جالپى, جاريا بولعان ۇسىنىستاردا ناقتىلانعان 5 باعىتتىڭ جۇزەگە اسۋىنا نەگىز بولاتىن جۇمىستار جەتىسۋدا جوق ەمەس, بار. ءبىز بۇل جولعى سوزىمىزگە ەلباسى باستاماسىندا كورسەتىلگەن تۇرعىن ۇيگە قولجەتىمدىلىكتى ارتتىرۋ مەن تابىسى از جۇمىسشىلاردىڭ سالىعىن قايتا ەسەپتەۋ جانە ءبىلىم سالاسىنا قاتىستى جۇكتەمە جايىن ارقاۋ ەتپەكپىز.
– مەملەكەت باسشىسى الەۋمەتتىك سالانى جاڭعىرتۋعا باعىتتالعان 5 باستاماسىن ۇسىنۋ ارقىلى ەلىمىز ءۇشىن وزەكتى, الەۋمەتتىك سالاعا جاڭا سەرپىن بەرەتىن شارالاردى ىسكە اسىرۋدى مىندەتتەدى. بۇل كوپتەن كۇتكەن, ءبارىمىزدىڭ ويىمىزدان شىققان باستاما بولدى. پرەزيدەنتىمىز ونى ىسكە اسىرۋ ءۇشىن ەل ەكونوميكاسىنىڭ تولىق مۇمكىندىگى بار ەكەنىن اتاپ ءوتتى. ەندى سول باستامالارعا ناقتى توقتالىپ, اتقاراتىن جۇمىستارىمىزدىڭ نەگىزگى باعىت-باعدارىنا اينالىپ وتىر, – دەيدى اماندىق باتالوۆ.
مىسالعا, تۇرعىن ءۇيدى پايدالانۋعا بەرۋ جونىنەن وبلىس رەسپۋبليكا بويىنشا الدىڭعى ورىندا. وتكەن جىلى باسپانا سالۋ بويىنشا جوسپار 5,7 پايىزعا ارتىعىمەن ورىندالدى. اۋماعى 646 مىڭ شارشى مەتردى قامتيتىن تۇرعىن ءۇي كەزەك كۇتكەن ادامدارعا بەرىلدى. ياعني قارقىنمەن سالىنىپ جاتقان 184 ءۇيدىڭ 94 ۇيىندە قونىس تويى تويلاندى. قۇرىلىس جۇمىستارى بارىسىندا 494 شاقىرىمدى قۇرايتىن ينجەنەرلىك جەلى ىسكە قوسىلعان.
– وبلىستا قۇرىلىس قارقىندى جۇرگىزىلگەنىمەن, ءۇي باعاسىنىڭ تۇرعىندارعا قولجەتىمدى بولۋى قيىندىق كەلتىرىپ وتىر. ادامداردىڭ يپوتەكا مەن نەسيەگە قول جەتكىزۋى وڭاي بولمادى. ەندى ەلباسى ۇسىنعان «7 – 20 – 25» باعدارلاماسى ارقاسىندا جەرلەستەرىمىزدىڭ باسپانالى بولۋىنا جاعداي جاسالادى, – دەيدى ءوڭىر باسشىسى.
بۇل ماقساتتا وبلىستاعى تۇرعىن ءۇي قۇرىلىسىنىڭ كولەمىن 1 ملن شارشى مەترگە دەيىن ارتتىرۋ كوزدەلىپ وتىر. قازىر ايماقتاعى باسپاناعا ءزارۋ ادامداردىڭ سانى 40 مىڭنىڭ ۇستىندە ەكەن. ال دايىن ءۇي سانىنىڭ كوبەيۋى مەن باعانىڭ قولجەتىمدىلىگى باسپاناعا مۇقتاجدىقتى ازايتارى ءسوزسىز.
