تۇرعىن ءۇي قۇرىلىسىنا ۇلەستىك قاتىسۋ ماسەلەسى بويىنشا استانا قالاسى اكىمىنىڭ ءبىرىنشى ورىنباسارى سەرگەي حوروشۋن باياندادى.
«ۆاك-تىڭ سوڭعى وتىرىسىندا 26 نىسان قارالىپ, «ەلوردا قۇرىلىس كومپانياسى» جشس اتقارعان جۇمىستارى تۋرالى ەسەبى تىڭدالدى. بۇگىنگە دەيىن نىساننىڭ قارجى جانە تەحنيكالىق اۋديت جۇمىستارى جالعاسىپ جاتىر. تقك توراعاسىمەن بىرگە جەتكىلىكتى ەمەس قۇجاتتاردى جيناۋ جۇمىستارى جۇرگىزىلۋدە», - دەدى س. حوروشۋن.
سونداي-اق, ول «ابات» تك نىسانى جاڭا «ينتەل KZ» جشس ينۆەستورىمەن قۇرىلىس جۇمىستارىن بىرلەسىپ اياقتاۋ تۋرالى كەلىسىمگە قول قويىپ, قۇرىلىس جۇمىستارىن قايتا جاڭارتتى. «التىن بوساعا» تك پايدالانۋعا بەرىلدى. قازىر پروبلەماسى شەشىلمەگەن 51 نىسان بار.
قالانىڭ اعىمداعى تىنىس-تىرشىلىگى مەن تاسقىن سۋ كەزەڭى مەن نارىقتاعى جانار-جاعارمايدىڭ احۋالى تۋرالى قالا اكىمىنىڭ ورىنباسارى قوسمان ايتمۇحامەتوۆ باياندادى. ونىڭ ايتۋىنشا, وتكەن اپتادا جۇقپالى اۋرۋلار بويىنشا سانيتارلىق-ەپيدەميولوگيالىق احۋال تۇراقتى, جاعداي باقىلاۋ دەڭگەيىنەن اسىپ كەتپەگەن. تاسقىن سۋ احۋالى دا استانادا تۇراقتى. نارىقتا كومىر مەن جانار-جاعارماي كۇن سايىن مونيتورينگتەن وتكىزىلىپ, ۇنەمى باقىلاۋدا تۇرادى.
ءدارى-دارمەك پەن ونىڭ قورى تۋرالى جانە دە قازاقستان حالىقتارى بىرلىگى كۇنىن اتاپ ءوتۋدىڭ دايىندىعى جايىندا قالا اكىمىنىڭ ورىنباسارى ەرمەك امانشاەۆ ايتىپ بەردى.
وسى ارادا قالا اكىمى ءوزىنىڭ ورىنباسارلارىنا, اۋدان اكىمدىكتەرىنە كوكتەمگى مەرەكەلەردى تويلاۋ كەزىندە ورتكە قارسى جانە قوعامدىق قاۋىپسىزدىكتى, اباتتاندىرۋ, جاقىن ماڭايدىڭ ءبارىن سانيتارلىق تازالاۋدان وتكىزۋدى, سانيتارلىق نورمالاردىڭ ساقتالۋىن, جول قوزعالىسىن رەتتەۋدى جانە ت.ب. قامتاماسىز ەتۋدى تاپسىردى.
ال ءمجا جوباسىن ىسكە اسىرۋ, سمارت-سيتي, «سەرگەك» بەينەباقىلاۋ كامەراسىن قوسۋ جونىندەگى جۇمىستار, ازىق-ت ۇلىكتىڭ باعاسى تۋرالى قالا اكىمىنىڭ ورىنباسارى ماليكا بەكتۇروۆا مالىمدەدى.
استاناداعى كريمينوگەندى احۋال مەن قۇقىقتىق ءتارتىپتى قامتاماسىز ەتۋ بويىنشا قابىلدانعان شارالار جونىندە ءىىد باسشىسى مارات قوجاەۆ ايتىپ شىقتى.
