بۇل – بۇگىندە عارىشتى يگەرۋدە, اۆتوكولىك ونەركاسىبىندە, بولاشاقتىڭ ەنەرگياسىن وندىرۋدە دە ءوزىنىڭ سونى ستارتاپتارىن ميللياردتاعان دوللارعا باعالاناتىن الەمدىك الپاۋىت كومپانيالارعا اينالدىرعان كرەمني جازىعىنان شىققان كاسىپكەر يلون ماسكتىڭ ءسوزى. البەتتە, يلون ءاردايىم ءوزىنىڭ وزگەگە ۇقسامايتىن مالىمدەمەلەرىمەن امەريكالىق قوعامدى عانا ەمەس, الەمدى دە تاڭعالدىرىپ كەلەدى. ونى ءاۋ باستا اۆانتيۋريست دەگەندەر دە بولدى. ول تابيعاتى كەرەعار قايشىلىققا تولى جان. اۆتور ءوز كەيىپكەرىن ادامزات يگىلىگى ءۇشىن بايلىعىن دا, ومىرلىك قۋاتىن دا ارناعان توماس ەديسون, گەنري فورد, گوۆارد حيۋز, ستيۆ دجوبس سياقتى اتاقتى ونەركاسىپشىلەر مەن يننوۆاتورلاردىڭ قاتارىنا قويادى. راسىندا, اتالعان ەڭبەك ءوزىن قوعام پايداسىنا ارناعىسى كەلەتىن جاندارعا جاقسى كۇش-جىگەر سىيلايدى.
شىققان تەگى, بالالىق شاعى تۋرالى
بۇگىندە ءار قادامى الەمدىك باسپاسوزگە ازىق بولعان يلون ماسكتىڭ جۇرتشىلىق الدىنا العاش رەت شىعۋىن 1984 جىلى وڭتۇستىكافريكالىق «جەكە كومپيۋتەر جانە كەڭسەلىك تەحنولوگيا» جۋرنالىنا كومپيۋتەرلىك ويىننىڭ باستاپقى كودتارىن جاريالاۋىنان باستاۋعا بولادى. سول كەزدە بار-جوعى 12 جاستاعى جەتكىنشەك ءوزى وقىعان عىلىمي-فانتاستيكالىق كىتاپتار نەگىزىندە 167 كود جولىنان تۇراتىن Blastar اتتى «عارىشتىق» ويىن قۇراستىرادى. بۇل كومپيۋتەردىڭ ماتىندىك ينتەرفەيستەرىنىڭ ۋاقىتى بولاتىن. بۇل شەبەر باعدارلاما بولماسا دا, ونىڭ جەتكىنشەك شاعىندا-اق قانشالىقتى قابىلەتتى ەكەنىن كورسەتتى. وسىلايشا, ءوزىنىڭ كومپيۋتەرلىك ويىنىنىڭ سيپاتتاماسىندا كورسەتكەندەي, جات عالامشارلىقتاردىڭ شابۋىلىنان قورعاۋ جونىندەگى بالاڭ ويىمەن-اق بولاشاقتاعى ادامزات تاعدىرىنا ورتاق تۇلعا ەكەنىن بىلدىرگەندەي ەدى.