وسى جەردەن ەكىنشى ماسەلەنىڭ شەتى شىعادى. ياعني تۇرعىنداردىڭ تابىسى مەن تولەم قابىلەتىنىڭ اراجىگىن انىقتاۋعا قاتىستى جۇمىستارعا ءجىتى قاراۋعا تۋرا كەلەدى. ويتكەنى الماتى وبلىسى اگرارلىق ايماق بولعاندىقتان, نەگىزىنەن اۋىل شارۋاشىلىعىندا ەڭبەك ەتەتىن ادامداردىڭ تابىسى دا جوعارى ەمەس. ءوزىن-ءوزى جۇمىسپەن قامتيتىن ادامداردىڭ ۇلكەن توبى جانە بار. دەمەك جالاقىسى تومەن توپتىڭ قاراسى قالىڭ. تابىس سالىعىن 1 پايىزعا دەيىن ازايتۋ باستاماسى جەتىسۋلىقتاردىڭ بۇل ماسەلەسىن شەشەتىنى انىق. ەسەپ بويىنشا 2 مىڭعا جۋىق جالدامالى جۇمىس كۇشىنىڭ جالاقىسى قايتا قاراۋعا جاتادى ەكەن.
ال ءبىلىم الۋعا بولىنەتىن گرانت سانىنىڭ كوبەيۋى وقۋعا ىنتالى جاستاردىڭ قاتارىن دا قازىرگىدەن دە كوبەيتەتىنى انىق. جىل سايىن وبلىس اكىمدىگى الەۋمەتتىك كومەك كورسەتۋ جولىمەن جۇزدەگەن جاستارعا جەرگىلىكتى بيۋدجەت ەسەبىنەن ءبىلىم بەرۋ گرانتىن تاعايىندايدى. ماسەلەن, بىلتىرعى وقۋ جىلىندا 83 تۇلەك ءتۇرلى ماماندىقتار بويىنشا وسى «اكىم گرانتىن» جەڭىپ العان ەكەن. قازىر ايماقتاعى جالعىز جوعارى وقۋ ورنى – جەتىسۋ مەملەكەتتىك ۋنيۆەرسيتەتىنىڭ كۇندىزگى بولىمىندە 3 مىڭنان استام ستۋدەنت وقىپ جاتىر. ارينە بۇل جەردە ازداعان ماسەلە بار. ستۋدەنتتەردىڭ جاتاقحانامەن قامتاماسىز ەتىلۋى ءماز ەمەس. ۋنيۆەرسيتەتتىڭ 2 جاتاقحانا كورپۋسى بار, ولار تەك 500 ادامدى قابىلداي الادى. مۇنىڭ سىرتىندا تالدىقورعان, تالعار قالالارىنداعى كاسىپتىك ءبىلىم بەرەتىن ارناۋلى وقۋ ورىندارىنىڭ ستۋدەنتتەرى دە جاتاقحانا تاپشىلىعىن سەزىنۋدە. جاقىندا جەتىسۋ ۋنيۆەرسيتەتىنىڭ ستۋدەنتتەرى ءۇشىن تاعى دا 500 ورىندىق جاڭا كامپۋس سالۋعا قارجى ءبولىنىپ, ارنايى جەر ءبولىندى.
– ستۋدەنتتەردى جاتىن ورىنمەن قامتۋ دەگەنىمىز ۋنيۆەرسيتەتكە عانا قاتىستى بولماۋى كەرەك. اۋداندارداعى كاسىپتىك ءبىلىم بەرەتىن ارناۋلى وقۋ ورىندارىنىڭ جاعدايى ايتارلىقتاي ەمەس. تالعارداعى, تالدىقورعانداعى كوللەدجدەردىڭ ستۋدەنتتەرى جاتاقحاناعا سىيماي, پاتەر جالداۋعا ءماجبۇر. ەلباسى ۇسىنعان باستاما وسى كەمشىلىكتەردى جويۋعا مۇمكىندىك بەرەدى, – دەگەن ەدى بۇل تۋرالى ايماق باسشىسى ا.باتالوۆ.
دەمەك وبلىس اكىمىنىڭ الەۋمەتتىك باستامالاردى جۇزەگە اسىرۋ بويىنشا اتقاراتىن ءىسى شاشەتەكتەن. الەۋمەت الدىنداعى جاۋاپكەرشىلىك اكىمدەردىڭ جۇمىسىنا سەرپىلىس اكەلىپ قانا قويماي, ەلباسى باستاماسىن جۇزەگە اسىرۋ جولىندا سەرگەك بولۋدى ەسكەرتەدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
