ەلباسىنىڭ ماقالاسىندا كورسەتىلگەن باستى باعىتتار بويىنشا شارالار اتقارىلىپ, ءتۇرلى جوبالار بويىنشا ءبىر جىل بويىنا اتقارىلعان جۇمىستاردىڭ قورىتىندىلارى جاريالانعان. قسزي جۋرنالدارىنىڭ اعىمداعى جىلعى ءبىرىنشى ساندارى ءوز وقىرماندارىن رۋحتى جانە جاۋاپكەرشىلىگى جوعارى ءبىرتۇتاس ۇلتتى قالىپتاستىرۋعا ىقپال ەتەتىن قوعامدىق سانانى جاڭعىرتۋدىڭ ماڭىزدى باعىتتارىمەن تانىستىرادى.
«كازاحستان-سپەكتر» جۋرنالىنىڭ باس رەداكتورى ءمادينا نۇرعاليقىزى جۋرنالدىڭ وسى سيپاتتاعى سانىن جاساۋ يدەياسى وتكەن جىلدىڭ سوڭىندا پايدا بولعانىن ايتتى. «جالپى جۋرنال ءنومىرى تولىعىمەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا ارنالعان. الەۋمەتتىك ساۋالدامالار جۇرگىزىپ, ساراپشىلارىمىز ءبىر جىلعى جۇمىستىڭ عىلىمي-پراكتيكالىق قورىتىندىسىن جاسادى», دەدى ءمادينا نۇرعاليقىزى. ءبىر جىل ۋاقىت وتكەندە جوبالاردى ىسكە اسىرۋ تيىمدىلىگى مەن دەڭگەيىن, بەلگىلى ءبىر ناتيجەلەرىن باعالاۋ مۇمكىن بولىپ وتىر. «كازاحستان-سپەكتر» جۋرنالىندا تەوريالىق جانە ادىستەمەلىك ماقالالارمەن قاتار جوبالار تۋرالى ناقتى مالىمەتتەر, كوپشىلىك جانە ساراپتامالىق ساۋالدامالار ناتيجەلەرى بار.
رۋحاني جاڭعىرۋ –جاھاندىق ءۇردىس. ءارتۇرلى مەملەكەتتەردە قوعامدىق سانانى جاڭعىرتۋ وزىندىك ەرەكشەلىكتەردى ەسكەرە وتىرىپ, بەلگىلى ءبىر نىساندا جۇزەگە اسادى. ماقالالاردا الەمدىك تاجىربيەنىڭ, سونداي-اق قازاقستانداعى رۋحاني جاڭعىرۋ باستامالارىنىڭ اۋقىمى مەن ەرەكشەلىگى تالدانعان. مىسالى «رۋحاني جاڭعىرۋ: تابىستى قوعامنىڭ الەۋمەتتىك ينجەنەرياسى» اتتى ماقالادا ۇلتتىق مەنتاليتەتتى جاڭعىرتۋ بويىنشا لي كۋان يۋ باستاماسىمەن جۇزەگە اسقان «سينگاپۋر كەرەمەتى», ەۋروپالىق تاجىربيە – ءۇش قاراپايىم قاعيدا: «كۇشتى اتقارۋشى, «ۇلتتىق ۇلىلىق» پەن الەۋمەتتىك-ەكونوميكالىق سالاداعى «ديريجيزم» يدەيالارىنا نەگىزدەلگەن شارل دە گوللدىڭ مەملەكەتتىك قۇرىلىس ۇلگىسى, ۇندىستانداعى ماحاتما گانديدىڭ ساتياگراحا يدەولوگياسى جانە باسقا مەملەكەتتىك ۇستانىمدارى تالقىلانعان.
«قوعام جانە ءداۋىر» جۋرنالىنىڭ باس رەداكتورى الۋا جولدىبالينا ءوز سوزىندە قوعامدىق سانانى جاڭعىرتۋ جوباسىنىڭ عىلىمي-زەرتتەۋ قىزمەتىنىڭ شەڭبەرىندە «رۋحاني جاڭعىرۋ» جوباسىن جۇزەگە اسىرۋ بارىسىنا توقتالدى. «100 جاڭا ەسىم» جانە زاماناۋي الەمدەگى قازاقستاندىق مادەنيەت سەكىلدى جوبالارعا قاتىستى ماقالالارعا شولۋ جاسادى. مىسالى «قازاقستاننىڭ باستامالارى: ادامي كاپيتالدىڭ الەۋمەتتىك مادەني برەندينگى» ماقالاسى «قازاقستانداعى 100 جاڭا ەسىم» جوباسىنىڭ اياسىندا مەملەكەت پەن قوعامنىڭ ءوزارا سەنىمدى بايلانىس ورناتۋى ارقىلى ادامي كاپيتالدى برەندتەۋ ادىستەرىن زەرتتەۋگە باعىتتالعان. «رۋحاني جاڭعىرۋ فورماتىنداعى مادەنيەت» اتتى ماقالادا وقىرماندار قازاقستاننىڭ مادەني مۇراسىن تسيفرلاندىرۋدىڭ العاشقى قورىتىندىلارىمەن تانىسا الادى. ساندىق يننوۆاتسيالار ەنگىزۋ جانە مادەني مۇرالارعا تۇرعىنداردىڭ قولجەتىمدىلىگىن قامتاسىز ەتۋ ارقىلى جوعارى ساپالى مادەني قۇندىلىقتاردى ساقتاۋ جانە ناسيحاتتاۋ ەلىمىز ءۇشىن ماڭىزدى.
جيىندا ءسوز العان جۋرنال اۆتورلارى دا «بولاشاققا باعدار: رۋحاني جاڭعىرۋ» باعدارلامالىق ماقالاسى مەن جۋرنالداردىڭ ارنايى باسىلىمدارى تۋرالى پىكىرلەرىن ورتاعا سالىپ, رۋحاني جاڭعىرۋ كەزەڭىندە عىلىمي پايىمدار مەن تۇجىرىمداردىڭ ماڭىزدىلىعىن اتاپ ءوتتى.
باعاشار تۇرسىنباي ۇلى,
«ەگەمەن قازاقستان»
