باق وكىلدەرىنە بەرگەن ءبىر سۇحباتىندا ء«وزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆا: ء«اربىر ادام بويىنداعى قابىلەتتەردىڭ بارلىعىن پايدالانا وتىرىپ, تەك تۋعان ەلىنە عانا ەمەس, جەر بەتىندەگى بارشا ادامزاتقا پايداسى مەن شاپاعاتىن تيگىزۋدى كوزدەۋگە ءتيىس. قوعامداعى رۋحاني جانە ادامگەرشىلىك قۇندىلىقتاردى ءبىلىم ارقىلى جانداندىرعان ءجون. دۇرىس ۇيىمداستىرىلعان ءبىلىم سونداي قۇندىلىقتاردان تۇراتىنىن دا ەستەن شىعارماعان ابزال. تەك ءبىلىم ارقىلى عانا ءبىز قوعامداعى رۋحاني بايلىقتى قالىپتاستىرىپ, ءار ادامنىڭ بويىنداعى ەرەكشە قاسيەتتەردى تانىپ, يگى ىستەردى جۇزەگە اسىرامىز», – دەگەن ەدى.
الماتىدا وتكەن «سۇيىسپەنشىلىك ساباقتارى» كوپشىلىكتىڭ كوڭىلىنەن شىققان سول باستامالاردىڭ جالعاسى ىسپەتتەس. ۇنەمى يگى ىستەردىڭ باسى-قاسىندا جۇرەتىن س.نازارباەۆا حانىم ۇستازدار, مۇعالىمدەر, وقۋشىلار جانە تۇلەكتەرمەن ءجيى-ءجيى كەزدەسىپ تۇرۋدى جاقسى ءبىر داستۇرگە اينالدىرعان. بۇل جولى ەلىمىزدىڭ ءبىرىنشى حانىمى ء«وزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسى بويىنشا بىلىكتىلىگىن ارتتىرۋ ماقساتىندا رەسپۋبليكامىزدىڭ ءار وڭىرىنەن «بوبەك» ورتالىعىنا ارنايى كەلگەن مۇعالىمدەرمەن جۇزدەستى.
باعدارلاما اۆتورى الەمدەگى رۋحانيات, ادامگەرشىلىك قۇندىلىقتار مەن يماندىلىق, ادام مەن قوعام, تابيعاتتىڭ تىلسىم كۇشى جانە باسقا دا وزەكتى ماسەلەلەر توڭىرەگىندە تارتىمدى اڭىمەلەردىڭ تيەگىن اعىتتى. بالانىڭ جەكە تۇلعا رەتىندە قالىپتاسۋىنداعى اتا-انا مەن مۇعالىمدەردىڭ اتقاراتىن رولىنە ايرىقشا توقتالدى.
ەلىمىزدىڭ ءار وڭىرىنەن جينالعان ۇستازدار قاۋىمى ءوز كەزەگىندە سارا الپىسقىزىنا سان الۋان ساۋالدار جولداپ, بىرقاتار وزەكتى ماسەلەلەر بويىنشا ويلارىن ورتاعا سالىپ, پىكىر ءبولىستى.
ەستەرىڭىزگە سالا كەتەيىك, سارا نازارباەۆا حانىمنىڭ باستاماسىمەن دۇنيەگە كەلگەن ء«وزىن ءوزى تانۋ» باعدارلاماسىنىڭ باستى ماقساتى – ادامنىڭ ىشكى الەۋەتىن اشۋ ارقىلى ونىڭ رۋحاني قۇندىلىقتارىنىڭ قالىپتاسۋىنا كومەكتەسۋ, جوعارى ادامگەرشىلىك قاسيەتتەرىن تاربيەلەۋ, ومىرلىك ماڭىزى زور ىسكەرلىكتەرى مەن داعدىلارىن دامىتۋ.
ال ء«وزىن ءوزى تانۋ» ءپانى 2010 جىلدىڭ 1 قىركۇيەگىنەن باستاپ قازاقستان رەسپۋبليكاسىنىڭ ۇزدىكسىز ءبىلىم بەرۋ جۇيەسىنە ەنگىزىلگەن بولاتىن.
عالىم سۇلەيمەن,
«ەگەمەن قازاقستان»
