دەلەگاتسيانى باستاپ بارعان اتىراۋ وبلىسى ىشكى ساياسات باسقارماسىنىڭ باسشىسى جاسۇلان بيسەمبيەۆ, «اتىراۋ-اقپارات» مەدياحولدينگىنىڭ ديرەكتورى بايازي ابدەشەۆ جانە «رۋحاني جاڭعىرۋ» وڭىرلىك جوبالىق كەڭسەسىنىڭ جەتەكشىسى رينات قۇلماعامبەتوۆ ساپار اياسىندا قازاقستاننىڭ استراحانداعى كونسۋلى قانات شەكقاليەۆپەن كەزدەستى. كەزدەسۋ بارىسىندا قوس تاراپ استراحان وبلىسىندا تۇراتىن قازاق دياسپوراسىنا قاتىستى ماڭىزدى ماسەلەلەردى كوتەردى. رەسەي تاراتقان رەسمي مالىمەتتەردە بۇگىندە استراحان اۋماعىندا تۇراتىن قازاقتاردىڭ سانى 149 مىڭنان اسادى.
ودان ءارى اتىراۋلىق دەلەگاتسيا استراحان وبلىسى ۇكىمەت توراعاسىنىڭ ورىنباسارى – مادەنيەت جانە تۋريزم ءمينيسترى گالينا زوتەەۆامەن جۇزدەستى. كەزدەسۋگە كونسۋل قانات شەكقاليەۆ ارنايى قاتىستى. كەزدەسۋ بارىسىندا 14-15 ناۋرىز ارالىعىندا مۇنايلى ولكەدە بولىپ وتكەن « ۇلى دالانىڭ ۇلتتىق داستۇرلەرى» حالىقارالىق فورۋمىنا اتسالىسىپ, بەلسەندى قاتىسقانى ءۇشىن استراحان باسشىلىعىنا اتىراۋ وبلىسىنىڭ اكىمى نۇرلان نوعاەۆتىڭ اتىنان العىس ءبىلدىرىلدى. سونداي-اق مينيسترگە قازاقستان پرەزيدەنتى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىن جۇزەگە اسىرۋ بارىسى تۋرالى اقپارات بەرىلدى. مادەنيەت جانە تۋريزم سالاسىندا بىرلەسكەن جوبالاردى جۇزەگە اسىرۋ مۇمكىندىكتەرىن قاراستىردى.
ادەتتە تۋريستەر استراحانداعى قۇرمانعازى اتىنداعى مادەني ورتالىققا جانە ساراي – باتۋ كەشەنىنە قىزىعۋشىلىق تانىتىپ جاتادى. ال بۇگىندە اتىراۋداعى سارايشىق مۇراسىن ساقتاپ قالۋ ماقساتىندا ۆيزيت-ورتالىق سالۋ جوسپارلانىپ وتىرعانىن ەسكەرسەك, تۋريستەر ءۇشىن سارايشىقتىڭ ەرەكشە ايماققا اينالارى انىق. قازاقستاننىڭ كيەلى جەرلەر گەوگرافياسى قاتارىن «ماحامبەت» ماۆزولەيىنىڭ, «اقمەشىت» كەشەنىنىڭ تولىقتىرعانى بەلگىلى. سوناۋ سارماتتار ءداۋىرىنىڭ ۇلى مۇراسى – «يمانقارا ۇڭگىرى», التىن ادام تابىلعان «ارالتوبە» قورعانى, «ۇشقان اتا», «قۇلشان اتا» ماۆزولەيلەرىندە دە تۋريستىك مارشرۋتتاردى دامىتۋ مۇمكىندىكتەرى جوعارى.
ساپار اياسىندا دەلەگاتسيا قۇرمانعازى اتىنداعى مادەني ورتالىقتى ارالادى. ۆولودار اۋدانىنداعى التىنجار اۋىلىندا ورنالاسقان ورتالىقتا ۇلى كۇيشىنىڭ شىعارماشىلىعىنا ارنالعان مۋزەي جاساقتالعان. رەسەيلىك ارىپتەستەر تۋريستىك ماۋسىم كەزىندە مۇندا 25 مىڭ ادامعا دەيىن بولاتىنىن ايتادى.
باقىتگۇل باباش,
«ەگەمەن قازاقستان»
اتىراۋ – استراحان – اتىراۋ
