تۇرعىلىقتى جەرىڭە بولىنگەن ەمدەۋشى دارىگەرىڭ بولماي قالسا ءبىر-بىرىنە سىلتەيدى. قازىر شاعىن وتباسىلىق ەمحانالار شىقتى. ەمحانالاردىڭ كوبىندە ۋچاسكەلىك دارىگەردەن وزگە سالالىق ماماندار, قۇرال-جابدىقتار كەمشىن ەكەنىن نەسىن جاسىرامىز. الدىمەن انا جەردەن, مىنا جەردەن الاسىڭ دەپ, وكىرتىپ ءدارى جازىپ بەرەدى. ءاناليزدى وتكىزسەڭ – ول دا باسقا جاقتا تەكسەرىلەدى. اپپاراتقا ءتۇسۋ كەرەك بولسا, قولىڭا ءبىر جاپىراق قاعاز ۇستاتىپ, تۇگەن ەمحاناعا بار دەيدى. سوندا باراسىڭ, قايتىپ كەلەسىڭ.
جاقىندا جاقىنىمىزدىڭ قان قىسىمى كوتەرىلىپ, وتباسىلىق دارىگەرلىك امبۋلاتورياسىنا (جشس) باردىق. ۋچاسكەلىك دارىگەر تەكسەردى. سالالىق مامان قاجەت بولىپ, كەلىسىم بار وزگە ەمحانالارمەن سويلەستى. استاناداعى №6 كوپسالالى ەمحانا كارديولوگىنا بارىپ تەكسەرىلۋ ءۇشىن قولىمىزعا جولداما ۇستاتتى. ەڭسەلى عيماراتتىڭ تابالدىرىعىن اتتاپ كارديولوگ دارىگەردىڭ بولمەسىنە بارساق, مەدبيكە جۇمىس ۋاقىتى اياقتالىپ, كەتىپ قالعانىن ايتتى. جشس-داعىلار تىركەۋ بولىمىنە حابارلاسقاندا, جۇمىس ىستەپ جاتقانىن ايتقان ەدى. «بۇل قالاي؟» دەگەنىمىزدە, مەدبيكە ونى تىركەۋ بولىمىنەن ءبىلۋدى ەسكە سالدى. ونداعىلار كەستەگە قاراپ كارديولوگ دارىگەر 16.30-عا دەيىن جۇمىس ىستەيتىنىن العا تارتتى. وسى ارالىقتا جشس-عا حابارلاسقانىمىزدا, ولار دا وسىنى قۋاتتادى. كەيىن تىركەۋ بولىمىندەگى قىز دارىگەردىڭ 15.00-گە دەيىن ىستەيتىنىن تىلگە تيەك ەتىپ, العاشقى سوزىنەن جالتارىپ شىعا كەلدى. «سوندا كىمگە سەنەمىز؟» دەيمىز. «نەمەنە, شۋ شىعارايىن دەپ تۇرسىزدار ما؟» دەپ قويىپ قالدى. قولداعى جولدامانى بايقاعان سوڭ, «مۇنداي قاعازبەن قابىلداۋ ماسەلەسىن دارىگەردىڭ ءوزى شەشەدى» دەدى.
جانى مەن ءتانى اۋىرعان ادام ەمحاناعا شۋ شىعارۋ ءۇشىن ەمەس, شيپا الۋ ءۇشىن كەلەتىنى بەلگىلى. نەسىن جاسىرامىز, سوڭعى كەزدە ەمحانالارداعى اق حالاتتىلاردىڭ كوپ جاعدايدا سەلقوستىق تانىتاتىنى ويلانتادى. ۋچاسكەلىك دارىگەر كارديولوگتىڭ قورىتىندىسىنسىز كەي دارىلەردى بەرە المايتىنىن ايتقان ەدى. وزگە كارديولوگتىڭ بار-جوعىن سۇراستىرساق, بولماي شىقتى. بار كارديولوگتىڭ ءوزى تالونمەن قابىلدايتىنىن ەستىگەن سوڭ, تالون بەرەدى دەگەن ەسىكتى قاعايىق.
ونداعى وتىرعان ازاماتشا ءيمانجۇزدى بولىپ شىقتى. ون كۇنسىز تالوننىڭ بولمايتىنىن ايتىپ, ءبىراز ماسەلەلەرمەن ءبولىستى. ايتالىق, جەكە امبۋلاتوريالارعا دا تالون بولىنەدى ەكەن. بىراق ونى دەر كەزىندە الۋ جاعى كەمشىن كورىنەدى. وسىدان سىرقاتتار زارداپ شەگەتىنىن جاسىرمادى. بۇل «رەفورمانىڭ» جۇرتتى سابىلتىپ قويعانىنا وكىنىش ءبىلدىردى. ەمحاناداعى ازاماتتاردى تۇراتىن جەرىندەگى جەكە امبۋلاتورياعا جىبەرۋدىڭ ارعى جاعىندا ۇلكەن ەمحانالارداعى كەزەكتى ازايتۋ تۇرعانىن دا بۇگىپ قالمادى. جشس-دان بۇرىن تىركەلگەن ىرگەلى ەمحاناعا قايتا ورالۋ جايىن قوزعاعانىمىزدا, ونىڭ دا تالابى بار ەكەنىن العا تارتتى.
