الەمدە كورپوراتسيالار مەن بيزنەس-قۇرىلىمداردىڭ الەۋمەتتىك جاۋاپكەرشىلىگىن ارتتىرۋعا ءداستۇرلى تۇردە ۇلكەن كوڭىل بولىنەدى. الەۋمەتتىك جاۋاپكەرشىلىك مادەنيەتىن قالىپتاستىرۋدا جوو-لاردىڭ دا اتقارار ءرولى زور. ۋنيۆەرسيتەتتەر ءبىلىم بەرۋ قىزمەتى جانە عىلىمي زەرتتەمەلەر تۇرىندە قوعامدىق يگىلىكتەردى قۇرىپ قانا قويماي, قوعامداعى الەۋمەتتىك مىنەز-ق ۇلىق ەرەجەسىنىڭ قاينار كوزى بولىپ تابىلادى. زاماناۋي جوعارى وقۋ ورنىنىڭ مىندەتى بىلىكتى ماماندار دايارلاۋمەن شەكتەلمەيدى, بۇگىندە ول قوعام الدىنداعى الەۋمەتتىك جاۋاپكەرشىلىكپەن تولىعۋى ءتيىس.
بۇل پاراديگما جەتەكشى ۋنيۆەرسيتەتتەردى ادامزاتتىڭ اسا وزەكتى جانە قاۋىرت ماسەلەلەرىن شەشۋدەگى جوو-لاردىڭ الەۋمەتتىك ءرولىن نىعايتۋ ءۇشىن بىرىگىپ, كونسورتسيۋم قۇرۋعا يتەرمەلەدى. USRN قىزمەتى زاماناۋي وركەنيەتتىڭ بولاشاعى ءۇشىن جوو-لاردىڭ الەۋمەتتىك جاۋاپكەرشىلىگىن ورىنداۋدا مۇشە-ۋنيۆەرسيتەتتەردىڭ ءتيىمدى ءوزارا ارەكەتتەسۋ تۇعىرناماسىن قۇرۋعا باعىتتالعان.
سان-پاۋلۋ ۋنيۆەرسيتەتىندە وتكەن USRN ارنايى كونفەرەنتسياسىندا ايتۋلى ۇيىم مۇشەلەرى قازاقستاندىق جەتەكشى ۋنيۆەرسيتەتتى مۇشەلىككە قابىلداۋ تۋرالى شەشىمدى ءبىراۋىزدان قابىلدادى.
كونفەرەنتسيادا قازۇۋ-دىڭ بۇۇ تۇراقتى دامۋ بويىنشا «اكادەميالىق ىقپال» باعدارلاماسىنىڭ جاھاندىق حابى رەتىندەگى تاجىريبەسى كەڭىنەن تانىستىرىلدى. قازۇۋ ۇسىنعان جوعارى وقۋ ورىندارى دامۋىنىڭ جاڭا تۇعىرناماسى – 4.0 ۋنيۆەرسيتەت ۇلگىسى ۇيىم مۇشەلەرىنىڭ ۇلكەن قىزىعۋشىلىعىن تۋدىردى. بۇل مودەلدى جۇزەگە اسىرۋدا قوعامدىق سانانى جاڭعىرتۋعا ارنالعان «رۋحاني جاڭعىرۋ» باعدارلاماسى باستى باعدار بولىپ تابىلادى. ول ءتورت قۇرامداس بولىكتەن تۇرادى: ءبىلىم بەرۋ, زەرتتەۋ, يننوۆاتسيالىق-كاسىپكەرلىك جانە رۋحاني-ادامگەرشىلىك.
بۇگىنگى كۇنى 4.0 ۋنيۆەرسيتەت ۇلگىسى نەگىزىن يننوۆاتسيالىق-تەحنولوگيالىق جانە رۋحاني-ادامگەرشىلىك تۇعىرناما ۇندەستىگى قۇرايتىن «Al-Farabi University smart city» جوباسىندا ىسكە اسىرىلۋدا.
ارمان وكتيابر,
«ەگەمەن قازاقستان»
الماتى
