كوشپەلى وتىرىستا ءسوز باستاعان بىرعانىم ءايتىموۆا سەناتورلاردىڭ قازاق كينەماتوگرافياسىنىڭ تۇيتكىلدى ماسەلەلەرىن, ساپاسىن كوتەرۋ, ۇلتتىق فيلمدەردىڭ باسەكەلەستىگىن ارتتىرۋ, ايماقتاردا كينوكورسەتىلىمدەردىڭ قولجەتىمدى بولۋىن, وتاندىق كينونىڭ شەتەلدە مويىندالۋىن زەرتتەپ جاتقاندارىن جەتكىزدى.
ماڭىزدى كەزدەسۋ بارىسىندا تانىمال رەجيسسەرلەر, اكتەرلەر جانە پروديۋسەرلەر سەناتورلارعا جۇمىس بارىسىنداعى ەرەكشەلىكتەر مەن كينو تۋرالى زاڭنىڭ قابىلدانۋىنىڭ قاجەتتىلىگىن ايتتى. ناقتىراق ايتار بولساق, رەجيسسەر رۇستەم ءابدىراش ۇلتتىق كينو قوردىڭ قۇرىلىۋىنىڭ ماڭىزدىلىعىن, كينوپروكاتشى باۋىرجان شۇكەنوۆ كينەماتوگرافيا سالاسىنداعى قۇقىقتىق رەتتەۋ ماسەلەسى مەن شالعايداعى حالىققا كينونىڭ قولجەتىمدى بولۋىنا نازار اۋدارۋ كەرەكتىگىن ايتتى. رەجيسسەر-انيماتور اداي ءابىلدينوۆ انيماتسيالىق كينونىڭ تاربيە قۇرالى رەتىندە دامۋىن ءسوز ەتسە, كينورەجيسسەر «دۋبلياج» ءشوب جەتەكشىسى بولات قالىمبەتوۆ ەلىمىزدىڭ كينوپروكاتىنا تۇسكەن فيلمدەردى دۋبلياجداۋ مىندەتتەلگەن ۋاقىتتا, «قازاقفيلم» نەگىزىندەگى دۋبلياج بىرلەستىگىنىڭ زور مۇمكىنشىلىگى تۋرالى اقپارات بەردى.
– بۇگىندە «قازاقفيلم» كينوستۋدياسى – ۇلتتىق برەند جانە قازاقستان كينويندۋسترياسىنىڭ قوزعاۋشى كۇشى. ءبىز – قازاقستاننىڭ كينەماتوگرافيستەرى ەلىمىزدىڭ «كينەماتوگرافيا تۋرالى» زاڭىن كۇتىپ جۇرگەنىمىزگە كوپ بولدى. بۇل زاڭ: كينەماتوگرافيستەردىڭ, كينو وندىرۋشىلەردىڭ, پروكاتشىلاردىڭ, ديستريبيۋتورلاردىڭ جۇمىسىن رەتتەپ وتىرادى. ككينو يندۋستريانىڭ ەكونوميكالىق تەتىكتەرىنىڭ دامۋىن قالىپتاستىرۋعا مۇمكىندىك بەرەدى. سونىمەن قاتار سالىقتىق ارتىقشىلىقتار, كەدەندىك جەڭىلدىكتەر جانە مەملەكەتتىك سۋبسيديالاۋ مەحانيزمى سياقتى نارىقتىق مەحانيزمدەر ارقىلى جاعىمدى ينۆەستيتسيالىق كليمات قالىپتاستىرادى, – دەدى ش.ايمانوۆ اتىنداعى «قازاقفيلم» اق پرەزيدەنتى باقىت قايىربەكوۆ.
كسرو حالىق ءارتيسى ءاسانالى ءاشىموۆ «قازاقفيلم» كينوستۋدياسىنا ۇلتتىق كومپانيا مارتەبەسىن قايتارۋ تۋراسىندا ءسوز قوزعاپ: «بۇل كينوستۋديا ەلىمىزدىڭ بارلىق كينوگەرلەرىن بىرىكتىرەتىن ورتاق شاڭىراق. وسى جەرگە ءبارىمىز جينالىپ كينو توڭىرەگىندە اڭگىمە قۇرامىز. سوندىقتان دا كينوستۋديانىڭ تەرريتورياسى تەك مەملەكەتكە عانا تيەسىلى بولىپ, جەكە مەنشىككە وتپەۋى ءتيىس. كينوستۋدياعا ۇلتتىق كومپانيا دارەجەسىن قايتارۋ كەرەك, – دەدى.
جيىندى سەناتور بىرعانىم ءايتىموۆا قورىتىندىلادى. ول بۇگىنگى كينەماتوگرافيا جانە مادەنيەتتىڭ, ونىڭ ىشىندە الەۋمەتتىك سالالاردىڭ دامۋىن رەتتەيتىن زاڭ جوباسى قاراستىرىلعان كەزدە وتىرىستا ايتىلعان پىكىرلەر مەن ۇسىنىستار مىندەتتى تۇردە ەسكەرىلەتىنىن جەتكىزدى.
«قازاقفيلمگە» كەلگەن دەپۋتاتتار كينوستۋديانىڭ تىنىس-تىرشىلىگىمەن جانە ونىڭ تەحنيكالىق مۇمكىندىكتەرىمەن تانىستى. ولارعا فيلمدەردى جارىققا شىعارۋ ءۇردىسىنىڭ ەرەكشەلىكتەرى تۋرالى جانە قازاقستاننىڭ التىن قورىنا ەنگەن فيلمدەردىڭ شىعۋ تاريحى تۋرالى دا باياندالدى.
– كينوستۋدياعا قازاق كينوسىنىڭ مۇراجايى كەرەك ەكەندىگىن تۇسىندىك. ويتكەنى ەلىمىزدىڭ مادەني قۇندىلىقتارىنىڭ بارلىعى وسى جەردە. وسى جونىندە ءبىز دەپۋتاتتىق ساۋال جولدايتىن بولامىز, – دەدى ەكسكۋرسيا سوڭىندا دەپۋتات باقىتجان جۇماعۇلوۆ.
ايناش ەسالي,
«ەگەمەن قازاقستان».
الماتى
