– تيمۋر مۇرات ۇلى, قازاقستاندا كوكتەم جاعىمدى جاڭالىقتارمەن باستالدى. مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا بەس الەۋمەتتىك باستاما تۋرالى جاريالادى. بۇلار شىن مانىندە اۋقىمدى الەۋمەتتىك جوبالارعا جول اشادى دەۋگە بولا ما؟
– قازاقستان ازاماتتارىنا ارنالعان جاڭا الەۋمەتتىك جوبانى ىسكە قوسۋ – بۇل پرەزيدەنت بۇرىنىراقتا باستاماشى بولعان الەۋمەتتىك جاڭعىرتۋ ساياساتىنىڭ جاڭا, اۋقىمدى دەڭگەيدەگى جالعاسى. پرەزيدەنت جاريالاعان اۋقىمدى باستاما, شىن مانىندە, تەك ەل ەكونوميكاسىنىڭ بارلىق ماڭىزدى سالالارىن قامتىپ قانا قويماي, اقىر اياعىندا, بارلىق قازاقستاندىقتاردىڭ الەۋەتىن ناقتى ارتتىرۋعا باعىتتالعان.
ەلىمىزدەگى قىزمەت كورسەتۋ, ءبىلىم بەرۋ, قۇرىلىس, وڭدەۋ ونەركاسىبى, ساۋدا, شوك, بانكتىك-قارجىلىق جانە باسقا دا سالالار وسى وزگەرىستەردىڭ اسەرىن ايقىن «سەزىنەتىن» بولادى. ءبىر باستامالاردىڭ تيىمدىلىگىن ءبىز جۇزەگە اسىرعان كەزدە بىردەن, قىسقامەرزىمدى كەلەشەكتە بايقاساق, ال باسقا باستامالاردىڭ جاقسىلىعىن ۇزاقمەرزىمدى كەزەڭدە كورەتىن بولامىز.
ماسەلەن, كەم دەگەندە 25 مىڭ ورىندىق جاڭا جاتاقحانالار سالۋ مىندەتى مەن ونىمەن ءبىر مەزگىلدە گرانتتاردى 20 مىڭعا دەيىن كوبەيتۋ قىسقامەرزىمدى كەلەشەكتە قازاقستاندىق جاستارعا قولايلى قارجىلىق جانە تۇرمىستىق جاعداي تۋعىزا وتىرىپ, ولاردىڭ الەۋەتىن دامىتۋعا مۇمكىندىك بەرمەك. سونىمەن قاتار, جاتاقحانا سالۋدىڭ مۋلتيپليكاتيۆتىك اسەرى دە بار: جەكە قۇرىلىس كومپانيالارى, قۇرىلىس ماتەريالدارىن, جيھاز وندىرۋشىلەر, باسقا دا بىرقاتار ءوزارا بايلانىستى سالالار دامۋعا سەرپىن الماق. سونىمەن بىرگە, جىل سوڭىنا دەيىن شاعىن جانە ورتا كاسىپكەرلىك سالاسىنداعى دا جاعداي جاقسارۋى ءتيىس.
پرەزيدەنتتىڭ 5 باستاماسىنان بىلەتىنىمىزدەي, ءوزىن ءوزى جۇمىسپەن قامتىعان جانە جۇمىسسىز ادامداردىڭ اراسىندا جاپپاي كاسىپكەرلىكتى دامىتۋ ءۇشىن قوسىمشا 20 ملرد تەڭگە سوماسىندا نەسيە بولىنەتىن بولادى. ءاربىر وتباسى ءۇشىن باسپانا الۋدىڭ جاڭا مۇمكىندىگى ءتيىمدى ناتيجە بەرمەك جانە قالىڭ كوپشىلىككە ارنالعان تۇرعىن ءۇي يپوتەكاسىنىڭ قولجەتىمدىلىگىن ارتتىرۋعا مۇمكىندىك بەرەدى.باسقا ەكى باستامانىڭ: سالىق جۇكتەمەسىن ازايتۋ جانە ەلدى ودان ارعى گازبەن قامتاماسىز ەتۋدىڭ ناتيجەسى 2019 جىلدىڭ وزىندە-اق ايقىن سەزىلەتىن بولادى.
