القالى جيىندى قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى جانە ل.گۋميلەۆ اتىنداعى وردالى وقۋ ورنى بىرلەسىپ ۇيىمداستىردى. كەزدەسۋ بارىسىندا قازاقستاندىق جاس عالىمدار عىلىم سالاسىنداعى قارقىندى قادامداردىڭ بولاشاعىن تالقىلادى.
كونفەرەنتسيانى ەۋرازيا ۇلتتىق ۋنيۆەرسيتەتىنىڭ عىلىمي-زەرتتەۋ جۇمىستارى بويىنشا پرورەكتورى گۇلنار مەرزادينوۆا جۇرگىزىپ وتىردى. مودەراتور ايتىپ وتكەندەي, كەلەلى كەڭەستىڭ نەگىزگى ماقساتى دا سول, جاس عالىمداردىڭ شىعارماشىلىعىن بەلسەندى دامىتا وتىرىپ, ولاردى زاماناۋي عىلىمنىڭ وزەكتى مىندەتتەرىن شەشۋگە قاتىستىرۋ. سونىمەن قاتار, مۇنداي ماڭىزدى ءىس-شارالار بولاشاق عالىمداردىڭ اراسىندا ارىپتەستىك بايلانىس ورناتادى.
ەلباسى قورى اتىنان سەرگەي توحتاروۆ قۇتتىقتاۋ ءسوز سويلەپ, بايانداماشىلارعا ساتتىلىك تىلەدى. «جاستاردىڭ شىعارماشىلىق, عىلىمي-زەرتتەۋ جۇمىستارىن ناسيحاتتاۋ مەن ونى كەڭ كولەمدە جاريالاۋدا, ولاردىڭ تۇلعالىق دامۋدىڭ ءتاسىلى رەتىندەگى جوبالىق زەرتتەۋ ءىس-ارەكەتتەرىنە تارتۋدا جانە ءبىلىم بەرۋ ءۇردىسىنىڭ تيىمدىلىگىن كوتەرۋ مەن قولدانبالى عىلىمعا دەگەن قىزىعۋشىلىقتارىن دامىتۋدا وسى تاقىلەتتەس جيىنداردىڭ ماڭىزى زور», دەدى س.توحتاروۆ.
بيىلعى جىلى كونفەرەنتسيا 13 سەكتسيا جانە 58 شاعىن سەكتسيا بويىنشا ءوتتى. بايانداماشىلار «عىلىم جانە ءبىلىم - 2018» اتتى تاقىرىپتا توپتاسىپ, ءوز ەڭبەكتەرىن قازاق, ورىس, اعىلشىن تىلدەرىندە زاماناۋي كوممۋنيكاتسيالاردىڭ پروبلەمالارى, تسيفرلىق ديپلوماتيا جانە ەلىمىزدەگى ءۇش تىلدىلىكتى دامىتۋ سياقتى تاقىرىپتار اياسىندا ءوربىتتى.
كونفەرەنتسياعا قاتىسۋشىلاردىڭ جالپى سانى بيىل ەكى مىڭنان اسقان. ءحىىى حالىقارالىق كونفەرەنتسيانىڭ تاعى ءبىر ەرەكشەلىگى, 35 جاسقا دەيىنگى ستۋدەنتتەر, ماگيسترانتتار, دوكتورانتتاردان بولەك, جيىندا ورتا مەكتەپ تۇلەكتەرى, نازارباەۆ زياتكەرلىك مەكتەپتەرىنىڭ وقۋشىلارى دا بولدى.
وسىمەن 13 مارتە وتكىزىلىپ وتىرعان وسىناۋ ماڭىزدى شارا جىل سايىن بىرنەشە زەرتتەۋ ۇردىستەرىن قامتۋعا تىرىسادى. وسى جولى قازاقستاننىڭ بارلىق وڭىرلەرىنەن كەلگەن جاس عالىمدار كەڭەسىنىڭ توراعالارى تۇڭعىش پرەزيدەنت – ەلباسى قورىنىڭ جانىنداعى جاس عالىمدار كەڭەسى توراعاسى ورىنباسارلارىنىڭ قاتىسۋىمەن سەمينار-كەڭەس وتكىزدى.
جاس عالىمداردىڭ داستۇرگە اينالدىرعان اتالمىش باس قوسۋلارى ەلىمىزدىڭ ەرتەڭگى عىلىمىنا ولشەۋسىز ۇلەس, كەلەشەگىنە كەمەل ۇلگى بولارلىق. قاداۋ-قاداۋ ويلار ايتىلىپ, جارىسسوزدە جالىنداعان جاس عالىمدار جىگەرلەنە جەتىستىك بەلەستەرىنە باستار جولدى ايقىندادى.
رەسپۋبليكامىزدىڭ عىلىمي زەرتتەۋ ينستيتۋتتارى مەن بەلگىلى جوعارعى وقۋ ورىندارىنىڭ جاس عالىمدارى عىلىمي ترەندتەردى تالقىلاۋمەن قاتار, ولاردىڭ ماعىناسىنا تۇسىنىكتەمە بەردى.
سەمينار-كەڭەس بارىسىندا بايقاعانىمىزداي, جاس يدەيا گەنەراتورلارى بولاشاقتا فوكۋس-توپتىق سۇحبات وتكىزۋدى جوسپارلاپ وتىرعاندارىن ايتتى. قاتىسۋشىلارمەن جۇرگىزىلەتىن ول ساۋالناما عىلىمنىڭ پروبلەمالارىن جانە ولاردى قانداي يدەيالار ىنتالاندىراتىنىن انىقتاماق.
كەزدەسۋ بارىسىندا تۇڭعىش پرەزيدەنت قورى وسى باعىتتا زاماناۋي اعىمداردى ەسكەرە وتىرىپ, الداعى ۋاقىتتا جاستاردىڭ بىرنەشە باعدارلامالارىنىڭ تۇساۋكەسەرىن وتكىزۋدى جوسپارلاپ وتىرعاندىقتارىن ايتتى.
ميراس اسان,
«ەگەمەن قازاقستان»
