شارۋالار مامىرعا دەيىن ماقتا ءشيتىن تولىق ەگىپ ءبىتۋى ءتيىس. كوكتەمگى ەگىس ناۋقانىنا دايىندىقتى پىسىقتاۋ ماقساتىندا وتكەن سەمينار-كەڭەستە اۋدان اكىمى جامانتاي بەيسەنباەۆ اگروونەركاسىپ كەشەنىن دامىتۋدىڭ نەگىزگى 5 باعىتىن ايقىندادى. اۋىل شارۋاشىلىعى تاۋار وندىرۋشىلەرىن قولجەتىمدى نەسيە قارجىلارمەن قامتامامسىز ەتۋ, اۋىل شارۋاشىلىعى كووپەراتيۆتەرى مەن ماشينا-تراكتورلىق ستانسالار جۇيەسىن جەتىلدىرۋ, ونىمدەردىڭ ەكسپورتتىق الەۋەتىن ارتتىرۋ, سۋارمالى جەرلەردىڭ كولەمىن ۇلعايتۋ, ءمودۋلدى ءسۇت قابىلداۋ بەكەتتەرىن, مال بورداقىلاۋ الاڭدارىن اشۋ, ساقتاۋ قويماسىن سالۋ ءارى اۋىل شارۋاشىلىعى ونىمدەرىن وزگە اۋداندار مەن وبلىستارعا تاسىمالداۋ ارقىلى ساۋدالاۋ جوسپارلانىپ وتىر. سونداي-اق اۋداندا تامشىلاتىپ سۋارۋ ءادىسىن كەڭىنەن قولدانىپ, ونەركاسىپتىك جىلىجايلار كولەمىن ۇلعايتۋ, جىلىجاي كلاستەرىن ءارى قاراي دامىتۋ كوزدەلۋدە. بۇگىندە اۋدانداعى 107 كووپەراتيۆتىڭ 52-ءسى اعىن سۋ جەتكىزىپ بەرۋمەن اينالىسسا, 45-ءى مينەرالدى تىڭايتقىشتار تاراتۋمەن شەكتەلەدى. ەندى الداعى ءبىر جىلدا وڭىردەن اۋىل شارۋاشىلىعى سالاسىنداعى نەگىزگى كۇشكە اينالاتىن كووپەراتيۆتەردىڭ قاتارى ارتپاق.
ال سايرام اۋدانىندا شاعىن جانە ورتا كاسىپكەرلىك سالاسىندا 25 مىڭنان استام سۋبەكت جۇمىس ىستەيدى. بيىل 6 ينۆەستيتسيالىق جوبانى ىسكە اسىرۋ ارقىلى ونەركاسىپ ءونىم كولەمىن 39,3 ملرد.تەڭگەگە جەتكىزىپ, ءوسىمدى 8 پايىزعا جەتكىزۋ جوسپارلانۋدا. اۋدانداعى ونەركاسىپ ءوندىرىسىنىڭ ۇلەسى وبلىس بويىنشا 4,2 پايىز كولەمىندە. «وڭىرلەر كاسىپكەرلىگىن قولداۋ كارتاسىنا» اۋداننان 13 جوبا ەنگەن. ولاردىڭ جالپى قۇنى - 7,3 ملرد.تەڭگە. 2018 جىلى باعدارلاما اياسىندا «كونۋس ي ك», «بىرلىك» جشس, «كوكتال گرۋپپ», «ەليت ستوري M&A» سىندى 4 جوبانى ىسكە قوسۋ جوسپارلانعان. «دامۋ» باعدارلاماسىنا سايكەس, 2020 جىلعا دەيىن ءونىم كولەمىن 58,8 ملرد تەڭگەدەن 64 ملرد تەڭگەگە, ونىڭ ىشىندە بيىل اۋىل شارۋاشىلىعىنداعى ءونىم كولەمىن 59,5 ملرد تەڭگەگە جەتكىزۋ كوزدەلگەن.
ەركىن دوسىمباي,
وڭتۇستىك قازاقستان وبلىسى
