رۋحاني جيىندا بەلگىلى تەولوگ م.سەباسوۆ ارتىندا عىلىم قالدىرعان بىردەن-ءبىر ءدىنباسى, ءارى ۇستاز, ءارى دارىگەر ەرجان حازىرەتتىڭ ازاماتتىق بولمىسى, ەرەن ەڭبەگى تۋرالى بايانداما جاسادى.
– ەرجان تولەگەن ۇلىنىڭ ءبىرىنشى ەرەكشەلىگى – ءدىن مەن ءدىن وكىلدەرىن قۋدالاعان كەڭەستىك كەزەڭنىڭ وزىندە ءداستۇرلى ءدىننىڭ التىن شىنجىرىن ۇزبەي تاۋەلسىز ۇرپاققا جالعاستىرىپ كەتۋشى دانەكەر. ەكىنشى ەرەكشەلىگى – سوڭىندا حاتتالعان مۇرا قالعان تۇلعا. ول حالىققا تاربيەنى, ونەگەنى تەك سوزبەن ەمەس, ءوزىنىڭ ءجۇرىس-تۇرىسىمەن, بولمىسىمەن كورسەتىپ كەتتى. ءتىپتى ءوزىن ءتورت رەت سوتتاعان وكىمەت تۋرالى ءبىر اۋىز ءسوز تەرىس اڭگىمە ايتپاي, «وكىمەتتىڭ زاڭىنا باعىنۋ – ءۋاجىپ» دەپ حالىققا ناسيحاتىن ايتا ءجۇرىپ, رۋحاني تاربيەسىن بەرىپ كەتكەن ءدىندار, دەپ توقتالدى م.سەباسوۆ حازىرەت تۋرالى.
كەشەگە دەيىن كوزدەن تاسا بولىپ كەلگەن قوس قولجازبانىڭ – بۇگىنگى حالقىمەن قايتا قاۋىشقان قوس كىتاپتىڭ تۇساۋىن كەسكەن سەرىكباي قاجى وراز ۇلى دا ەرجان حازىرەتتىڭ قوس ەڭبەگى تۋرالى تۇششىمدى پىكىرلەرىن ايتىپ, جوعارى باعالادى.
– ەرجان حازىرەتتىڭ بۇل ەڭبەكتەرى, ۇلى مۇراسى ءبىزدىڭ قانداي مەكتەپتى ۇستانعاندىعىمىزدى ايقىندايدى. قوس كىتاپتا ءبىزدىڭ جاماعاتقا بەرەتىن جەتكىلىكتى ءىلىم بار. ءبىز جاماعاتىمىزدى بىرىزدىلىككە الىپ كەلۋىمىز كەرەك. بۇيرىق بولعان پارىزداردىڭ بارلىعىن ساناپ, بەسەۋى يسلامدا, جەتەۋى يماندا, ون ەكىسى نامازدا, تورتەۋى دارەتتە, ۇشەۋى تاياممۋمدا دەپ ءارى قاراي ساناپ وتىرىپ, ءبىر-اق اۋىز سوزبەن ءتۇسىندىرىپ ايتا العان. وسى كىتاپتاردىڭ اۆتورى, يەسى ەرجان حازىرەتتىڭ ەڭبەگى, اسىرەسە «وسيەتنامادا» ءبىز ءۇشىن, ءتىپتى ءدىندارلار ءۇشىن اتا-بابامىزدان كەلە جاتقان ءدىننىڭ, ءىلىمنىڭ تازا, ساف قالپىن ساقتاعان, ادامنىڭ بويىنداعى ءناپسىسىن جۇگەندەي العان, جان دۇنيەسىن كەڭ, كوپشىل بولا الاتىن, جالپى ادامنىڭ قالپىن قالىپتاستىراتىن ءدۇنيا وسى كىتاپتاردا ايتىلعان ەكەن. قوس كىتاپ ەل-حالقىمىز ءۇشىن, مۇسىلمان جۇرتشىلىعى ءۇشىن باعدارشام رەتىندە يگىلىك-پايداعا اسا بەرسىن, دەپ قولجازبانىڭ ۇرپاق, ۇلت تاربيەسىندەگى الار ورنىن ايقىنداپ بەردى.
جيىنعا حازىرەتتىڭ قىزى – 83 جاستاعى نەسىپحان اجە قىزىلساي اۋىلىنان ارنايى كەلىپ قاتىسىپ, يگى ءىستىڭ ۇيىتقىسى بولىپ جۇرگەندەرگە العىسىن جەتكىزدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
