«وتەللو» تراگەدياسىنىڭ – ۋ.شەكسپير شىعارماشىلىعىنان الار ورنى ايرىقشا. شىم-شىتىرىق قايشىلىققا قۇرىلعان كۇردەلى دراماتۋرگيانى يەگەرۋ – قاي كەزدە دە اكتەرلەر ءۇشىن ۇلكەن مەكتەپ ءھام اسا زور جاۋاپكەرشىلىك بولعان. شىعارما سول تۇعىرىنان تيتتەي دە تۇسكەن جوق. ءالى دە قۇندى, ءالى دە وزەكتى, ءالى دە قىزىقتى. قازاق تەاتر ساحناسىندا ەلۋباي ومىرزاقوۆ, قاپان بادىروۆ, شاكەن ايمانوۆتار كەسكىندەگەن وتەللو بەينەسىن بۇگىندە ءداستۇر ساباقتاستىعىن ۇزبەي, ابىرويلى جالعاپ كەلە جاتقان تەاتردىڭ بەلدى اكتەرى, قازاقستاننىڭ ەڭبەك سىڭىرگەن قايراتكەرى قۋاندىق قىستىقباەۆ, دەزدەمونا بەينەسىن نازىكتىگى مەن سۇلۋلىعى ءبىر ارنادا توعىسقان جاس اكتريسا اقمارال تاناباەۆا كەسكىندەدى.
ياگو بەينەسى قازاقستاننىڭ ەڭبەك سىڭىرگەن قايراتكەرى نۇركەن وتەۋىلوۆتىڭ ساراپتاۋىندا بەينەلىلىك بيىگىنەن كورىندى. قازاقستاننىڭ حالىق ءارتىسى تىلەكتەس مەيراموۆ برابانتسيو ءرولى ارقىلى اكتەرلىك ونەردىڭ تاعىلىمىن تانىتتى.
استانالىق قاللەكي تەاترىنىڭ ۇزدىك اكتەرلەرى مەن كاسىبي ماماندارى تارتىلعان قويىلىم تەاتر ۇجىمى ءۇشىن دە, كورەرمەن ءۇشىن دە شىن مانىندە رۋحاني مەرەكەگە اينالدى. م.اۋەزوۆتىڭ قازاقى قۇنارعا باي بەينەلى تىلىندە ءۇن قاتقان شەكسپير جاۋھارى ەلوردالىق كورەرمەننىڭ كوڭىلىنە بەرىك بەكىپ, ونەر وقيعاسىن تاماشالاۋعا جيىلعان جۇرت ريزا بولىپ تارقاستى.
نازەركە جۇماباي,
«ەگەمەن قازاقستان»