– ۇكىمەتتىڭ ەكونوميكالىق بلوگىنىڭ وكىلى رەتىندە پرەزيدەنتتىڭ بەس الەۋمەتتىك باستاماسىنىڭ قايسىسى سىزگە جاقىنىراق جانە نەلىكتەن؟
– ەكونوميست رەتىندە ماعان ەڭ جاقىنى – پرەزيدەنت جاريالاعان «7 – 20 – 25» تۇرعىن ءۇي يپوتەكاسىنىڭ قولجەتىمدىلىگىن ارتتىرۋ جونىندەگى باستامانى جۇزەگە اسىرۋ مىندەتى.بۇۇ-نىڭ الەۋمەتتىك ستاندارتتارىنا سايكەس, ءبىر ادامعا ارنالعان تۇرعىن ءۇي كولەمىنىڭ اۋماعى 30 شارشى مەتردەن كەم بولماۋى, ال ءوز قاراجاتىنىڭ ەسەبىنەن پاتەرگە اقشا جيناۋدىڭ قالىپتى مەرزىمى 3,5-4,5 جىل بولۋى ءتيىس. باسپانامەن قامتاماسىز ەتۋدىڭ قازاقستاندىق كورسەتكىشى ازىرگە بۇل نورماتيۆكە جەتپەيدى جانە بۇگىندە 21 شارشى مەتردى قۇرايدى.
قىمبات ەمەس, ساپالى تۇرعىن ۇيگە قول جەتكىزۋدىڭ تىم جوعارى باعاسى مەن تاپشىلىعى ءبىزدىڭ قوعامىمىزداعى ەڭ ءبىر وتكىر الەۋمەتتىك ماسەلە بولىپ كەلەدى, ال «7 – 20 – 25» باستاماسىن جۇزەگە اسىرۋ ەلىمىز تۇرعىندارىنىڭ باسىم كوپشىلىگىنىڭ باسپانا ماسەلەسىن شەشۋگە مۇمكىندىك بەرەدى.
بۇل باستامانى جۇزەگە اسىرۋدىڭ ناتيجەسىندە قالىڭ كوپشىلىككە ارنالعان تۇرعىن ءۇيدىڭ يپوتەكاسىنا قولجەتىمدىلىك ارتىپ, تۇرعىن ءۇي سالاسى تولىقتاي قايتا جاڭارادى.تۇرعىن ءۇي قۇرىلىسى سوڭعى جىلداردا قۇرىلىس سالاسىن دامىتۋدىڭ باسىم باعىتىنا اينالدى.
مەملەكەتتىڭ «قازاقستاننىڭ تۇرعىن ءۇي قۇرىلىس جيناق بانكى» اق سەكىلدى ينستيتۋتتى قولداۋى جانە «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىن جۇزەگە اسىرۋ جاعدايدى نازاردا ۇستاۋعا مۇمكىندىك تۋعىزىپ, تۇرعىن ءۇي قۇرىلىسى كولەمىنىڭ كۇرت تومەندەۋى مەن تۇرعىن ءۇي باعاسىنىڭ شارىقتاپ كەتۋىنە جول بەرمەيدى.
بۇل رەتتە «7 – 20 – 25» باستاماسىن جۇزەگە اسىرۋ تەك ماڭىزدى الەۋمەتتىك-ەكونوميكالىق مانگە عانا يە بولىپ وتىرعان جوق. قۇرىلىس كولەمىنىڭ ۇلعايۋى, ونىمەن بايلانىستى وڭدەۋ, جەڭىل, حيميا, تاۋ-كەن ونەركاسىبى, جيھاز, قۇرىلىس ماتەريالدارىن ءوندىرۋ جانە ت.ب. سالالاردىڭ دامۋىنا جول اشادى. وسىلايشا, بۇل باعدارلاما ەكونوميكانىڭ ءوزارا بايلانىستى سالالارىنا دا مۋلتيپليكاتيۆتىك اسەر ەتەدى.
اتالعان باعدارلاما ينۆەستيتسيا تارتۋعا, ەلدەگى قۇرىلىس سالاسىن جانداندىرۋعا, ونى جاڭا قوسىمشا جۇمىس ورىندارىمەن قامتاماسىز ەتۋگە جاعىمدى اسەر ەتپەك. «7 – 20 – 25» باستاماسىن جۇزەگە اسىرۋ قازاقستاننىڭ حالىقتى ساپالى تۇرعىن ۇيمەن قامتاماسىز ەتۋدىڭ الەمدىك ستاندارتتارىنا جاقىنداۋىنا مۇمكىندىك بەرەدى.
