زاڭ جوباسى قازاقستان پرەزيدەنتىنىڭ «جەر زاڭناماسىنىڭ كەيبىر نورمالارىن قولدانۋعا موراتوري ەنگىزۋ تۋرالى» 2016 جىلعى 6 مامىرداعى №248 جارلىعىنا سايكەس قۇرىلعان جەر رەفورماسى جونىندەگى كوميسسيانىڭ ۇسىنىستارىن ىسكە اسىرۋعا باعىتتالعان. وسى ارادا اۋىل شارۋاشىلىعى ماقساتىنداعى جەردى ساتۋعا, سونداي-اق ونى شەتەلدىكتەرگە بەرۋگە تىيىم سالۋ «قازاقستان رەسپۋبليكاسى جەر كودەكسىنىڭ جەكەلەگەن نورمالارىنىڭ قولدانىسىن جانە «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ قولدانىسقا ەنگىزىلۋىن توقتاتا تۇرۋ تۋرالى» 2016 جىلعى 30 ماۋسىمداعى قازاقستان رەسپۋبليكاسىنىڭ زاڭىمەن بەلگىلەنگەنىن اتاپ ءوتۋ كەرەك.
بۇل قۇجاتتا اۋىل شارۋاشىلىعى جەرلەرىن قازاقستاندىقتارعا جالعا بەرۋ نورماسىن ساقتاۋ جانە جەتىلدىرۋ, جالعا بەرىلەتىن جەردىڭ شەكتى مولشەرىن بەلگىلەۋ, شەكارا اۋماعىنداعى اۋىل شارۋاشىلىعى جەرلەرىن پايدالانۋ تالاپتارىن كۇشەيتۋ, تۇرعىنداردىڭ جايىلىم القاپتارىنا قاجەتتىلىگىن قامتاماسىز ەتۋ قامتىلعان.
– 2016 جىلى جەر ماسەلەسىنە بايلانىستى قوعامدا قىزۋ تالقىلاۋلاردىڭ جۇرگەندىگى بەلگىلى. ناتيجەسىندە ەلباسى اتالعان زاڭنىڭ كەيبىر نورمالارىنا 2021 جىلدىڭ جەلتوقسانىنا دەيىنگى مەرزىموگە موراتوري جاريالاپ, ۇكىمەت قاۋلىسىنا سايكەس ارنايى كوميسسيا قۇرىلىپ, ونىڭ قۇرامىنا پارلامەنت دەپۋتاتتارى, قوعام قايراتكەرلەرى, بەلسەندىلەر مەن اۋىل شارۋاشىلىعى ونىمدەرىن وندىرۋشىلەردەن قۇرالعان 75 ادام كىردى. اتالعان كوميسسيا جەر ماسەلەلەرىنە بايلانىستى تۋىنداعان ساۋالدار بويىنشا استانا قالاسىندا 5 ءماجىلىس وتكىزدى, اقمولا, الماتى, قىزىلوردا, اتىراۋ وبلىستارىندا جەرگىلىكتى حالىقپەن كەزدەسىپ, وتىنىشتەرى مەن ساۋالدارىن جيناقتادى. سونداي-اق جەرگە بايلانىستى زاڭنامالاردى حالىققا ءتۇسىندىرۋ جۇمىستارى ءۇشىن اشىلعان 16 Call-ورتالىققا 13 مىڭنان اسا ساۋال مەن ۇسىنىستار ءتۇستى, – دەدى اۋىل شارۋاشىلىعى ءمينيسترىنىڭ ورىنباسارى.
ە.نىسانباەۆ اتاپ وتكەندەي, زاڭ جوباسىندا حالىق تا, كوميسسيا مۇشەلەرى دە قولداۋ بىلدىرگەن جەردى 49 جىلعا جالعا بەرۋ ينستيتۋتىن ساقتاپ قالۋ, جەردى جالعا بەرۋدە اشىقتىق پەن جاريالىلىقتى قامتاماسىز ەتۋ, قازاقستاندىقتارعا جالعا بەرۋدە جەردىڭ شەكتى مولشەرىن بەلگىلەۋ, كونكۋرستارعا قاتىسۋشىلارعا تەڭ قۇقىقتىق مۇمكىندىكتەر بەرۋ ءتارىزدى ماڭىزدى ماسەلەلەر ەسكەرىلگەن.
قولدانىستاعى زاڭدا جەردىڭ مولشەرىنە شەكتەۋ تەك جەكەمەنشىككە ساتىلاتىن اۋماقتار مەن شەتەلدىكتەرگە بايلانىستى باپتاردا عانا بار ەدى. ەندىگى وزگەرىس كولەمدى جەر تەلىمدەرىنىڭ ءبىر قولعا ءوتىپ كەتپەۋىنىڭ الدىن الادى.
سونىمەن قاتار مۇددەلى تاراپتاردىڭ ۇسىنىستارى نەگىزىندە شەكاراعا جاقىن ۋچاسكەلەردى بەرۋ ءتارتىبى دە كۇشەيتىلگەن. قازىرگى نورمادا الدىمەن ۇلتتىق قاۋىپسىزدىگىمىزگە تاۋەكەلدى قاۋىپتى كۇشەيتەتىن بۇل ماسەلە دە ەرەكشە كورسەتىلگەن.
ال قوراسىنداعى ازىن-اۋلاق مالعا جايىلىم تاپپاي وتىرعان اعايىننىڭ كوڭىلى جايلاناتىن ۋاقىت تا جاقىن سياقتى. ويتكەنى قۇجاتتا اۋىل-ايماق اۋماعىنان جايىلىمعا قاجەت جەرلەردى مەملەكەتتىك قاجەتتىلىك ەسەبىندە قايتارىپ الۋعا مۇمكىندىك تۋعالى وتىر.
زاڭ جوباسىمەن 2003 جىلعى 20 ماۋسىمداعى قازاقستان رەسپۋبليكاسىنىڭ جەر كودەكسىنە, اكىمشىلىك قۇقىق بۇزۋشىلىق تۋرالى كودەكسكە جانە بىرقاتار زاڭدارعا وزگەرىستەر مەن تولىقتىرۋلار ەنگىزۋ كوزدەلىپ وتىر.
جالپى, اۋىل شارۋاشىلىعى ءمينيسترىنىڭ ورىنباسارى ەرلان نىسانباەۆتىڭ مالىمەتىنشە, ەلىمىزدە اۋىل شارۋاشىلىعى ماقساتىنداعى 104 ملن گەكتار جەر قولدانىستا, سونىڭ 1 ملن 300 مىڭ گەكتارى جەكە مەنشىكتە, ال قالعانى جالعا بەرىلگەن.
اتالعان ۇسىنىستار ماجىلىستە قارالعانى, ءبىر جىلداي ۋاقىتتا قوعام اراسىندا دا قىزۋ تالقىعا تۇسكەنى بەلگىلى. ەندى سەنات زاڭ جوباسىن كوپ كىدىرتپەستەن جالپى وتىرىستا تالقىلاۋعا كىرىسەدى.
سەرىك ابدىبەك,
«ەگەمەن قازاقستان»
