- عارىشتى يگەرە بىلگەن مەملەكەت دۇنيە جۇزىندەگى قۇبىلىستاردىڭ ءبارىن باقىلاي الاتىنىن, سوڭعى جاڭالىقتاردان حاباردار بولاتىنىن بىلەمىز. قازىر ەلباسىنىڭ تاپسىرمالارىنىڭ ءبىرى – تسيفرلاندىرۋ جۇمىستارى بارلىق سالادا جۇرگىزىلۋدە. كاسپي, ارال تەڭىزدەرىندەگى وزگەرىستەردى دە وزدەرىڭىز ارقىلى ءبىلىپ وتىرمىز. جەردىڭ جاعدايىن كوكتەن باقىلاپ, ەل يگىلىگى مەن دامۋى ءۇشىن ەرەن ەڭبەك ەتىپ كەلەسىزدەر, دەدى ايماق باسشىسى.
كەزدەسۋ بارىسىندا ايدىن ايىمبەتوۆ مەملەكەتتىك قىزمەتتە عارىشتىق تەحنولوگيالاردى قولدانۋدىڭ تيىمدىلىگىن اتاپ ءوتتى.
-بۇگىنگى كۇنى قازاقستاندا 4 جەر سەرىگى بار (2 جەردى قاشىقتىقتان باقىلايتىن, 2 تەلەناۆيگاتسيالىق). جەردى قاشىقتىقتان باقىلاۋ سپۋتنيگىنىڭ جۇمىسىنا سۇيەنە وتىرىپ, «قازاقستان عارىش ساپارى» كومپانياسى 100% مەملەكەتتىڭ قاتىسۋىمەن عارىش مونيتورينگىن ۇسىنادى. ءبىز مەملەكەتتىك ورگانداردىڭ جۇمىسىندا قاجەتتى عارىشتىق سۋرەتتەر مەن باسقا دا قىزمەتتەردى قامتاماسىز ەتەمىز, دەدى ول.
«قازاقستان عارىش ساپارى» ۇك» اق ۆيتسە-پرەزيدەنتى عارىشتىق تەحنولوگيانى قولدانۋ مۇمكىندىكتەرىمەن تانىستىردى. مىسالى, عارىشتان تۇسىرىلگەن سۋرەتتەردى تابيعي اپاتتاردىڭ مونيتورينگى, اۋىل شارۋاشىلىعى داقىلدارىن, مەملەكەتتىك شەكارالاردى, سۋ وبەكتىلەرىن بولجاۋ, تابيعي رەسۋرستاردى زەرتتەۋ, ەكولوگيا, مۇناي-گاز سەكتورىندا, جالپى قالانىڭ باس جوسپارى مەن اگلومەراتسيانى قۇرۋ جانە ت.ب. قىزمەتتەر ءۇشىن پايدالانۋعا بولادى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
