ال وبلىستىق ىشكى ساياسات باسقارماسىنىڭ باسشىسى ەرنۇر داۋەنوۆتىڭ ايتۋىنشا, «رۋحاني جاڭعىرۋ» شاراسى بارىسىندا ءوڭىر تۇرعىندارى 800-دەي ءىس-شاراعا قاتىسىپتى. قازىر «ەرتىس ءوڭىرىنىڭ كيەلى جەرلەرى بالالاردىڭ كوزدەرىمەن» جوباسى جاسالۋدا.
وبلىستا قاسيەتتى ورىندار كارتاسىن ازىرلەۋدە 78 ورىن انىقتالدى, ونىڭ 5-ەۋى رەسپۋبليكالىق كارتاعا ەنگىزىلدى. تاريحشى قايرات باتتالوۆتىڭ جەتەكشىلىگىمەن قۇرىلعان توپ مۇشەلەرى ءالى دە جۇمىستارىن جالعاستىرۋدا. وبلىس ورتالىعىنداعى مەملەكەتتىك پەداگوگيكالىق ۋنيۆەرسيتەت الكەي مارعۇلان اتىنداعى ارحەولوگيالىق عىلىمي-زەرتتەۋ ورتالىعىن اشتى. سۇلتانبەك سۇلتاننىڭ ءۇي-جايىنىڭ كوشىرمە عيماراتىن سالدى. جانە «ۇلاعات» سەرياسى بويىنشا ىبىراي التىنساريننەن باستاپ, ءوڭىردىڭ پەداگوگ, جازۋشى قايراتكەرلەرى تۋرالى ەڭبەكتەر باسىپ شىعاردى. قازىر باياناۋىلداعى كيەلى ورىندار كارتاسىن جاساۋ باستالدى. جەلەزين اۋدانىندا ارحەولوگتار توبى «التىن توبە» قورىمدار الابىن زەرتتەمەك. ەكىباستۇز جەرىندەگى قولا ءداۋىرىنىڭ جادىگەرى ەسەپتەلەتىن كەمەرتۇز, اقبيدايىق جانە ولەڭتى تاستارىنداعى جازۋلاردىڭ كوشىرمەسىن مۋزەيلەرگە ورنالاستىرادى. اۋليەكول كەشەنى ماڭىندا قازبا جۇمىستارى جۇرگىزىلىپ, قيماق قاعاناتى بولعان كەنجەكول اۋماعىنداعى ارحيتەكتۋرالىق ەسكەرتكىشتەردى تانىستىرادى. ءوڭىردىڭ 100 تاريحي تۇلعاسى تۋرالى سەريالى فيلمدەر شىعارۋ قولعا الىنۋدا. قايرات باتتالوۆتىڭ مالىمدەۋىنشە, قازىرگى كەزدە ماماندار ساكرالدى ورىندار گەوگرافياسى تۋرالى Android جانە iOS وپەراتسيالىق جۇيەلەرىنە سايكەس ۇيالى تەلەفوندارعا ورناتىلاتىن قوسىمشالار ازىرلەۋدە.
فاريدا بىقاي,
«ەگەمەن قازاقستان»
پاۆلودار
