كەز كەلگەن تەحنولوگيالىق وزگەرىس قاي مەملەكەتتىڭ بولماسىن ەكونوميكالىق دامۋىندا بەلگىلى ءبىر دەڭگەيدە سەرپىلىس الىپ كەلەرى ءسوزسىز. ال عىلىمي جاڭاشىلدىققا ىلەسە الماعان مەملەكەت ەكونوميكالىق دامۋىندا قانداي دا ءبىر قيىنشىلىقتارعا تاپ بولاتىندىعىن الەمدىك تاجىريبە ءجيى كورسەتۋدە.
مەملەكەتىمىزدىڭ عىلىمي جاڭاشىلدىققا ۇمتىلۋىنا سەرپىن بەرەر كۇش – جاستارىمىز. ساناسى سەرگەك, جاڭا تەحنولوگيالاردى مەڭگەرگەن وسكەلەڭ ۇرپاق قازاقستاننىڭ باسەكەگە قابىلەتتى ەلدەرىنىڭ ساپىنا قوسۋعا ۇلەس قوساتىندىعىنا سەنىمدىمىز.
بۇل ورايدا جاستاردى جاقسىلىق پەن ىزگىلىككە, بىلىمدىلىك پەن بىلگىرلىككە تاربيەلەيتىن پەداگوگ ەڭبەگىنىڭ ماڭىزى اۋقىمدى. زاڭعار قالامگەرىمىز مۇحتار اۋەزوۆ: «ۇستازدىق – ۇلى نارسە» دەگەن ءسوزى قاي ۋاقىتتا دا ۇستاز قىزمەتىنە بەرىلگەن ءادىل دە ۇزدىك باعا بولىپ قالا بەرمەك.
تۇڭعىش پرەزيدەنتىمىز نەگىزىن قالاپ, بولاشاق ماقساتى مەن مۇراتىن نىقتاپ بەرگەن تاۋەلسىز مەملەكەتىمىزدىڭ ستراتەگيالىق جوسپارلارىن جۇزەگە اسىرۋدا, ەلىمىزدىڭ ودان ارعى الەۋمەتتىك-ەكونوميكالىق, رۋحاني-مادەني دامۋىن جالعاستىرۋدا ۇستاز قاۋىمى اتقارار مىندەت پەن پارىز وراسان زور.
ەلباسى: «قازىرگى تاڭدا جەكە ادام عانا ەمەس, تۇتاس حالىقتىڭ ءوزى باسەكەلىك قابىلەتىن ارتتىرسا عانا تابىسقا جەتۋگە مۇمكىندىك الادى», – دەپ اتاپ ءوتىپ, الەم ەلدەرىنىڭ الدىڭعى ساپىندا ءجۇرۋ ءۇشىن باسەكەگە قابىلەتتىلىكتىڭ ءبىرىنشى كەزەكتەگى ماسەلە بولاتىنىن ايتتى. ال باسەكەگە قابىلەتتىلىكتى قالىپتاستىرىپ, ونى ۇدايى ارتتىرىپ وتىرۋ ءۇشىن ءبىلىمنىڭ اتقاراتىن ءرولى ايرىقشا زور ەكەنى بەلگىلى. وسى ورايدا وتاندىق جوعارى وقۋ ورىندارى تەك ءبىلىم بەرۋمەن عانا شەكتەلمەي, ولار – ءبىلىم مەن عىلىمدى كاپيتاليزاتسيالاۋداعى نەگىزگى لوكوموتيۆ ءرولىن اتقارۋى ءتيىس.