1971 جىلى وڭتۇستىك افريكانىڭ سولتۇستىك-شىعىسىنداعى ءىرى شاھار پرەتوريادا تۋىپ, ەل استاناسى يوحاننەسبۋرگكە ءبىر ساعاتتىق جەردە اق ناسىلدىلەرگە ءتان بارشىلىقتا وسكەن ونىڭ كەز-كەلگەن بالا تىلەگى قارا ناسىلدىلەردەن قۇرالعان قىزمەتشىلەردىڭ كومەگىمەن تەز ورىندالاتىن. باقۋاتتى وڭتۇستىكافريكالىقتار ايتارلىقتاي كاسىپپەن شۇعىلدانا قويماسا دا اس تا توك كوڭىلدى كەشتەرگە كوپ ۋاقىت ارنايتىن وندا باتىس قوعامىنداي ەمەس, ۋاقىت باياۋ جىلجيتىن. ماسكتىڭ بالالىق شاعى قاندى وقيعالارمەن تۇسپا-تۇس كەلدى. سوۋەتوداعى ب ۇلىك كەزىندە اق ءناسىلدى ۇكىمەتكە قارسىلىق كورسەتكەن جۇزدەگەن قارا ءناسىلدى ستۋدەنت اجال قۇشتى. كوپتەگەن جىلدار بويى ناسىلشىلدىك ساياساتى ءۇشىن وڭتۇستىك افريكا رەسپۋبليكاسى قاتاڭ سانكتسيالارمەن بەتپە-بەت كەلدى. سىرت مەملەكەتتەرگە بارعان باسقا ادامدار سياقتى ماسك تە بالا كەزىندە ەل ىشىندەگى احۋالدى جەتە ءتۇسىنىپ, سول ءبىر مەشەۋ دە مەرەز ساياسات ءۇشىن ۇيالاتىن. سوندىقتان دا بولار, بالا دۇنيەتانىمىنداعى ادامزاتتى قۇتقارۋ يدەياسى نىعايا ءتۇستى. جان دۇنيەسى جالعىزدىققا جاقىن جەتكىنشەك ادامزاتتى اعارتۋ تۋرالى ءجيى ويلانىپ, ارماندارىن جۇزەگە اسىرۋعا مۇمكىندىك بەرەتىن ەل رەتىندە امەريكانى ءبىر ءسات ەسىنەن شىعارعان ەمەس. سوندىقتان 20 جاسىنان اسقان بوزبالا شاعىندا امەريكاعا كەلۋى اتا-باباسىنىڭ تامىر جايعان جەرىنە ورالۋىنداي اسەر قالدىرادى.
راسىندا, گەنەولوگيالىق تامىرىنا كوز جىبەرسەك, ناعاشىلارى جاعىنان جالعاساتىن بابالارى شۆەيتساريالىق نەمىستەر – حالدەماندار اۋلەتى اقش تاۋەلسىزدىگى ءۇشىن سوعىس كەزىندە نيۋ-يورككە ەۋروپادان كەلگەندەر ەدى. بالالىق شاعىندا يلونعا ەشكىمدە قايتالانا بەرمەيتىن ءوزىنىڭ تەگى اسا ۇناي بەرمەيتىن. فەرمەرلەر وتباسىنان شىققان كوكەسى دجون يلون حالدەمان اقش-تىڭ ورتا باتىسىنداعى يللينويس شتاتىندا 1872 جىلى تۋىپ, كەيىن ميننەسوتا شتاتىنا قونىس اۋداردى. 1902 جىلى وسى شتاتتاعى پەكو قالاشىعىندا ماسكتىڭ اتاسى دجوشۋا نورمان حالدەمان دۇنيەگە كەلدى. الايدا ومىرگە ۇلى كەلە سالىسىمەن 32 جاسىندا ديابەت سىرقاتىنا شالدىققان دجوننىڭ ءومىرىن از دا بولسا ۇزارتۋ ءۇشىن ايەلى المەدا دجەين نورمان ەليكسير ويلاپ تابۋدى كوزدەپ, ءوزى ميننەاپوليستە وقىعان ماماندىعى بويىنشا حيروپراكتيكا ەمىنە دەن قويادى. وسىلايشا, كاناداداعى العاشقى مانۋالدى تەراپەۆت اتانعان ماسكتىڭ اجەسى كۇيەۋىنىڭ ءومىرىن تاعى بەس جىلعا ۇزارتادى. ولاردىڭ ۇلى دجوشۋا اكەدەن جەتى جاسىندا قالسا دا ەڭبەككە ەرتە ارالاسقان مىقتى ازامات بولىپ وسەدى. ول كاناداداعى كوۆبويلاردىڭ سپورتتىق جارىسىنىڭ نەگىزىن سالۋشى رودەولاردىڭ ءبىرى. 