جۇرت الدىنداعى پارىزىن قالتقىسىز وتەپ جۇرگەن ىسكەر ادامدارعا دەگەن قۇرمەتتىڭ دە ەرەكشە بولاتىنىن مەملەكەت باسشىسى تۇيىندەپ ايتقان-دى. دەمەك, وسى لەكتە ءبىز ەل ىشىنە سۇيكىمدى جاندار جايلى جازۋعا مىندەتتىمىز.
...باۋىرجان وسپانوۆ ەسىمىن قازىر ايگىلەۋدىڭ قاجەتى از. قازاقستانداعى تابىسى زور ادامداردىڭ كوشىن باستاعان كاسىپكەر. جانە بۇل كىسى ءوزىنىڭ تۋعان جەرىنە دەگەن شەكسىز قۇرمەتى پەن قامقورلىعى ءۇشىن ايالاۋعا تۇراتىن ادام. قازىر وسپانوۆ تۋعان جىلاندى اۋىلىنىڭ اتى جەرۇيىق جەتىسۋ, جالپاق قازاقستاننان اسىپ, الەمگە ايگىلى بولىپ كەتتى. جانە بۇل داڭق كاسىپكەردىڭ ەسىمىمەن بايلانىستى ەمەس, كەرىسىنشە شالعاي اۋىلداعى شاعىن مەكتەپتىڭ وقۋشىلارىنىڭ جەتىستىگى ارقىلى كەلىپ جاتىر.
وسىدان ءبىراز جىل بۇرىن باۋىرجان وسپانوۆ تۋعان اۋىلىندا فيزيكا-ماتەماتيكا باعىتىندا تەرەڭدەتىپ ءبىلىم بەرەتىن مەكتەپ-ينتەرنات سالىپ بەرگەن بولاتىن. بالالىق شاعىندا ءوزى دە وسىنداي مەكتەپتە وقىعان ەدى. ۇزدىك وقىعانى تاعى بار. جەتىستىككە جەتۋىنىڭ نەگىزى سول العان بىلىمىندە جاتىر. سودان با, قازىر ۇنەمى ىزدەنىسكە قۇمار, توپ جارۋعا تالپىناتىن جاستاردى جيناپ, قولداۋ جاساۋعا دايىن تۇراتىنى. وسى ويمەن ايماقتاعى دارىندى بالالاردى ىرىكتەپ الىپ, الاڭسىز ءبىلىم الۋى ءۇشىن جاعداي جاساۋعا بەل بۋدى. اۋىلدا ءبىر كەزدەرى وزىنە ءبىلىم بەرگەن العىر ۇستازدارىنىڭ الدىنا مىندەت قويدى. سىرتتان ماقساتىنا ادال مۇعالىمدەردى ىزدەپ تاۋىپ, جۇمىسقا شاقىردى. ولاردى ءۇي-جاي, جالاقىمەن قامتىدى. بارلىعىنىڭ الدىنا جالعىز ماقسات قويدى: ۇزدىك شاكىرت تاربيەلەۋ! مەتسەناتتىڭ تالابى قازىر تولىق ورىندالعان سياقتى.
– قازاقتىڭ بالاسى ەشكىمنەن كەم بولماۋى كەرەك. اسىرەسە دارىندى, ىلىمگە قۇشتار ورەن الاڭسىز ءوسىپ, تەك قانا وقۋعا ىنتالى بولۋى ءتيىس. جىلاندىداعى مەكتەپتە قازىر بالا قابىلەتىنىڭ دامۋىنا بارلىق جاعداي بار. جۇرت ءسۇيسىنىپ جاتىر. بىردە اتىراۋداعى وليمپياداعا بارعان ءبىزدىڭ بالالار ايتىپ كەلدى. ولاردىڭ قۇراستىرعان روبوتتارىن كورگەن وبلىس اكىمىنىڭ ورىنباسارى قاتتى تاڭدانىپتى. شىنىندا, وبلىستان ءارى, قالادان تىم شالعايداعى جىلاندىداعى مەكتەپتەن قازىرگى زامانعى وزىق تەحنولوگيامەن باسقارىلاتىن روبوت جاساۋشىلار كەلدى دەپ كىم ويلاعان, ءارى بايگەنى شاپپاي بەر دەپ تۇرسا, دەيدى مەتسانات ريزاشىلىعىن جاسىرا الماي.