– ءسىزدىڭ كوزقاراسىڭىزشا, از جالاقى الاتىن جۇمىسشىلارعا سالىق جۇكتەمەسىن ازايتۋ سەكىلدى ەكىنشى باستاما قانشالىقتى ءتيىمدى بولادى؟
– سالىستىرمالى تۇردە از جالاقى الاتىن قازاقستاندىقتاردى قولداۋ ماقساتىندا پرەزيدەنت ولاردىڭ سالىق جۇكتەمەسىن 10 ەسەگە – 1%-عا دەيىن تومەندەتۋدى ۇسىندى. جەكە تابىس سالىعى ارقىلى سالىق جۇكتەمەسىن ازايتۋ ايىنا ەڭ از ەسەپتىك كورسەتكىشتىڭ 25 ەسە مولشەرىنەن تومەن ەڭبەكاقى الاتىندارعا ارنالعان. مەملەكەت باسشىسى اتاپ كورسەتكەندەي, ناتيجەسىندە, جالدامالى جۇمىسشىلاردىڭ 1/3-ءىنىڭ جالاقىسى ارتادى. بۇل كورسەتكىش قر-داعى ەڭبەكاقى دەڭگەيىن سارالاۋعا جاناما ىقپال ەتەدى.
ماسەلەن, قر ۇەم ستاتيستيكا كوميتەتىنىڭ جالدامالى جۇمىسشىلاردى ءىشىنارا تەكسەرۋ دەرەكتەرىنە قاراعاندا, جالدامالى جۇمىسشىلاردىڭ (10% جوعارى ەڭبەكاقى تولەنەتىن جانە 10% تومەن ەڭبەكاقى تولەنەتىن) ەسەپتەلگەن ەڭبەكاقىسىنىڭ سارالاۋ (الشاقتىق) كوەففيتسەنتى 6,2 ەسەنى قۇرايدى. ماسەلەن, ەو-دا اتالعان كورسەتكىش 3,6 ەسە. مينيمۋم (حالىقارالىق ەڭبەكتى ۇيىمداستىرۋدىڭ 2016 جىلعى دەرەكتەرىنە سايكەس) نورۆەگيادا (2,3), ماكسيمۋم ليتۆادا (4,4) تىركەلدى. دامۋشى ەلدەردە اتالعان كورسەتكىش 10,9-عا ء(ۇندىستان) بارادى. رف-دا – 5,1.
از جالاقى تولەنەتىن جۇمىسشىلاردىڭ سالىق جۇكتەمەسىن ون ەسە ازايتۋ سالىق اۋىرتپالىعىن وڭتايلاندىرۋدى ىنتالاندىرادى. بۇل تەڭدەسسىز قادام, 2 ملن-نان استام جۇمىسشىنىڭ ەڭبەكاقىسى جۇمىس بەرۋشىگە قوسىمشا اۋىرتپالىق تۇسىرمەي-اق, ۇلعايادى دەگەندى بىلدىرەدى.
قاراپايىم قازاقستاندىقتاردىڭ جالپى ءال-اۋقاتىنىڭ ارتۋى ىشكى سۇرانىسقا قوسىمشا سەرپىن بەرەدى, دەمەك, بۇل ەل ەكونوميكاسىنىڭ دامۋىن جەدەلدەتەدى. پرەزيدەنت سونداي-اق تابىس سالىعىنىڭ پروگرەسسيۆتىك شكالاسىن ەنگىزۋ مۇمكىندىگىن زەرتتەۋ قاجەتتىگىنە نازار اۋداردى.
ەگەر جەكە تابىس سالىعىنىڭ قازىرگى جالپاق جۇيەسى, تابىسىنا قاراماستان, بارلىعى ءۇشىن ءبىر مولشەرلەمەنى بىلدىرەتىن بولسا, ال پروگرەسسيۆتىك شكالا رەزيدەنتتەر ءۇشىن جالاقىسىنىڭ كولەمىنە قاراي سالىق سالۋ مولشەرىن وزگەرتۋدى باعامدايدى. سايكەسىنشە, ادام نەعۇرلىم كوپ تابىس تاپقان سايىن, سونشالىقتى كوبىرەك سالىق تولەۋى ءتيىس.
