانا قولجەتىمدى بولسا, جاستار گرانت ارقىلى تەگىن ءبىلىم السا, ول مەملەكەتتىڭ بولاشاعى باياندى بولماق.
بۇل – جاھاندانۋ زامانىندا ۇرپاقتىڭ نانوتەحنولوگيانى الاڭسىز يگەرىپ, ۋايىمسىز وسۋىنە باعىتتالعان نەگىزگى جوبا. الەۋمەتتىك سالاعا باعىتتالعان ءتۇرلى باعدارلامالاردى جۇرت بولىپ جۇزەگە اسىرعاندا عانا, ۇلى ماقساتتارعا جەتۋگە بولادى. سول سەبەپتى بۇل بارلىق الەۋمەتتىك باستامالار وتە ماڭىزدى. مىسالى, حالىقتى باسپانامەن قامتۋ, كوگىلدىر وتىن جەتكىزۋ, سالىق تولەمدەرىن مەيلىنشە ازايتۋ كوپشىلىكتىڭ الەۋمەتتىك جاعدايىنىڭ جاقسارۋىنا اسەر ەتەدى. شاعىن نەسيەلىك يننوۆاتسيالىق جوبالار مەن «7 – 20 – 25» باعدارلاماسى دا بۇگىنگى نارىقتىق ەكونوميكادا الەۋمەتتىك باعىتتىڭ دامۋىنا نەگىز بولادى.
راۆشان نازاروۆ,
وزبەكستان رەسپۋبليكاسى عىلىم اكادەمياسى تاريح ينستيتۋتىنىڭ
«زاماناۋي تاريح جانە حالىقارالىق زەرتتەۋلەر» ءبولىمى مەڭگەرۋشىسىنىڭ ورىنباسارى