رەسمي دەرەكتەرگە سۇيەنەر بولساق, بۇگىندە ەلىمىزدەگى جاس عالىمدار سانى 60 پايىزعا ارتتى. جاستارىمىز بولاشاقتىڭ كىلتى ساپالى ءبىلىم مەن عىلىم ەكەنىن ايقىن ءتۇسىنىپ كەلەدى. وركەنيەت كوشىنە بەت بۇرعان قىرۋار ءىستىڭ التىن ارقاۋى بولىپ ەسەپتەلەتىن عىلىمي-تەحنيكالىق جانە ەكونوميكالىق پروگرەستىڭ نەگىزگى قوزعاۋشى كۇشى – ءبىلىم. ءبىلىم بار جەردە دامۋ, جەتىلۋ, كەمەلدەنۋ ءۇردىسى ءبىر ساتكە دە تولاستامايدى. كورنەكتى عالىم, اكادەميك قانىش ساتباەۆ: «عالىمعا ازىق بەرەر قاينار كوزى كىتاپ بەتىمەن, لابوراتوريا اۋماعىمەن عانا شەكتەلمەيدى, ءومىردى تانۋمەن, ەڭبەك ادامىنىڭ جاسامپاز ءىسىن تانۋمەن كەڭ ءورىسىن تابادى» دەگەن ءسوزى بۇگىندە ءوز ومىرشەڭدىگىن ايقىن دالەلدەپ كەلەدى. ەلباسى نۇرسۇلتان نازارباەۆ: «الەم جاھاندانۋ, يننوۆاتسيالار مەن تەحنولوگيالاردىڭ جەدەل دامۋ داۋىرىنە اياق باستى. ء«بىلىم ەكونوميكاسىنا» ءوتۋ ادامزات دامۋىنىڭ جاڭا كەزەڭى بولىپ تابىلادى. جانە قازاقستان بۇل ۇدەرىستەردىڭ شەتىندە, الەمدىك دامۋدىڭ شالعايىندا قالماۋى ءتيىس. ءبىز قازاقستاننىڭ الەمدەگى باسەكەگە قابىلەتتى 30 ەلدىڭ قاتارىنا ەنۋ ۇلتتىق ستراتەگياسىن جۇزەگە اسىرۋعا كىرىستىك جانە الدىمىزعا ساپالىق تۇرعىدان جاڭا ەكونوميكا مەن ادام ءومىرىنىڭ ستاندارتتارىن قالىپتاستىرۋ مىندەتىن قويدىق. ول بارىمىزدەن اسا زور كۇش-جىگەر مەن ءبىلىمدى تالاپ ەتەدى. ءبىز بولاشاعىنان ءۇمىت كۇتتىرەتىن عالىمداردى دايىنداۋعا ەرەكشە نازار اۋداراتىن بولامىز» دەپ, الەمدىك ەكونوميكالىق دامۋ تەندەنتسياسى قازاقستاندىق عالىمداردىڭ الدىنا يننوۆاتسيا تۇرىندەگى ەكونوميكانى قالىپتاستىرۋ مىندەتىن جەتكىزگەن بولاتىن.
ءتورتىنشى ونەركاسىپتىك رەۆوليۋتسيا جاعدايىندا نارىق تالاپتارى وزگەرە باستادى. بارشاڭىزعا بەلگىلى, بۇگىندە الەمدىك جانە وتاندىق جوعارى وقۋ ورىندارى ءداستۇرلى فورماتتاعى وقۋ كۋرستارىنىڭ ماتەريالدارىن ينتەرنەتتە جاريالاپ, قولجەتىمدىلىك دەڭگەيىن ارتتىرۋدا. اتاپ ايتقاندا, «academia.kz», «kitap.kz», «100kitap.kz» سياقتى ءبىلىم بەرۋ پورتالدارىنىڭ باستامالارى ورتا ءبىلىم بەرۋ مەكەمەلەرى, كوللەدجەر مەن ۋنيۆەرسيتەتتەر ءۇشىن ماڭىزى زور. اتالعان جوبالاردى قىزدار ۋنيۆەرسيتەتىنىڭ پروفەسسور-وقىتۋشىلارى وزدەرىنىڭ ينتەللەكتۋالدى جۇمىستارىن كوممەرتسيالاندىرۋ, وتاندىق پەداگوگتاردى قوعام اراسىندا تانىتۋ جانە جالپى ءبىلىم بازاسىن كەڭەيتۋ مۇمكىندىگى رەتىندە باعالاپ وتىر.