بۇل جەردە, ءسوز جوق, الەۋمەتتىك ادىلەتتىلىك ۇستانىمى ماڭىزدى بولا تۇسەدى. بۇدان باسقا, مۇنداي جاعدايدا, سالىقتىڭ قايتا ءبولىسۋ فۋنكتسياسى دا ارتادى. بۇل مىندەت بارىنشا قىزىقتى, سونىمەن بىرگە كۇردەلى دە. ونى ەكونوميكالىق احۋالىمىزدىڭ ەرەكشەلىكتەرى مەن سالىق سالۋ تاجىريبەسىن ەسەپكە الا وتىرىپ, تىڭعىلىقتى پىسىقتايتىن بولامىز. پروگرەسسيۆتىك شكالانى پايدالانۋعا قاتىستى, پروگرەسسيۆتىك سالىق سالۋ الەمدىك تاجىريبەدە بار ەكەندىگىن اتاپ وتپەكپىن. بۇل رەتتە سالىق سالۋدىڭ بۇل ءتۇرىن ەنگىزۋدەگى تابىستىڭ كەپىلى دالمە-ءدال سالىق اۋىرتپالىعىن انىقتاۋ, ءتيىمدى سالىقتىق اكىمشىلەندىرۋ, حالىقتىڭ جوعارى سالىق مادەنيەتى بولىپ تابىلادى.
قازاقستاننىڭ سالىق سالۋ جۇيەسىندەگى جتس پروگرەسسيۆتىك شكالاسىنا ازىرلىكتىڭ العاشقى قادامى 2020 جىلعى 1 قاڭتاردان باستاپ جالپىعا ورتاق دەكلاراتسيالاۋدى كەزەڭ-كەزەڭمەن ەنگىزۋ بولىپ سانالادى. بۇل سالىق مادەنيەتىنىڭ دەڭگەيىن كوتەرۋگە, سالىقتىق اكىمشىلەندىرۋدىڭ تيىمدىلىگىن ارتتىرۋعا, ەلىمىزدەگى, وڭىرلەردەگى جانە ەكونوميكالىق قىزمەت تۇرلەرىندەگى پروگرەسسيۆتىك سالىق سالۋدىڭ ناقتى پايداسى مەن شىعىندارىن باعالاۋعا مۇمكىندىك بەرەتىن حالىقتىڭ جيىنتىق تابىسىنىڭ نەگىزىن قۇرۋعا ىقپال ەتەدى.
– شاعىن نەسيە بەرۋدى ۇلعايتۋدىڭ الەۋمەتتىك سالدارى قانداي بولماق؟
– ءسوز جوق, جاپپاي كاسىپكەرلىكتى دامىتۋداعى ايرىقشا ءتيىمدى قۇرال شاعىن نەسيە بەرۋ تەتىگى بولىپ تابىلادى.
2017 جىلى بارلىعى 32 ميلليارد تەڭگە سوماسىنداعى 7 200 شاعىن نەسيە بولىنگەن ەكەن. 2018 جىلى حالىقتى شاعىن نەسيەلەۋدىڭ جالپى سوماسى 62 ميلليارد تەڭگەگە دەيىن ۇلعاياتىن بولادى. اۋىلدار مەن شاعىن قالالارداعى نەسيەلەۋگە 14 ميللياردقا جۋىق تەڭگە ءبولۋ جوسپارلانۋدا. ونىڭ ىشىندە 10 ميلليارد تەڭگە ءىرى اۋىل شارۋاشىلىعى وڭدەۋشى كاسىپورىندارىنىڭ اينالاسىندا ياكورلىق كووپەراتيۆتەر جوباسىن جۇزەگە اسىرۋعا جۇمسالادى. شاعىن جانە مونوقالالارداعى نەسيەلەۋگە 6 ميلليارد تەڭگە بولىنەتىن بولادى.
ناتيجەسىندە, نەسيەگە قول جەتكىزىپ, ءوز ءىسىن جۇرگىزەتىن ازاماتتاردىڭ سانى 14 مىڭ ادامدى قامتي وتىرىپ, ەكى ەسە ۇلعايادى. بۇلار نەگىزىنەن, اقشا الىپ, جاڭا جۇمىس ورنىن قۇراتىن اۋىل ادامدارى بولماق.
