– اڭگىمەمىزدى بىردەن دانيالىق ۆەلوشاباندوز ميحاەل ۆالگرەننىڭ جەڭىسى جانە وتكەن جارىستان باستاساق...
– «امستەل گولد رەيس» بىركۇندىگىنىڭ وتە جوعارى دەڭگەيدە ءوتتى. سەبەبى وعان الەمنىڭ ەڭ ۇزدىك دەگەن ۆەلوسپورتشىلارى قاتىستى. ءبىزدىڭ بۇل جەڭىسىمىز «استانانىڭ» الەم ۆەلوسپورتىنداعى الاتىن ورنى ەرەكشە ەكەندىگىن جانە دەڭگەيدىڭ جوعارى ەكەندىگىن تاعى ءبىر دالەلدەدى. كەشەگى تۋرنيردە ءبىزدىڭ كوماندا ساۋاتتى تاكتيكا قۇرىپ, سپورتشىلاردىڭ كۇش-قۋاتىن 100 پايىز دۇرىس پايدالانا الدى دەپ ايتا الامىن. «امستەل گولد رەيس» بىركۇندىگى جانكۇيەرلەردىڭ ەسىندە ۇزاق ساقتالادى.
– ۆەلوسپورت جانكۇيەرلەرىنىڭ ەسىندە شىعار, ءسىز دە وسىدان 15 جىل بۇرىن اردەنن كلاسسيكاسىنىڭ جەڭىمپازى بولعان ەدىڭىز. سول كەزدەگى اسەرىڭىز, قۋانىشىڭىز ەسىڭىزدە مە؟
– قاراپ وتىرسام, بۇل جەڭىسىمە دە 15 جىل ءوتىپ كەتىپتى. ءتىپتى ارادان مۇنشا ۋاقىت وتكەنىنە دە سەنگىم كەلمەيدى. ارينە, سپورتشى بولعان سوڭ, ء اربىر جەڭىسىمىزدى ەستەن شىعارۋ مۇمكىن ەمەس. بۇل جەڭىستى ءدال كەشە جەڭىسكە جەتكەندەي ەسىمە الامىن. ۆەلوسيپەد الەمى وسىنداي ءىرى جەڭىستەردى ۇمىتپايتىنى مەنى قاتتى قۋانتادى. بىركۇندىك جارىسىنىڭ الدىندا ارىپتەستەرىم قوڭىراۋ شالىپ, سول جارىستىڭ سۋرەتتەرىن جىبەرىپ, جەڭىسىمدى ەسىمە سالىپ جاتتى. ۋاقىت ءبىر ورىندا تۇرماي, زۋلاپ ءوتىپ جاتقانىندا بايقاماي قالادى ەكەنبىز. مىنە, بۇگىن ءبىزدىڭ قول استىمىزدا ۆەلوسپورتتىڭ جاڭا ءبىر بۋىنى ءوسىپ كەلەدى. ءتورت ايدىڭ ىشىندە كوماندامىز وسىمەن ونىنشى جەڭىسىنە قول جەتكىزىپ وتىر. بۇيىرسا الداعى ۋاقىتتا دا ەلىمىزدىڭ كوك تۋىن بيىككە كوتەرىپ, كاسىپقوي سپورتتا جانكۇيەرلەرىمىزدى جەڭىسپەن قۋانتا بەرەمىز دەگەن ويدامىن.
– «استانا» ۆەلوكومانداسى ءۇشىن ماۋسىم قالاي باستالدى؟ قازاقستاندىق ۆەلوشاباندوزداردىڭ ناتيجەلەرى كوڭىل كونشىتە مە جانە ولاردىڭ بولاشاعىنا قانداي باعا بەرەسىز؟
– ءبىز ءۇشىن ماۋسىم وتە ءساتتى باستالدى دەپ سەنىممەن ايتا الامىن. قاڭتار ايىنداعى دايىندىق جيىندارىندا جاقسى جۇمىس ىستەدىك. ناتيجە دە كوپ كۇتتىرگەن جوق. بۇل كوماندانىڭ, باپكەرلەر شتابىنىڭ, سپورت ديرەكتورلارىنىڭ, سپورتشىلاردىڭ ناتيجەلى ەڭبەگىنىڭ جەمىسى دەپ ايتار ەدىم. وسىدان ەكى اي بۇرىن قازاقستان ۆەلوسپورتىنىڭ تۇلەگى الەكسەي لۋتسەنكونىڭ «ومان تۋرىنداعى» جەڭىسىن تويلاپ ەدىك.