تاۋەلسىزدىك جىلدارىندا ەلباسى ءبىلىم بەرۋ سالاسىنا ۇدايى نازار اۋدارىپ كەلەدى. مەملەكەت باسشىسى بيىلعى جىلعى جولداۋىندا دا ءبىلىم بەرۋدىڭ ساپاسىن جاڭا دەڭگەيگە كوتەرۋ تالابىن العا قويدى. بۇگىنگى زاماندا ءبىلىمنىڭ ادامي كاپيتالدىڭ ارتتىرۋدىڭ العىشارتى ەكەنىنە باسىمدىق بەرگەن پرەزيدەنت ءبىلىم بەرۋ جۇيەسىن جاڭا يندۋستريالاندىرۋ تالاپتارىنا بەيىمدەۋ قاجەتتىگىنە نازار اۋداردى.
70-جىلدان استام ۋاقىت ارالىعىندا قازاق مەملەكەتتىك قىزدار پەداگوگيكالىق ۋنيۆەرسيتەتى ۇزدىكسىز پەداگوگ مامان دايارلاۋدىڭ نەگىزگى ورتالىعىنا اينالدى. بۇگىندە بىلىكتى كادرلاردىڭ سانىن ارتتىرۋ ماقساتىندا وقۋ ورنىندا بىرقاتار تىڭ جوبالار قولعا الىنۋدا. ولاردىڭ قاتارىندا پروفەسسور-وقىتۋشىلار مەن ستۋدەنتتەردىڭ تىلدىك بىلىكتىلىگىن ارتتىرۋعا ارنالعان «پوليگلوت» ورتالىعىن, پەداگوگيكالىق-پسيحولوگيالىق تۇزەتۋ كابينەتىن, لاتىن ءالىپبيىن ۇيرەتۋ ورتالىعىن, Co-working پراكتيكالىق-باعىتتاعى وقىتۋ الاڭىن جاساۋدى قامتاماسىز ەتەتىن «اق جول» بالاباقشاسىن اتاپ وتۋگە بولادى. مۇنىڭ بارلىعى دا ويى مەن تانىمى دامىعان, تالانتتى, زەردەلى كادر دايارلاۋعا سەپتىگىن تيگىزەدى دەپ ويلايمىز.
جاڭا مىڭجىلدىقتا ءبىلىمى مەن بىلىگى ۇيلەسكەن مامانداردىڭ ءباسى باسىم بولماق. بۇنى ۋاقىتتىڭ ءوزى ايقىنداپ وتىر. وتاندىق جوعارى وقۋ ورىندارىنىڭ الدىندا وي-ءورىسى دامىعان, تالانتتى, زەردەلى جانە ۇلتجاندى ۇرپاق تاربيەلەۋ مىندەتى تۇر. وسىناۋ اۋقىمدى جاۋاپكەرشىلىكتى ابىرويمەن اتقارۋ پەداگوگتارعا جۇكتەلگەن مارتەبەلى مىندەت. دامۋدىڭ داڭعىل جولىنا باعىت العان بولاشاعى باياندى ەلدىڭ ءورىسى قاشاندا بىلىكتى دە سانالى ۇرپاعىمەن كەڭەيمەك. وسكەلەڭ جاستى ەلىمىزدىڭ تۇتقاسى, قاتارىنىڭ كوشباسشىسى ەتىپ تاربيەلەۋ – عاسىرعا جۋىق ۇزدىكسىز كادر دايارلاپ كەلە جاتقان قىزدار ۋنيۆەرسيتەتىنىڭ باستى باعدارى.
گاۋحار الدامبەرگەنوۆا,
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