جۇمىسپەن قامتۋمەن قاتار شاعىن نەسيە بەرۋ كولەمىنىڭ ۇلعايتىلۋى قوسىمشا جۇمىس ورنىن قۇرۋ, جاڭا ءوندىرىس قۇرۋ نەمەسە قىزمەت كورسەتۋدى دامىتۋ, شىعارىلاتىن ونىمدەردىڭ كولەمىن ۇلعايتۋ تۇرىندە مۋلتيپليكاتيۆتىك اسەر بەرەدى. اسىرەسە بۇل باستاما, بۇگىندە قاراجاتقا ءزارۋ بولىپ وتىرعان اۋىل كاسىپكەرلەرى ءۇشىن ءتيىمدى. سەبەبى بىرقاتار سەبەپپەن ەكىنشى دەڭگەيلى بانكتەر اۋىلدىقتارعا نەسيە بەرۋگە ىقىلاس تانىتا قويمايدى.
ماسەلەن, بانكتەن قارىز الۋ ءۇشىن, مىناداي بەلگىلى ءبىر شارتتارعا ساي, رەسمي قۋاتتالعان تابىسى, وڭ نەسيە تاريحى, جەتكىلىكتى كەپىلزاتى جانە ت.ب. بولۋى ءتيىس. ونىڭ ۇستىنە, وتىنىشتەردى قاراۋعا ەداۋىر ۋاقىت كەتەدى. بۇل بانكتەردىڭ نەسيەنىڭ وتەلمەي قالۋى قاتەرىنەن ساقتانۋىمەن تۇسىندىرىلەدى.
پرەزيدەنتتىڭ شاعىن نەسيە بەرۋدى كوبەيتۋ باستاماسى قازىرگى تۇيتكىلدى ماسەلەنى شەشۋگە مۇمكىندىك بەرىپ, اۋىلداعى كاسىپكەرلىكتىڭ دامۋىنا, اۋىل حالقىنىڭ ءومىر ءسۇرۋ ساپاسىن ارتتىرۋعا, سونداي-اق قر ەحاقم باعالاۋىنا قاراعاندا, 2018 جىلدىڭ وزىندە-اق 40 مىڭ جۇمىس ورنىن قۇرۋعا جاڭا سەرپىن بەرەدى.
– ەلىمىزدىڭ ورتالىق جانە سولتۇستىك وڭىرلەرىن گازبەن قامتاماسىز ەتۋ ەكونوميكاعا قالاي اسەر ەتەدى؟ گازبەن قامتۋ وسى وڭىرلەردەگى حالىقتىڭ تىرشىلىگىن قالاي وزگەرتپەك؟
– قىزىلوردا وبلىسىنان استانا ارقىلى سولتۇستىككە گاز قۇبىرىن تارتا وتىرىپ, ءبىز قاراعاندى, اقمولا جانە سولتۇستىك قازاقستان وبلىستارىنىڭ دامۋ الەۋەتىن نىعايتامىز. بۇل ەكولوگيا مەن قولايلى تۇرمىس تۇرعىسىنان عانا ەمەس, سونداي-اق شاعىن قالالاردى كوتەرۋ, اۋىلدىق اۋماقتاردى دامىتۋ تۇرعىسىنان العاندا دا مۋلتيپليكاتيۆتىك ناتيجە بەرەتىن ءىرى جۇيەلى شەشىم.
گاز قۇبىرىنىڭ قۇرىلىسىنا كوپتەگەن قازاقستاندىق كومپانيالار جۇمىلدىرىلاتىن بولادى. بۇل جەردە ءبىز گاز قۇبىرىنىڭ قۇرىلىسى كەزىندەگى ءوندىرىستىڭ دامۋىمەن بىرگە, سونداي-اق ەنشىلەس سالالارداعى سالاارالىق بايلانىستاردىڭ (مەتاللۋرگيا, كولىكتىك تاسىمالداۋ, قۇرىلىس, وقىتۋ, تۇرۋ, تاماقتانۋ جانە كوپتەگەن تاعى دا باسقا قىزمەتتەرمەن قامتاماسىز ەتۋ) ەسەبىنەن قوسىمشا ناتيجەلەردى دە كورەتىن بولامىز.
وسىنداي اۋقىمدى جوبانى جۇرگىزۋ بارىسىندا ۋاقىتشا دا, تۇراقتى دا جۇمىس ورىندارى قۇرىلاتىن بولادى.
