«نۇر وتان» پارتياسى ەلباسى, پارتيا توراعاسىنىڭ تاپسىرماسىمەن مۇمكىندىگى شەكتەۋلى جاندارعا ۇنەمى جان-جاقتى قولداۋ كورسەتىپ كەلەدى. وسى باعىتتا ارنايى «كەدەرگىسىز كەلەشەك» پارتيالىق جوباسى دا جۇمىس ىستەيدى.
ەلورداداعى الەۋمەتتىك نىسانداردىڭ جۇمىسىمەن تانىسقان «نۇر وتان» پارتياسى توراعاسىنىڭ ءبىرىنشى ورىنباسارى الدىمەن «نۇرلى جۇرەك» الەۋمەتتىك قىزمەت كورسەتۋ ورتالىعىنا باردى. بۇگىندە مۇندا 3-18 جاس ارالىعىنداعى 260 بالا مەن ءجاسوسپىرىم الەۋمەتتىك بەيىمدەلۋ جانە وڭالتۋ باعىتىندا ەم-دوم قابىلداۋدا. ورتالىقتا بالالارمەن بىلىكتى ماماندار جۇمىس ىستەيدى. مەكەمە باسشىسى سەرىك بوپەجانوۆتىڭ ايتۋىنشا, مۇندا قاجەتتى مەديتسينالىق تەراپيا مەن كوررەكتسيا قىزمەتتەرى جوعارى دەڭگەيدە كورسەتىلەدى. سونداي-اق بۇل جەردە ءتۇرلى تاقىرىپقا ارنالعان ۇيىرمەلەردىڭ جۇمىسى دا جۇيەلى جولعا قويىلعان. «ورتالىق تاربيەلەنۋشىلەرى قالاداعى تەاتر, كورمە, كونتسەرتتەر سياقتى مادەني ءىس-شارالارعا ءجيى بارىپ تۇرادى», دەيدى س.بوپەجانوۆ.
سونىمەن قاتار ماۋلەن اشىمباەۆ باستاعان نۇروتاندىقتار «قاسيەتتى جول» وڭالتۋ ورتالىعىندا بولدى. بۇل جەردە 2-15 جاس ارالىعىنداعى مۇگەدەك بالالار مەن جاسوسپىرىمدەردىڭ تەگىن وڭالتۋ كۋرسىنان وتۋىنە بارلىق جاعداي جاسالعان. «قاسيەتتى جول» قوعامدىق قايىرىمدىلىق قورىنىڭ پرەزيدەنتى گۇلميرا ءابىلدينوۆانىڭ سوزىنە قاراعاندا, ازىرگە ەلىمىز بويىنشا وسىنداي ءۇش وڭالتۋ ورتالىعى بار ەكەن. ونىڭ ەكەۋى – استانادا, بىرەۋى شىمكەنت قالاسىندا ورنالاسقان.
– ەندىگى ءبىزدىڭ ماقساتىمىز – ەلىمىزدىڭ ءار وڭىرىندە وسىنداي ورتالىقتار اشىپ, بالالارعا كومەك قولىن سوزۋ. بۇل ماسەلەدە بارلىعىن مەملەكەتتىڭ موينىنا ارتىپ قويماي, بەلسەندى ازاماتتار وزدەرى دە باس بولىپ, ىسكە كىرىسۋ كەرەك دەپ ەسەپتەيمىن. ءبىز وسى ماقساتتا «قازاقستان جاقسىلىق جاسايدى» اتتى ارنايى باستامانى قولعا الدىق. سول ارقىلى كەز كەلگەن قازاقستاندىق جىلىنا ءبىر رەت 365 تەڭگەسىن قايىرىمدىلىققا جۇمساي الادى. ياعني كۇنىنە بار بولعانى ءبىر تەڭگەدەن وسى باعىتتا قايىرىمدىلىققا جۇمساپ وتىرسا, وسىنداي 40 وڭالتۋ ورتالىعىن اشۋعا مۇمكىندىك تۋار ەدى, – دەگەن گ.ءابىلدينوۆا بارشا قازاقستاندىقتاردى اتالعان باستاماعا بەلسەنە اتسالىسۋعا شاقىردى. ول ءۇشىن ارنايى «قازاقستان جاقسىلىق جاسايدى» اتتى ءموبيلدى قوسىمشا دا ىسكە قوسىلعان. ياعني اكتسياعا قاتىسقىسى كەلگەن ازاماتتار سول جەردەن بارلىق قاجەتتى مالىمەتتەردى الا الادى.