قازىر جىلاندى اۋىلىنداعى دارىندى بالالارعا ارنالعان مەكتەپ- ينتەرناتتا ءتورت جۇزگە جۋىق بالا ءبىلىم الىپ جاتىر. وقۋشىلاردىڭ قاتارىن كوبەيتىپ, 500 ورىندىق ەتسەم دەگەن ويى بار ەكەن وسپانوۆتىڭ جانە رەسپۋبليكانىڭ تۇكپىر-تۇكپىرىنەن تالانتتى وقۋشىلاردى تاڭداپ الماق نيەتتە. ءبىر كەرەمەتى, بۇل مەكتەپتىڭ وقۋشىلارىنا ەلىمىزدەگى ايتۋلى جوعارى وقۋ ورىندارى ءجيى «قۇدا تۇسەدى» ەكەن. ءبىلىم ساپاسىنىڭ كۇشتىلىگىنە كوز جەتكىزگەن رەكتورلار جىلاندى مەكتەپ-ينتەرناتىنىڭ تۇلەكتەرىنە تەگىن گرانت بەرۋگە دايىن. ءتىپتى ينتەرنات تۇلەكتەرى ماسكەۋ مەملەكەتتىك ۋنيۆەرسيتەتىنە شاقىرتۋ الىپ وتىر.
ايتپاقشى, بۇل مەكتەپ-ينتەرنات باۋىرجان وسپانوۆتىڭ تۋعان جەرىندە شاڭىراق كوتەرگەن جالعىز وقۋ ورىنى ەمەس. كاسىپكەر لەپسى اۋىلىنان جاس سپورتشىلارعا ارناپ تاعى ءبىر مەكتەپ اشتى. جاسوپىرىمدەردى سپورتتىڭ وليمپيادالىق تۇرلەرىنە باۋليتىن ينتەرناتتا قازىر ەلىمىزدىڭ جەر-جەرىنەن جينالعان بولاشاق ساڭلاقتار تاربيەلەنىپ جاتىر. 750 بالاعا ارنالعان مەكتەپتە بارلىق جاعداي بار.
– ادامنىڭ العا باسۋى ءۇشىن تەرەڭ ءبىلىم, سالاماتتى ءومىر سالتى كەرەك. مەنىڭ مەكتەپتەرىمدە وسى قاعيدا قاتاڭ ساقتالادى. وقۋشىلارعا «ەلدىڭ اتىن شىعاراتىن ەر بولىپ ءوسۋ سەندەردىڭ مىندەتتەرىڭ, سەندەرگە جاعداي جاساپ, ەشكىمنەن كەم قىلماي تاربيەلەۋ مەنىڭ جۇمىسىم» دەگەندى ايتىپ وتىرامىن. قازاقتىڭ مارتەبەسى ءوسىپ جاتسا, وعان مەنىڭ تامشىداي ۇلەسىم بولسا, ادام ءۇشىن باسقا باقىتتىڭ كەرەگى نە؟ – دەيدى مەتسانات باۋىرجان وسپانوۆ.
بۇل مىسالدا ءبىز باۋىرجان وسپانوۆتىڭ تۋعان اۋىلىندا اشقان قوس مەكتەپ ينتەرناتى جايلى عانا تام-تۇمداپ ايتقان بولدىق. ءالى قيراعان اۋىلدى از عانا ۋاقىت اراسىندا گۇلدەندىرىپ, شاتقاياقتاعان شارۋاشىلىقتى اياعىنان قالاي تىك تۇرعىزعانى جايلى بولەك اڭگىمە بار. وعان ءالى ورالامىز.
قالماحانبەت مۇقامەتقالي,
«ەگەمەن قازاقستان»
الماتى وبلىسى
