قاي ەلدىڭ جاستارىنىڭ رۋحى بيىك, تانىمى تەرەڭ بولسا, سول حالىقتىڭ بولاشاعى زور. عابيت مۇسىرەپوۆ ءبىر سوزىندە: «مەن جاستارعا: الدارىڭدا تاۋداي تالاپ تۇر. ءومىر زاڭعارلارى ۇنەمى بيىككە شىعارادى. وعان جەتۋ ءۇشىن تالماي ىزدەنىڭدەر دەر ەدىم. جاستارعا توعىشارلىق, بويكۇيەزدىك دەرتىنەن اۋلاق, سەرگەك, سەزىمتال بولعان جاراسادى» دەگەن ەكەن.
جاستار ەلىمىزدىڭ بولاشاعى دەپ جاتامىز. ەلباسى جاستارعا قولداۋ كورسەتۋدى ءاردايىم باستى نازاردا ۇستاپ كەلەدى. سول جاستار ءوز الەۋەتىن تولىق پايدالانا الىپ ءجۇر مە, قحا قىزمەتىندە جاستار قوزعالىسىنىڭ ءرولى قانداي, قوعامدىق سانانى جاڭعىرتۋدىڭ ماڭىزدىلىعى, نەدە دەگەن مازمۇنداعى ماسەلەلەر بەلسەندى جاستار باسقوسۋىندا اشىق ديالوگ فورماتىندا تالقىلاندى. ەرەكشە تالانتىمەن دارالانعان كوشباسشى جاستار جەتىستىككە جەتۋ جولىنداعى تاجىريبەلەرىمەن ءبولىسىپ, ءوز وي-پىكىرلەرىن ورتاعا سالدى.
اسسامبلەيا جانىنان قۇرىلعان «جاڭعىرۋ جولى» رەسپۋبليكالىق جاستار قوزعالىسى ەلىمىزدىڭ ءار وڭىرىندەگى جاستار مەن جاسوسپىرىمدەردىڭ قارىم-قابىلەتىن اشىپ, وتانسۇيگىشتىككە تاربيەلەپ, ازاماتتىق ۇستانىمدارىن قالىپتاستىرۋ, ءوز يدەياسىن جۇزەگە اسىرۋعا مۇمكىندىك اشۋ ماقساتىندا قۇرىلعان. اتالعان بىرلەستىك بۇگىنگى تاڭعا دەيىن بىرنەشە جوبانى جۇزەگە اسىرىپ ۇلگەرگەن. سونىڭ ءبىرى – ەلىمىزدىڭ ىرگەلى وقۋ ورىندارىندا بەلسەندى جاستار كلۋبىن قۇرىپ, مادەني-تانىمدىق, سپورتتىق ساۋىقتىرۋ باعىتىندا جاستاردىڭ ەرىك-جىگەرىن شىڭداۋعا باعىتتالعان جاڭا جوبا.
– مۇنداي باسقوسۋلار ستۋدەنت جاستار مەن جوعارى سىنىپ وقۋشىلارىن تىڭ تالپىنىستارعا جەتەلەيدى. سان سالادا جەتىستىككە جەتكەن الدىڭعى بۋىن وكىلدەرىنىڭ ءجۇرىپ وتكەن جولدارى ولارعا ۇلگى-ونەگە بولۋى ءتيىس. بۇگىنگى شاراعا 38 وقۋ ورنىنان كەلگەن ستۋدەنتتەر قاتىسىپ وتىر. ەلىمىز تاۋەلسىزدىك العالى بەرى مەملەكەت تاراپىنان جاستارعا كوپ قولداۋ كورسەتىلىپ كەلەدى. «بولاشاق» سيياقتى باعدارلامالار اشىلىپ, شەت ەلدەردە دە ءبىلىم الۋعا مۇمكىندىك تۋدى. جاستار اراسىنان جاڭا ليدەرلەردى ىزدەپ, ەڭ تالانتتىلارىنا ەرەكشە قولداۋ كورسەتۋ ۇزدىكسىز ءجۇرىپ وتىرۋ كەرەك, – دەيدى «جاڭعىرۋ جولى» رەسپۋبليكالىق جاستار قوزعالىسى توراعاسىنىڭ ورىنباسارى تيمۋر جۇمىرباەۆ.
جاستار بىرلەستىگى الداعى ۋاقىتتا قازاقستان حالقى اسسامبلەياسىنىڭ ۇيىتقى بولۋىمەن قايىرىمدىلىق جۇمىستارعا, ستۋدەنتتەردىڭ تانىم كوكجيەگىن كەڭەيتۋگە باعىتتالعان تاتۋلىق پەن كەلىسىم جوباسىن ىسكە اسىرۋدى جوسپارلاپ وتىر. باسقوسۋدا ايتىلعان ۇسىنىس-پىكىرلەر ەسكەرىلىپ, الداعى جۇمىس بارىسى تىڭ يدەيالاردىڭ نەگىزىندە وربىمەك.
اعالار قاۋىمى جيعان-تەرگەن, كورىپ بىلگەن ومىرلىك, اقپاراتتىق تاجىريبەسىن جاستارمەن بولىسكەنى ءجون. جاس بۋىن ۇلكەننىڭ اقىلىنان عانا ەمەس, ءوزىنىڭ قاتەسىنەن ساباق الۋى ءتيىس. قۋانىشتىسى سول, بۇگىنگى كەزدەسۋدە اعا بۋىن مەن جاستار اراسىنداعى رۋحاني ساباقتاستىق ءۇردىسىن ءۇزىپ الماۋ ماسەلەسى كەڭىنەن ءسوز بولدى. مۇنداي پىكىر الماسۋ الاڭدارى ەل ەرتەڭى سانالاتىن وسكەلەڭ ۇرپاقتىڭ بىرلىگىن نىعايتىپ, كوپتەگەن جارقىن جەتىستىكتەرگە جول اشپاق.
ارمان وكتيابر,
«ەگەمەن قازاقستان»
الماتى