قازىرگى تاڭدا جوعارى دەڭگەيدەگى جارىستارعا ەلىمىزدە تۋىپ-وسكەن سپورتشىلارىمىز قاتىسىپ كەلەدى. تاياۋدا عانا رۋسلان تىلەۋباەۆ مالايزياداعى جارىستا ءوزىن جاقسى قىرىنان كورسەتتى. كومانداعا جاڭادان قوسىلعان ەۆگەني گيديچ مالايزياداعى سول جارىستى ازيانىڭ ۇزدىك ۆەلوسپورتشىسى كيەتىن جەيدەمەن اياقتادى. لۋتسەنكو مەن اندرەي زەيتس قازىر «دجيرو د’يتاليا» گراند-تۋرىندا ەل نامىسىن قورعاۋعا دايىندالىپ جاتىر. وسىنداي جەتىستىكتەرىمىز بەن ەلىمىزدەن كاسىبي ۆەلوسپورتشىلاردىڭ شىعۋى – مەملەكەتتىڭ كوپ جىلدان بەرى ۆەلوسپورتتى قولداۋىنىڭ ارقاسى دەپ ويلايمىن. كوماندامىز پرەزيدەنتىمىزدىڭ تىكەلەي باستاماسىمەن جاساقتالعانانى بارلىق جانكۇيەر بىلەدى عوي. سوندىقتان بىزگە مەملەكەت تاراپىنان, جانكۇيەرلەردىڭ الدىندا ۇلكەن جاۋاپكەرشىلىكتى تالاپ ەتەدى. قازىرگى تاڭدا كوماندامىزدىڭ سپورتشىلارى الەمدىك بەدەلدى پەلوتوندا وزدەرىن جاقسى قىرىنان كورسەتىپ, ەلگە مەدال سىيلاپ جۇرگەن ونشاقتى قازاقستاندىق كاسىپقوي ۆەلوسپورتشىمىز بار. سونىمەن قاتار فارم-كوماندالاردا جاڭا بۋىن وكىلدەرى دە تىنىمسىز جاتتىعىپ جاتىر. ەلىمىزدە اۋەسقويلار اراسىنداعى ۆەلوسپورتتىڭ ەرەكشە قارقىنمەن دامىپ كەلە جاتقانى, ارينە قۋانارلىق جايت. وسىنىڭ ءبارى – تۇتاس مەحانيزمنىڭ جەمىسى. كوماندامىزدىڭ الەمدىك دەڭگەيدەگى جەتىستىكتەرى – «استانا» پرەزيدەنتتىك كاسىپقوي سپورت كلۋبىنىڭ, ۆەلوسپورت فەدەراتسياسىنىڭ, ۇلتتىق وليمپيادا كوميتەتىنىڭ قىرۋار ەڭبەگىنىڭ ارقاسى.
– جانكۇيەرلەر اراسىندا «استانا» ۆەلوسپورت كلۋبىندا شەتەلدىك لەگيونەرلەردىڭ سانى وتە كوپ دەپ سىزدەرى ءجيى سىناپ جاتادى. بۇل تۋرالى نە ايتاسىز؟
– بىلەسىز بە, كاسىبي سپورت – كوسموپوليتيكالىق الەم. ۆەلوشاباندوزداردى كومانداعا ۇلتىنا قاراپ ەمەس, سپورتتىق قاسيەتتەرىنە قاراپ تاڭداپ الامىز. مىسالى, ولار – سپرينتەرلەر, تالۋى كەزەڭىنىڭ سپورتشىلارى, كلاسسيكتەر جانە تاعى باسقالار بولىپ بولىنەدى. ءبىزدىڭ كوماندامىزدا جىل سايىن ون قازاقستاندىق ۆەلوشاباندوز جارىستارعا تۇراقتى تۇردە قاتىسادى. سالىستىرۋ ءۇشىن ايتا كەتەيىن, وسى ماۋسىمدا بريتاندىق «Sky» كومانداسىندا تەك سەگىز بريتاندىق شاباندوز بار. بىراق بۇل كوماندا ءبىر كەزدەرى لوندون وليمپيا ويىندارىنىڭ الدىندا جاتتىعۋ بازاسى رەتىندە قۇرىلعان بولاتىن. بەلگيانىڭ «Quickstep» ۆەلوكلۋبىندا جەتى بەلگيالىق سپورتشى بولسا, بىرىككەن اراب امىرلىكتەرىنىڭ «Emirates» كومانداسى ساپىندا امىرلىكتەردىڭ ءبىر عانا شاباندوزى بار. باحرەين ەلىنىڭ ۆەلوكلۋبىندا بىردە-ءبىر باحرەيندىك شاباندوزى جوق. ءتىپتى, تولىق يسپاندىق كوماندا سانالاتىن «Movistar» ساپىندا 14 يسپان ۆەلوشاباندوزى عانا بار. بۇل كاسىپقوي سپورت الەمىندەگى قالىپتى جاعداي. ەليتالىق پەلوتونعا تەك ەڭ مىقتىلار تۇسەدى. ويتكەنى باسەكەلەستىك بولماسا, سپورتشىلار اراسىندا ءوسۋ, ناتيجە بولمايدى. قازاقستاندىق شاباندوزدار مۇنى وتە جاقسى بىلەدى. سونداي-اق ولار سول دەڭگەيگە سايكەس بولۋ ءۇشىن ءاردايىم تالپىنادى. ال ءبىز ءوز كەزەگىمىزدە ۆەلوشاباندوزدارىمىزبەن تۇراقتى جۇمىس ىستەپ, ولاردىڭ سپورتشى رەتىندە ءوسۋ ءۇشىن بارلىق مۇمكىندىكتى جاسايمىز. سونداي-اق ولار ءۇشىن ەڭ قولايلى جارىستى تاڭداپ بەرۋگە تىرىسامىز. سوندىقتان كاسىبي دامۋ – ناتيجەنىڭ كەپىلى.
«استانا» كومانداسىنىڭ جارقىن جەڭىستەرىنەن كەيىن بۇكىل الەم قازاقستاننىڭ ۆەلوسپورت مەكتەبىن تانىدى. سوندىقتان ۆەلوسپورت جانكۇيەرلەرى مەن شەتەلدىك ماماندار «استانانى» الەمدەگى ەڭ ۇزدىك ۆەلوكوماندانىڭ ءبىرى دەپ مويىندادى.
– اڭگىمەڭىزگە راحمەت!
اڭگىمەلەسكەن
ءالي بيتورە,
«ەگەمەن قازاقستان»
