وڭىردەگى جوعارى جانە ورتا ارناۋلى وقۋ ورىندارىنىڭ باسشىلارى باس قوسقان جيىندا «قازاقستاندىق مەملەكەتتىك - جەكەمەنشىك ارىپتەستىك ورتالىعى» اق باسقارما توراعاسىنىڭ ورىنباسارى تالعات ماتاەۆ ستۋدەنتتەر ءۇيىنىڭ جوباسى, ونىڭ ورىندالۋ بارىسى قاعازعا تۇسىرىلگەنىن, ەندى ونى ويلاسىپ بىرگە ءپىسىرۋ قاجەتتىگىن جەتكىزدى. جوبا ەلباسىنىڭ «پرەزيدەنتتىڭ بەس الەۋمەتتىك باستاماسىن» جۇزەگە اسىرۋ اياسىندا جاسالىپ وتىر. مەملەكەت باسشىسى حالىققا ۇندەۋىندە جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى وتە وزەكتى ەكەنىن ايتا كەلە, 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرعان بولاتىن.
مەملەكەتتىك – جەكەمەنشىك ارىپتەستىك تەتىگى اياسىندا سالىناتىن ستۋدەنتتەر ءۇيى حالىقارالىق ستاندارتتارعا جاۋاپ بەرەتىن جاتاقحانا بولادى. جوبامەن تانىسىپ شىققان وقۋ ورىن باسشىلارى بىرقاتار ۇسىنىس پىكىرلەرىن ورتاعا سالىپ, سوڭعى ۇلگىدە سالىناتىن جاتاقحانالارعا تولەنەتىن اقىسىنا الاڭداۋشىلىق ءبىلدىردى. ياعني, ستۋدەنتتىڭ قالتاسى كوتەرمەيتىن بولسا, ولار پاتەر جالداپ تۇرۋدى تاڭدايدى. كونتسەپتسيانى بەكىتەر كەزدە جيىندا ايتىلعان وسى سىندى باسقا دا ماسەلەلەر ەسكەرىلمەك.
جالپى وبلىستا مەملەكەتتىك-جەكەمەنشىك ارىپتەستىك تەتىگى ارقىلى جالپى 59 جوبانى ىسكە اسىرۋ جوسپارلانعان. ونىڭ ىشىندە, قۇنى 12,3 ملرد. تەڭگەگە 22 جوباعا جەكە ارىپتەس انىقتالىپ, كەلىسىم-شارت ءتۇزىلدى جانە 28,5 ملرد.تەڭگەگە مەملەكەتتىك مىندەتتەمە الىندى.
ەركىن دوسىمباي,
وڭتۇستىك قازاقستان وبلىسى