جوبانى جۇزەگە اسىرۋ استاناعا, جىل سايىن جەس-تە جاعىلاتىن كومىردى اۋىستىرۋدىڭ ارقاسىندا, ەلەۋلى الەۋمەتتىك-ەكونوميكالىق ناتيجە اكەلەدى. ەنەرگەتيكا مينيسترلىگىنىڭ ەسەپتەۋىنشە, لاستايتىن زاتتاردىڭ شىعارىلۋىنىڭ تومەندەۋ اسەرى جىلىنا 36,1 مىڭ توننانى قۇرايدى. استاناداعى تازا اۋا, قاتتى وتىن جاعۋدان باس تارتۋ, وسىنىڭ بارلىعى ەلوردامىزدىڭ ساۋلەتىنىڭ ارتۋىنا, شەتەلدىك ينۆەستورلاردىڭ قىزىعۋشىلىعىن تۋدىرۋعا نەگىز قالايدى.
– پرەزيدەنتتىڭ پىكىرىنشە, باعدارلامانى جۇزەگە اسىرۋ «الەۋمەتتىك مەملەكەت» تۋرالى كونستيتۋتسيالىق نورمانى جاڭا ايقىن مازمۇنمەن تولىقتىرماق. بۇل جەردە قانداي مازمۇن تۋرالى ءسوز بولىپ وتىر؟
– الەۋمەتتىك مەملەكەتتىڭ باستى مىندەتى – الەۋمەتتىك ادىلەتتىلىكتىڭ بەكىتىلگەن ۇستانىمدارىنا نەگىزدەلەتىن قوعامنىڭ دامۋىنا قول جەتكىزۋ.
مۇنداي تالاپتارعا, ينۆەستيتسيالاردىڭ جوعارى دەڭگەيى مەن ءىجو-ءنىڭ كۇشتى وسىمىنە كىرىستىڭ تەڭسىزدىگىن ازايتۋ جونىندەگى شارالاردى ورىنداۋمەن قاتارلاس قول جەتكىزىلەتىن ينكليۋزيۆتىك ەكونوميكالىق دامۋ جەتىستىگى جاۋاپ بەرەدى.
ينكليۋزيۆتىك ءوسىمدى قامتاماسىز ەتۋ ءۇشىن حالىقتىڭ بارلىق توبىنا ارنالعان جاڭا مۇمكىندىكتەر تۋعىزۋدىڭ قاجەتتى شارالارىن: ولاردىڭ ەڭبەك جانە كاسىپكەرلىك الەۋەتىن ارتتىرۋ, ءومىر ءسۇرۋدىڭ شارتى مەن ساپاسىن جاقسارتۋ ءۇشىن جاعداي جاساۋ قاجەت.
ەلىمىزدىڭ ينكليۋزيۆتىك دامۋ ارناسىنداعى پرەزيدەنتتىڭ بەس باستاماسى از تابىس تاباتىن تۇرعىنداردىڭ باسپاناعا قول جەتكىزۋ تالابىن جاقسارتۋعا مۇمكىندىك بەرەدى, تابىس سالىعىنىڭ مولشەرلەمەسىن ازايتۋ ارقىلى ولاردىڭ جالاقىسىن مولايتادى, ءىسىن جاڭادان باستاعان كاسىپكەرلەردىڭ شاعىن نەسيەگە قول جەتكىزۋىن ارتتىرادى. وسى قادامدار ينكليۋزيۆتىك ەكونوميكالىق دامۋدىڭ الەۋەتىن ارتتىرادى.
مىنە وسى ايتىلعان باعىتتاردا ءبىزدىڭ ەلباسىمىزدىڭ ساياسي ەرىك-جىگەرى تانىلىپ وتىر دەگەن ويدامىن, ال ونىڭ جاڭا الەۋمەتتىك باستامالارى مەن ونى جۇزەگە اسىرۋدىڭ ناتيجەسى «الەۋمەتتىك مەملەكەت» تۋرالى كونستيتۋتسيالىق نورمانى ناقتى جوبالارمەن جانە باعدارلامالارمەن, سايكەس قارجىلاندىرۋ كوزىمەن قامتاماسىز ەتكەن جاڭا ايقىن مازمۇنمەن شىن مانىندە تولىقتىرادى.
– اڭگىمەڭىزگە راحمەت.
اڭگىمەلەسكەن سەيفوللا شايىنعازى,
«ەگەمەن قازاقستان»
