قىزدار ۋنيۆەرسيتەتىنىڭ قابىرعاسىندا تۇڭعىش رەت ۇيىمداستىرىلىپ وتىرعان جيىنعا شەتەلدىك جانە وتاندىق جوعارى وقۋ ورىندارىنىڭ ستۋدەنتتەرى, ماگيسترانتتارى مەن دوكتورانتتارى قاتىستى.
عىلىمي جۇمىس جانە يننوۆاتسيا جونىندەگى دەپارتامەنت مارافوندى مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا ەلىمىزدەگى ىزدەنۋشىلەردىڭ شىعارماشىلىق قابىلەتىن شىڭداۋ ءۇشىن وتكىزىپ وتىر.
ءىس-شارانىڭ باستى ماقساتى – جاس عالىمداردىڭ جاسامپازدىق الەۋەتىن دامىتۋ, ولاردى زاماناۋي عىلىمنىڭ ماڭىزدى ماسەلەلەرىن شەشۋگە بەلسەندى تۇردە تارتۋ, عىلىمي-پەداگوگيكالىق ءبىلىم بەرۋ كەڭىستىگىن دامىتۋ. سونىمەن قاتار, ىزدەنۋشىلەردىڭ ءوزارا بايلانىس ورناتۋلارىنا, تاجىريبە الماسۋلارىنا ىقپال جاساۋ.
– جاستاردىڭ شىعارماشىلىق, عىلىمي-زەرتتەۋ جۇمىستارىن ناسيحاتتاۋ مەن ونى كەڭ كولەمدە جاريالاۋدا, ولاردىڭ تۇلعالىق دامۋدىڭ ءتاسىلى رەتىندەگى جوبالىق زەرتتەۋ ءىس-ارەكەتتەرىنە تارتۋدا جانە ءبىلىم بەرۋ ءۇردىسىنىڭ تيىمدىلىگىن كوتەرۋ مەن قولدانبالى عىلىمعا دەگەن قىزىعۋشىلىقتارىن دامىتۋدا وسى تاقىلەتتەس جيىنداردىڭ ماڭىزى زور, – دەيدى شارا ۇيىمداستىرۋشىلارى.
عىلىمي مارافون جۇمىسى «فيلولوگيالىق عىلىمدار جانە الەمنىڭ ۇلتتىق بەينەسى», «ەلىمىزدەگى جانە الەمدەگى پەداگوگيكا جانە پسيحولوگيا: قازىرگى تەوريا جانە تاجىريبە», «قازاق قوعامىنىڭ ساناسىن جاڭعىرتۋ ۇدەرىسىندەگى الەۋمەتتىك-گۋمانيتارلىق ءبىلىم», «جاراتىلىستانۋ عىلىمدارى: يننوۆاتسيالىق تەحنولوگيالار مەن يدەيالار», «تسيفرلىق قازاقستان: فيزيكا-ماتەماتيكا عىلىمدارىنىڭ جاڭا سەرپىلىسى» جانە «جاھاندىق الەمدەگى قازاقستاندىق مادەنيەت» سەكتسيالارى بويىنشا جۇرگىزىلدى. اتالعان سەكتسيالارعا بارلىعى 175 عىلىمي جۇمىس كەلىپ تۇسكەن.
جيىننىڭ پلەنارلىق ماجىلىسىندە شاكارىم اتىنداعى سەمەي مەملەكەتتىك ۋنيۆەرسيتەتىنىڭ ستۋدەنتى ا. نۇرمۇحامەت «مانيپۋلياتسيالىق ماسەلەلەردى باسقارۋ جانە كوپپينگ ستراتەگيالار», تۇركيانىڭ ومەر حاليسدەمير ۋنيۆەرسيتەتىنىڭ دوكتورانتى ي. ىكبال «قازاق, تۇرىك تىلدەرىندەگى لينگۆيستيكالىق تەرميندەر ماسەلەسى», قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ماگيسترانتى ا. رومانەنكو «يسسلەدوۆانيە سامووتسەنكي دەتەي ملادشەگو شكولنوگو ۆوزراستا», قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى م. كارىبجان «قازاقستان-2050 ستراتەگياسىنىڭ الەۋمەتتىك ءمانى», قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتتەرى ج. بايمەنوۆا, س. مادەنيەتوۆا «جۇگەرىنىڭ «تۇران-480» سورتىنىڭ ونۋىنە جانە بيوپارامەترلىك كورسەتكىشىنە اۋىر مەتالداردىڭ اسەرى», قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى ز. جىلقىشىباەۆا «كومپيۋتەرلىك جۇيەلەر كيبەر شابۋىلدار وبەكتىسى رەتىندە», قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى م. ورىنتاەۆا «باسەكەگە قابىلەتتى مامان دايارلاۋدا مۋزىكا مۇعالىمنىڭ «فينال» مۋزىكالىق-كومپيۋتەرلىك باعدارلاماسىن قولدانۋ مۇمكىندىكتەرى» جانە اتالعان وقۋ ورنىنىڭ ستۋدەنتى گ. باقىتبەك «مەكتەپ ساباقتارىندا وقۋشىلاردى كوپ تىلدىلىككە باعىتتاۋ» تاقىرىپتارىندا بايانداما جاسادى.
شارا اياسىندا ارنايى ستەندتىك باياندامالار مەن جاس ينوۆاتورلار كورمەسى ۇيىمداستىرىلدى. مارافونعا كەلىپ تۇسكەن ماتەريالدار نەگىزىندە ارنايى جيناق شىعارۋ كوزدەلىپ وتىر. بۇل ءوز كەزەگىندە ەلىمىزدەگى ىزدەنۋشى جاستارعا, عىلىمي جۇمىستارمەن اينالىساتىن عالىمدارعا جانە يننوۆاتسيالىق دامۋ ستراتەگياسىن جوسپارلاپ, جۇزەگە اسىرۋشىلار ءۇشىن ماڭىزدى تەوريالىق جانە ادىستەمەلىك كومەكشى قۇرال بولماق.