ول بايانداماسىندا ازاماتتاردى تىركەۋ ماسەلەسىنە توقتالا كەتتى. ايتۋىنشا, استانالىق پوليتسەيلەر جالعا بەرىلەتىن باراكتاردى بەلسەندى تۇردە تەكسەرىپ, ءبىر اپتانىڭ ىشىندە 50 ءۇي يەسى مەن 167 ادامعا مەكەنجايعا تىركەلمەگەندىگى ءۇشىن ايىپپۇل سالدى. وسى باعىتتا جۇمىستار جالعاسىپ جاتىر دەدى ول.
وسى تۇستا استانا اكىمى زاڭ جولىمەن حوستەلدەردىڭ دە جۇمىسىن رەتتەۋدى تاپسىردى. وندا حوستەلدىڭ جۇمىسىن باقىلايتىن ناقتى نورماتيۆتىك قۇجاتتاردىڭ جوقتىعىن, كوبىنەسە وسىنداي عيماراتتاردىڭ كىشىگىرىم بولسىن قاۋىپسىزدىك نورمالارىن ساقتاي بەرمەيتىنىن ايتا كەتتى.
وسىعان بايلانىستى اەت يسەكەشەۆ مەمورگاندارعا حوستەلدەردىڭ جۇمىسىن رەتتەۋ ءۇشىن زاڭعا وزگەرىس ەنگىزۋدى زەرتتەۋىن تاپسىردى. ول كوپپاتەرلى تۇرعىن ۇيلەردەن حوستەل اشۋ ءۇشىن تۇرعىنداردىڭ كەلىسىمى كەرەكتىگىن ايتتى.
قالاداعى قوعامدىق كولىكتىڭ جۇمىسى تۋرالى «استانا LRT» باسقارماسىنىڭ توراعاسى بەكمىرزا يگەنبەردينوۆ ايتتى.
اباتتاندىرۋ ماسەلەسى بويىنشا الماتى, بايقوڭىر, ەسىل, سارىارقا اۋداندارى باسشىلارىنىڭ باياندامالارى تىڭدالدى.
قالاداعى ساۋدا ويىن-ساۋىق ورتالىقتارىن تەكسەرۋ جۇمىستارى بويىنشا جانە باسقا دا ادامدار كوپ جينالاتىن ورىندارداعى ءورت قاۋىپسىزدىگى جونىندە توتەنشە جاعدايلار دەپارتامەنتىنىڭ باسشىسى بارات دۇزاقباەۆ باياندادى.
ونىڭ ايتۋىنشا, 117 نىساننىڭ 60 نىسانى تەكسەرۋدەن ءوتتى. تەكسەرۋ بارىسىندا 522 بۇزۋشىلىق انىقتالعان. جىبەرىلگەن بۇزۋشىلىقتار ءۇشىن 8 زاڭدى تۇلعا اكىمشىلىك جاۋاپكەرشىلىككە تارتىلدى.
«ساۋدا نىساندارىن تەكسەرۋ بارىسىندا نەگىزگى بۇزۋشىلىقتار ورتكە قارسى اۆتوماتيكانىڭ ىستەن شىعۋى, ەۆاكۋاتسيا جولىنىڭ جابىق بولۋى, ەلەكتر سىمدارى مەحانيكالىق ادىسپەن ورىندالعان», - دەدى ول.
ودان باسقا, 15 نىسانعا قاتىستى تەكسەرۋلەر تىركەلىپ, جۇمىستار جالعاسۋدا, ولار «حان شاتىر», «سارىارقا», «ەۆرازيا», «استىقجان», MegaSilkway, ت.ب.
تجد باسشىسىنىڭ بايانداماسىن تىڭداعان استانا اكىمى اسەت يسەكەشەۆ قالاداعى ساۋدا بازارلارىنداعى ءورت قاۋىپسىزدىگى قاناعاتتانارلىق ەمەس ەكەنىن ايتتى. وسىعان بايلانىستى بازارلاردىڭ باسشىلارى مەن قوجايىندارىنا كەشەندى شارالار قابىلداۋ قاجەتتىگىنە شاقىردى, ەگەر شارا قولدانباسا بازاردى جاۋىپ تاستايتىنىن ەسكەرتتى.