الەۋمەتتىك نىسانداردىڭ ەڭبەك ۇجىمىمەن جانە ونداعى تاربيەلەنۋشىلەردىڭ اتا-انالارىمەن كەزدەسكەن پارتيا توراعاسىنىڭ ءبىرىنشى ورىنباسارى پارتيا قىزمەتىن جاڭعىرتۋ اياسىندا «كەدەرگىسىز كەلەشەك» جوباسىنىڭ جۇمىسى دا ودان ءارى جاندانىپ, ءادىس-تاسىلدەرى جەتىلە تۇسەتىنىن ايتتى.
– ەرەكشە قاجەتتىلىگى بار مۇمكىندىگى شەكتەۋلى جاندارعا قولداۋ كورسەتىپ, قول ۇشىن سوزۋ – پارتيامىزدىڭ باسىم باعىتتارىنىڭ ءبىرى. وسىعان وراي «كەدەرگىسىز كەلەشەك» پارتيالىق جوباسىن جانداندىرىپ, فورماتىن وزگەرتىپ, بۇل باعىتتا بىرنەشە ناقتى جۇمىستاردى قولعا الدىق. وسى ساناتتاعى ازاماتتارىمىزدىڭ نەگىزگى ماسەلەلەرىن ساراپتاپ, پارتيا تاراپىنان ولارعا جان-جاقتى قولداۋ كورسەتۋ ءۇشىن نەگىزگى ءۇش باعىت بويىنشا جۇمىس جۇرگىزۋ كەرەكتىگىن انىقتادىق. ولار: ينكليۋزيۆتى ءبىلىم بەرۋ, مۇمكىندىگى شەكتەۋلى جانداردى جۇمىسپەن قامتۋعا جاعداي جاساۋ جانە قوعامدىق ورىنداردا «كەدەرگىسىز ورتا» قالىپتاستىرۋ, – دەدى ماۋلەن اشىمباەۆ.
سونداي-اق ول وسى سالاداعى بىرقاتار ماسەلەلەرگە دە نازار اۋداردى. ونىڭ سوزىنە قاراعاندا, قازىرگى تاڭدا ەلىمىزدە مۇمكىندىگى شەكتەۋلى جانداردىڭ 30 پايىزى عانا جۇمىس ىستەپ, اقشا تابۋ مۇمكىندىگىنە يە. سوندىقتان م.اشىمباەۆ بۇل وزەكتى ماسەلەنى شەشۋ ءۇشىن جۇمىس بەرۋشىلەرمەن بىرلەسىپ, جۇيەلى جۇمىس ىستەۋ كەرەكتىگىن ايتتى. بۇدان باسقا, مۇمكىندىگى شەكتەۋلى جاندارعا ارنالعان ينفراقۇرىلىمنىڭ قولجەتىمسىزدىگى دە وزەكتى ماسەلەلەردىڭ قاتارىندا. ماسەلەن, بۇگىندە 31 مىڭنان استام پاسپورتتالعان ينفراقۇرىلىم نىساندارىنىڭ 3 مىڭعا جۋىعى مۇمكىندىگى شەكتەۋلى جاندار ءۇشىن قولجەتىمسىز. ودان بولەك, ەلىمىزدە ينكليۋزيۆتى ءبىلىم بەرۋ ءىسى دە لايىقتى دەڭگەيدە دامىماي وتىر. ازىرگە وتاندىق مەكتەپتەردىڭ تەك 30 پايىزىندا عانا مۇمكىندىگى شەكتەۋلى بالالاردى وقىتۋعا قاجەتتى جاعداي جاسالعان.
– پارتيا توراعاسىنىڭ تاپسىرماسى بويىنشا ءبىز الداعى ۋاقىتتا بۇل ماسەلەلەردى باستى نازارىمىزدا ۇستايتىن بولامىز. كەلەشەكتە وسى ءۇش باعىت بويىنشا جۇيەلى جۇمىس ىستەيمىز. جاڭعىرتىلعان جوبانىڭ باستى ماقساتى – مۇمكىندىگى شەكتەۋلى جانداردىڭ ءومىر ساپاسىن جاقسارتىپ, ولارعا پارتيا تاراپىنان ناقتى كومەك كورسەتۋ, – دەدى ماۋلەن اشىمباەۆ.
وسى رەتتە بۇگىندە ەلىمىزدە كەيبىر ۇكىمەتتىك ەمەس ۇيىمداردىڭ ءوز كۇشتەرىمەن اۋقىمدى جۇمىستار اتقارىپ وتىرعانىن دا اتاپ وتكەن ءجون. وسىعان وراي كەلەشەكتە پارتيا سونداي ۇيىمداردىڭ باستاماسىنا جان-جاقتى قولداۋ كورسەتىپ, ولارمەن بىرلەسىپ جۇمىس ىستەيتىن بولادى.
جولدىباي بازار,
«ەگەمەن قازاقستان»
