وبلىس اكىمىنىڭ ورىنباسارى ج. سۇيىنشاليەۆتىڭ ايتۋىنشا, جايىق وزەنى ارقىلى وتەتىن كوپىر وتپەسى رەسپۋبليكالىق ماڭىزداعى «اتىراۋ — ورال» اۆتوكولىك جولىن وبلىستىق ماڭىزداعى «اتىراۋ — يندەر» اۆتوكولىك جولىمەن بايلانىستىراتىن ماحامبەت اۋىلىندا سالىنىپ جاتىر. كوپىر «اقتوبە — اتىراۋ — استراحان» اۆتوجولىنىڭ ءبىر بولىگىنە اينالادى: ول اقتوبەدەن استراحانعا دەيىنگى جولدى قىسقارتىپ, ترانزيتتىك كولىك اعىنىن اتىراۋعا كىرگىزبەي وتكىزۋگە مۇمكىندىك بەرەدى. قۇرىلىس جۇمىستارى بيىل اياقتالادى.
وبلىستىڭ ماحامبەت اۋدانىنداعى جاڭا كوپىر قوسىمشا كولىك ءدالىزىن قۇرىپ, وبلىس ورتالىعىن كەپتەلىستەردەن ايتارلىقتاي ارىلتادى. جولدىڭ جۇرەتىن بولىگى ەكى جولاقتان تۇراتىن بولادى, كوپىر بويىندا كولىكتىڭ جانە ءوڭىر تۇرعىندارىنىڭ تۇراقتى ءارى قاۋىپسىز قوزعالىسىن قامتاماسىز ەتەتىن جاياۋ جولدار قاراستىرىلعان. سونىمەن بىرگە, جوبالانعان كوپىر وتپەسى اۋداندا شاعىن جانە ورتا بيزنەستىڭ دامۋىنا سەرپىن بەرەدى.
ەسكە سالا كەتەيىك, پرەمەر-مينيستر باقىتجان ساعىنتاەۆ ەلباسىنىڭ تاپسىرماسى بويىنشا اتىراۋ وبلىسىنا كەلدى. ساپاردىڭ ماقساتى — مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك», ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋلارى مەن بەس الەۋمەتتىك باستاماسى اياسىندا بەرگەن تاپسىرمالارىنىڭ ورىندالۋ بارىسىمەن تانىسۋ.