جالپى, جەكە امبۋلاتوريالار قاجەت شىعار. بىراق مەكەمەنىڭ ءبارى سالالىق ماماندارمەن تولىق قامتاماسىز ەتىلمەي وتىرعانى راس. ونداي مامانعا قول جەتكىزگەنگە دەيىن سىرقات ادامنىڭ دەنساۋلىعى ناشارلاي بەرسە, ءتىپتى كەيىن ونىڭ اياعى زالالعا سوقتىرسا قالاي بولادى دەگەن كۇدىگىمىزگە اق حالاتتى ابزال جاندار «جەدەل جاردەم بار ەمەس پە؟» دەپ توتە جول كورسەتتى. سول ارقىلى جاتىپ ەم الۋعا بولادى ەكەن. كەيدە ولاردىڭ دا قاشقاقتايتىنى بار. بۇل «كونسەڭ وسى, كونبەسەڭ اقىلىعا بار دەگەندى» مەڭزەپ تۇر ما دەگەن ويعا باتاسىڭ. جانىڭا سىرقات باتقاندا دارىگەرلەرمەن ايتىس-تارتىسقا تۇسپەي قويمايسىڭ. سونداي كەزدە ولاردىڭ دا جۇيكەسى جۇقارعاندىقتان شىعار, قارسى ۋاجدەرىن ءبىلدىرىپ, ايلىقتارىنىڭ ازدىعىن ايتىپ, مۇڭدارىن شاعادى. وسى جەرگە كەلگەندە ولارمەن تىرەسە بەرۋدىڭ ءجونى جوق ەكەنىن ۇعاسىڭ.
قاي ەمحاناعا بارساڭ دا قاباعى ءتۇسىپ, بۇل نە سۇمدىق دەپ جۇرگەن ۇلكەن-كىشىنى, بالا ارقالاعان انانى كورەسىڭ. تەكسەرىلىپ, ەم الۋدى ءاردايىم ەسىنە سالىپ وتىراتىن ەمحاناعا تىركەلگەن شەندى مەن شەنەۋنىكتەر قاراپايىم جۇرت قارالاتىن, قاربالاسى كوپ ورىندارعا, الدىن الا ەسكەرتپەي, اياز بي سەكىلدى باس سۇقسا عوي, شىركىن. سوندا بىلايعى حالىقتىڭ حالىنەن حاباردار بولار ەدى. ءتىپتى جوعارىدان باستالعان رەفورمالاردىڭ «جەمىسى» وسى ما دەيتىنىنە يمانىمىز كامىل.
ءدارى دە قىمباتتاپ بارادى. رەسمي دەرەككە سۇيەنسەك, كەيبىر سوزىلمالى سىرقاتتار قولدانىپ جۇرگەن ءدارى 20 پايىزعا وسكەن. ءبىر اقيقات, دارىگە قاتىستى داۋدىڭ ارعى جاعىندا – ۋاقتىلى وتپەيتىن تەندەردىڭ جاتقانى دەر ەدىك. مۇنداي جۇيەسىزدىكتى دۇرىس جولعا قوياتىن ۋاقىت جەتتى. ەندى ەمحانا مەن اۋرۋحاناعا باس دارىگەرمەن قاتار, مەنەدجەر كەرەك دەگەن ماسەلە قوزعالۋ ۇستىندە. بۇل قۇپتاۋعا تۇرادى. الەمدىك ءۇردىس ەكەنى دە داۋ تۋعىزبايدى. بىراق وعان جەتكەنگە دەيىن حالىق دەنساۋلىعىن باقىلاۋداعى ورالىمسىزدىق, دايىندىقسىز تۇرعىنداردى جەكە امبۋلاتوريالارعا ىسىرا سالۋ ەرتەڭ وكىندىرىپ جۇرمەي مە؟ ءيا, جەكەشەلەندىرۋ كاپيتاليستىك قوعامنىڭ دامۋ زاڭى دەيىك. بىراق سول قوعامنىڭ تۇعىرى – حالىق ەكەنى اقيقات. ەندەشە بۇل سالاداعى ءسوز بەن ءىستىڭ الشاقتىعىن اشىق ايتىپ, حالىقتى سابىلتپاي ەمدەۋ ءىسىن ءبىر ارناعا سالاتىن كەز جەتكەن ءتارىزدى. الدە رەفورما رەتتەلگەنشە, حالىققا اۋىرماي جۇرە تۇرىڭدار دەيمىز بە؟ قالاي دەسەك تە, جانى اۋىرعان جاننىڭ جانىن تۇسىنگەنگە نە جەتسىن. ونى باسىنان وتكەندەر عانا ۇقسا كەرەك. وزگەلەر دە ءتۇسىنىپ, تۇيسىنسە, ۇرپاققا جاسالعان جاقسىلىق بولار ەدى.
سۇلەيمەن مامەت,
«ەگەمەن قازاقستان»
