سۋرەتتە «سەرپىن» جارمەڭكەسىنەن كورىنىس
كوزدىڭ جاۋىن الىپ, كورگەن جاندى تاعالدىرعان دۇنيەلەر اقتوبە قالاسىنداعى قىلمىستىق اتقارۋ جۇيەسى مەكەمەسىندە ازىرلەنگەن. «سەرپىن» جارمەڭكەسىنە كەلگەندەر ءۇي مەن تۇرمىسقا قاجەتتى كيىم-كەشەكتەردى, ەسىكتەر مەن بەسىكتەردى, كادەسىيلار مەن قوبديشالاردى, قازاقشا ازىرلەنگەن ەت سالىپ ۇسىناتىن استاۋلاردى, ءتىپتى نار مەن شاحمات تاقتالارىنا دەيىن اتتاي قالاپ ساتىپ الىپ جاتتى.
شەبەردىڭ قولى ورتاق دەمەي مە دانا حالقىمىز. وسى ورايدا «ەڭبەك» رمك-گە قاراستى «ەڭبەك-اقتوبە» فيليالىندا جۇمىس ىستەپ جۇرگەندەردىڭ قولى قالا تۇرعىندارىنىڭ ءبىر كادەسى مەن پايداسىنا جاراپ جاتسا, بۇعان تەك قول سوعۋ كەرەك شىعار. ەكىنشى ءبىر وي تۇرعىسىنان قاراستىرعاندا بۇل كورىنىستىڭ ءوزى ەڭبەكپەن تۇزەۋ مەكەمەسىنىڭ جازاسىن وتەپ جۇرگەندەردى ەڭبەككە تارتا ءبىلۋىنىڭ وڭ مىسالى. سونداي-اق رەسپۋبليكا وڭىرلەرىندەگى «ەڭبەك-اقتوبە» سيپاتىنداعى قۇرىلىمدار ۇكىمەتكە قوماقتى سالىق كولەمىن تولەپ وتىرعانىن ايتا كەتكەن ءجون. بۇعان وڭىردەگى ەڭبەكپەن تۇزەۋ مەكەمەلەرىنىڭ جانىندا ەكى كوللەدج بار ەكەنىن قوسا ايتقان ورىندى. مۇندا 150-دەن استام سوتتالعاندار جۇمىسشى ماماندىعى بويىنشا ءبىلىم الىپ ءجۇر ەكەن.
تەمىر قۇسايىن,
«ەگەمەن قازاقستان»
اقتوبە
