كوميتەت توراعاسى بىرعانىم ءايتىموۆا «كينەماتوگراف ادامگەرشىلىككە تاربيەلەۋدەگى, قوعامداعى يدەولوگيالىق قۇندىلىقتاردى سىڭىرۋدەگى, زەردەلىك جانە مادەني دامۋدى ىلگەرىلەتۋدەگى باستى قۇرالداردىڭ ءبىرى بولىپ تابىلادى», دەپ اتاپ ءوتتى. ب. ءايتىموۆا سونداي-اق سەناتورلاردىڭ وتاندىق كينەماتوگرافيانىڭ قازىرگى جاعدايى مەن وزەكتى ماسەلەلەرىن, كەلەشەكتە ساپاسى مەن ۇلتتىق فيلمدەردىڭ باسەكەگە قابىلەتتىلىگىن ارتتىرۋدى, تۇرعىندارعا ارنالعان كينو كورسەتۋ قىزمەتتەرىنە قول جەتكىزۋدى, كينويندۋسترياسىنىڭ اشىقتىعى مەن تارتىمدىلىعىن, قازاقستان كينوسىنىڭ شەتەلدەردەگى بەدەلى مەن تانىلۋىن زەردەلەۋگە نيەتتەنىپ وتىرعانىن جەتكىزدى.
رەجيسسەرلەر, اكتەرلەر مەن پروديۋسەرلەر سەناتورلارعا ءوز جۇمىستارىنىڭ ەرەكشەلىكتەرى تۋرالى ايتىپ, كينو تۋرالى ارنايى زاڭ قابىلداۋ قاجەتتىگىنە قولداۋ ءبىلدىردى. اتاپ ايتقاندا, رەجيسسەر رۇستەم ءابدىراشوۆ ۇلتتىق كينونى قولداۋ قورىن قۇرۋدىڭ ماڭىزدىلىعىن اتاپ ءوتتى. كينو پروكات سالاسىنىڭ مامانى باۋىرجان شوكەنوۆ كينەماتوگرافيا سالاسىن قۇقىقتىق رەتتەۋ جانە قالالار مەن اۋىلدىق ەلدى مەكەندەردە ازاماتتاردىڭ كينو كورسەتۋ قىزمەتىنە قول جەتكىزۋ مۇمكىندىكتەرى تۋرالى ايتتى. رەجيسسەر-انيماتور اداي ابەلدينوۆ تاربيە قۇرالى رەتىندە انيماتسيالىق كينونى دامىتۋ, ال كينورەجيسسەر, «دۋبلياج» مەكەمەسىنىڭ باسشىسى بولات قالىمبەتوۆ ەلىمىزدىڭ كينوتەاترلارىنا پروكاتقا كەلەتىن بارلىق فيلمدەردى اۋدارۋداعى «قازاقفيلم» كينوستۋدياسىنىڭ دۋبلياج مۇمكىندىكتەرى تۋرالى ايتتى.
– بۇگىنگى تاڭدا «قازاقفيلم» كينوستۋدياسى – ۇلتتىق برەند ءارى وتاندىق كينو ونىمدەردى وندىرۋدەگى نەگىزگى مەكەمە. ءبىز كينەماتوگرافيستەردى, كينو وندىرۋشىلەردى, پروكاتشىلاردى, ديستريبيۋتورلاردى بىرىكتىرە وتىرىپ, كينويندۋستريانى دامىتاتىن ەكونوميكالىق تەتىكتەردى قالىپتاستىرۋعا مۇمكىندىك بەرەتىن, جاعىمدى ينۆەستيتسيالىق احۋال جاسايتىن ءتيىستى زاڭدى بۇرىننان كۇتىپ ءجۇرمىز, - دەدى شاكەن ايمانوۆ اتىنداعى «قازاقفيلم» اكتسيونەرلىك قوعامىنىڭ پرەزيدەنتى باقىت قايىربەكوۆ.
بەلگىلى اكتەر ءارى رەجيسسەر ءاسانالى ءاشىموۆ «قازاقفيلم» كينوستۋدياسىنا ۇلتتىق كومپانيانىڭ مارتەبەسىن بەرۋدى ۇسىندى. «كينوستۋديا ەلىمىزدىڭ كينەماتوگرافيستەرى باس قوسىپ, كينونى تالقىلايتىن ورىن بولىپ تابىلادى. سوندىقتان كينوستۋديا اۋماعى تەك مەملەكەتتە عانا بولۋى كەرەك, جەكەشەلەنبەۋى ءتيىس. كينوستۋدياعا ۇلتتىق كومپانيا مارتەبەسىن قايتارۋ كەرەك», - دەدى ا. ءاشىموۆ.
پىكىرسايىستى سەناتور ب. ءايتىموۆا قورىتىندىلادى. ونىڭ ايتۋىنشا, ايتىلعان ۇسىنىستار كينەماتوگرافيا جانە مادەنيەت پەن الەۋمەتتىك سالانى رەتتەيتىن زاڭداردى قاراۋ بارىسىندا پايدالانىلاتىن بولادى.
دەپۋتاتتار ساپار اياسىندا «قازاقفيلم» كينوستۋدياسىن كورىپ, ءتۇسىرۋ الاڭدارىندا بولدى جانە تەحنيكالىق جابدىقتارمەن تانىستى. ساياحات بارىسىندا دەپۋتاتتارعا فيلم ءتۇسىرۋ ۇدەرىستەرىنىڭ ەرەكشەلىكتەرى جانە قازاقستان ونەرىنىڭ التىن قورىنا ەنگەن فيلمدەردىڭ تاريحى تۋرالى اقپارات ايتىلدى.
– ءبىز كينوستۋدياعا قازاق كينوسىنىڭ مۇراجايى كەرەكتىگىنە كۋا بولدىق, مۇندا وتاندىق مادەنيەتتىڭ جەتىستىكتەرى ساقتاۋلى تۇر. ءبىز بۇل تۋرالى ءتيىستى ساۋال جولدايمىز, - دەدى كەزدەسۋ سوڭىندا دەپۋتات باقىتجان جۇماعۇلوۆ.
سول كۇنى سەنات دەپۋتاتتارى عابيت مۇسىرەپوۆ اتىنداعى قازاق مەملەكەتتىك بالالار جانە جاسوسپىرىمدەر اكادەميالىق تەاترىنىڭ ارتيستەرىمەن كەزدەستى. شاراعا الماتى قالاسىنىڭ الدىڭعى قاتارداعى تەاتر ۇجىمدارىنىڭ وكىلدەرى قاتىستى.
13 ساۋىردە پارلامەنتشىلەر الماتى قالاسىنىڭ ورتالىق مەملەكەتتىك مۇراعاتىندا بولادى جانە وندا زاڭناماعا مۇراعات ءىسى ماسەلەلەرى بويىنشا وزگەرىستەر مەن تولىقتىرۋلار تالقىلانادى. ساپار باعدارلاماسىندا سونداي-اق قازاق مەملەكەتتىك تسيركىنىڭ, ۇلتتىق كىتاپحانانىڭ, جانە سپورت نىساندارىنىڭ («الماتى ارەنا» كەشەنى مەن بيىك تاۋداعى «مەدەۋ» مۇز ايدىندارى) جۇمىستارىمەن تانىسۋ بار.
