توتەنشە جاعدايلار جونىندەگى دەپارتامەنتتىڭ باسشىسى راميل كامالوۆتىڭ ايتۋىنشا, 127 ەلدى مەكەن, 291 تاسجول ۋچاسكەسى, بىرقاتار كوپىرلەر مەن سۋ توراپتارى سۋ باسۋ ىقتيمالدىعى جوعارى اۋماقتاردا ورنالاسقان.
تاسقىن ورىن العان جاعدايدا ازاماتتىق قورعانىستىڭ 16 قىزمەتى جانە 14 جەدەل ارەكەت ەتۋ جاساعى جەدەل ىسكە كىرىسەتىن بولادى. ولاردىڭ قاراماعىندا 1359 ادام, 1170 تەحنيكا بىرلىگى, ونىڭ ىشىندە 350 سۋ سورعىش تەحنيكالارى مەن 79 ءجۇزۋ قۇرالدارى بار. قۇم سالىنعان 17 مىڭ قاپشىق, 6390 توننا ساز بالشىق, 13013 توننا قيىرشىق تاس, 72 مىڭ توننا ينەرتتى ماتەريال, 114 توننا جانار-جاعارماي دايىندالعان. الايدا باس قۇتقارۋشىنىڭ «موتوپومپالار تولىق پا؟» دەگەن سۇراققا ءبارى جۇمىس ىستەسە جەتكىلىكتى, قارعىن سۋ كەلگەنشە تەكسەرەمىز دەگەن جاۋابى تاڭعالدىرماي قويمايدى. ايماق باسشىسى قۇمار اقساقالوۆ ونىڭ ەسىنە قايىق, تاعى باسقا ءجۇزۋ قۇرالدارىنىڭ تاپشىلىعىن ەسكە سالدى.
قار سۋىنىڭ قورى جىلدىق كورسەتكىشتەن از ەكەن دەپ بوساڭسۋعا, ارقانى كەڭگە سالۋعا بولمايدى. ويتكەنى قاڭتاردا اقىرعان اياز اپشىنى قۋىرىپ, جەردىڭ ۇستىڭگى قاباتى 1-1,5 مەترگە دەيىن توڭ بولىپ قاتىپ قالعان. كۇن كۇرت جىلىسا, جەرگە ءسىڭىپ ۇلگىرمەيتىن قارعىن سۋدىڭ قايدا بەت الارىن بولجاۋ وڭاي ەمەس. ونىڭ ۇستىنە جەرگىلىكتى سينوپتيكتەردىڭ ايتۋلارى بويىنشا, كوكتەمدە جاۋىن-شاشىن جيىلەپ, ىلعال شامادان تىس تۇسەتىن سىڭايى بار.
وسى سەبەپتى قۇرىلىمنىڭ باستى كۇشى ءۇش نەگىزگى ايماققا باعىتتالماق. ەسىل وزەنى ارناسىنان سىيماي تاسيتىن بولسا, 30 اۋىل جاپا شەگۋى ىقتيمال. اقمولا وبلىسى اۋماعىندا ورنالاسقان سىلەتى جانە شاعالالى سۋ قويمالارىنان ارتىق سۋ جىبەرىلسە, ءۋاليحانوۆ اۋدانىنىڭ قۋلىكول, بەرەكە, قاراتال, ال تايىنشا اۋدانىنىڭ بىرلىك, زارەچنوە اۋىلدارىن ۇلكەن الەككە سالۋى مۇمكىن.
جەرگىلىكتى سۋ قويمالارى مەن گيدروقۇرىلعىلاردىڭ دايىندىعىنا دا ايرىقشا نازار اۋدارماي بولمايدى. جالپى سىيىمدىلىعى 693 ميلليون تەكشە مەتردى قۇرايتىن سەرگەەۆكا سۋ قويماسىندا سۋ قورى 90 پايىزعا جەتكەن. مۇندا كەمى 1 ميلليارد تەكشە مەتر سۋ جينالادى دەپ كۇتىلۋدە. جاعداي تۇراقتى سانالعانىمەن, ول جاقتان سۋ جىبەرىلسە, وبلىس ورتالىعىنا تونەتىن قاتەردىڭ ەسەلەنە تۇسەرى انىق.
پەتروپاۆل سۋ قويماسى دا كۇن وتكەن سايىن تولىعىپ كەلەدى. شارىقتاعى سۋ تورابى اپاتتى دەپ تانىلعانمەن كۇردەلى جوندەۋ كەلەسى جىلعا قالدىرىلعان. وسى ۋچاسكە – ەڭ وسال تۇستاردىڭ ءبىرى. شارىق, جەمباراق وزەندەرى ع. مۇسىرەپوۆ اۋدانىن تالاي رەت ابىگەرگە ءتۇسىرىپ, مال-جاندى تىعىرىققا تىرەگەن. بىلتىر تاسقىن قاۋپى بار جەرلەرگە سۋ وتكىزۋ قۇبىرلارىن سالۋ, بوگەتتەر تۇرعىزۋ, باسقا دا قورعانىس جۇمىستارىنا 3 ميلليارد تەڭگە جۇمسالعانىمەن, ەسىل اۋدانىنداعى ۇلكەن, كىشى توراڭعۇل كولدەرىنەن تونەتىن قاۋىپ از ەمەس. كولدەر ارناسىنان اساتىن بولسا, بىرقاتار ەلدى مەكەندەردى قىزىل سۋ شايىپ كەتۋى مۇمكىن. سۋ اعاتىن كانالدار تازارتىلعانىمەن, بوگەت سالىنعانىمەن, اتقارىلاتىن شارۋالار ءالى دە جەتكىلىكتى.
شال اقىن, تايىنشا, ع. مۇسىرەپوۆ جانە قىزىلجار اۋداندارى مەن پەتروپاۆل قالاسى سۋ باسۋ ىقتيمالدىعى جوعارى ايماقتارعا جاتقىزىلىپ وتىر. قىزىلجارا اۋدانىندا 19 ەلدى مەكەندى سۋ باسۋ قاۋپى بار. سوندىقتان ساقتىق جۇمىستارىن باسەڭدەتپەۋ, جولدارداعى سۋوتكىزگىش قۇرىلعىلاردى رەتتەۋ, سۋ دەڭگەيىن ۇنەمى باقىلاۋدا ۇستاۋ, ەۆاكۋاتسيالاۋ بەكەتتەرىن قۇرۋ, شتابتىڭ جۇيەلى جۇمىس ىستەۋىن قامتاماسىز ەتۋ قالا, اۋدان اكىمدەرى مەن توتەنشە جاعدايلار قىزمەتىنىڭ باستى مىندەتى سانالۋى ءتيىس.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