1930 جىلدارداعى داعدارىس دجوشۋانى دا قاتتى كۇيزەلتتى. بانكتەگى نەسيەلەرىن وتەي الماعان فەرماسىنىڭ جەرىن تاركىلەپ الادى. ول وسىدان كەيىن كوشپەلى ءومىر سۇرگەن. دجوشۋا دا, ۇلى سكوتت تا شەشەلەرىنىڭ جولىمەن حيروپراكتيكا مەكتەبىندە ءبىلىم الدى. سكوتت كەيىن ومىرتقا جارىعىن ەمدەۋ بويىنشا الەمدىك مامانداردىڭ بىرىنە اينالدى. 1948 جىلى دجوشۋا كانادا ازاماتشاسى, بي مۇعالىمى ۋيننيفرەد جوزەفين فلەتچەرگە ۇيلەنەدى. وسى نەكەدەن ەگىز ۇل مەن قىز – كەي مەن مەي تۋادى (مەي – ماسكتىڭ اناسى). بالالار بيدەن ساباق بەرەتىن ستۋديا ورنالاسقان 3 قاباتتى ۇيدە ءوستى. بىردە ءاردايىم تىنىمسىز ىزدەنىستە جۇرەتىن دجوشۋا حالدەمان ۇشۋ ىسىمەن اۋەستەنىپ, جەكە ۇشاق ساتىپ الدى. بالا-شاعاسىمەن ءبىر موتورلى ۇشاققا ءمىنىپ, سولتۇستىك امەريكاعا ساياحات جاساپ جۇرگەن وتباسى تانىمالدىلىققا دا يە بولدى. ءتىپتى كەيىن ايەلىمەن بىرگە «حالدەماندار ۇشقاندا» اتتى كىتاپ تا جازدى. جاس كەزىنەن سپورتشى دا, دارىگەر دە, ساياساتكەر دە بولعان, ونىڭ ۇستىنە وقىس وقيعالارعا قۇمار حالدەمان 1950 جىلى كانادادان كەتۋگە بەل بايلايدى. ولار ءۇي-جايىن ساتىپ, ۇشاعىن جيناپ, وزدەرى بۇرىن مۇلدە بولماعان وڭتۇستىك افريكانى بەتكە الدى. كۇنى قايناعان قۇرلىققا كەلگەن سوڭ قۇراپ العان ۇشاعىمەن تۇرۋعا قولايلى جەر ىزدەيدى. وسىلايشا, پرەتوريانى قولاي كورەدى ءام سوندا بۇرىنعى مانۋالدى ەم كاسىبىن جالعاستىرادى.
بايىز تاۋىپ وتىرا المايتىن بۇل وتباسىنىڭ قىزىعۋشىلىعىندا شەك جوق دەسە بولادى. 1952 جىلى دجوشۋا مەن ۋين 35 مىڭ شاقىرىمدى شاعىن ۇشاقتارىمەن ۇشىپ ءوتىپ, افريكا ارقىلى شوتلانديا مەن نورۆەگياعا بارىپ قايتادى. 1954 جىلى ءوز رەكوردتارىن جاڭارتىپ, 48 مىڭ شاقىرىم ۇشىپ, ارابيا تۇبەگىنىڭ جاعالاۋىمەن يران, ءۇندىستان, مالايزيا جانە تيمور ارالدارى ارقىلى اۆسترالياعا بارىپ كەلەدى. ۆيزالىق قۇجاتتارىن الۋعا ءبىر جىل بويى دايىندالعان ساپار ۇستىندە ۇزاق جول مەن ۇيقىسىزدىقتان قاجىعان دجوشۋا ءتىپتى ەسىنەن تانىپ, شتۋرۆالدى قولىنا العان ايەلى امان-ەسەن ۇشاقتى قوندىرعان ەكەن. ءبىر موتورلى ۇشاقپەن وسىنشا قاشىقتىقتى باعىندىرعان وتباسى تۋرالى بۇكىل ءباسپاسوز قۇرالدارى تاڭدانىسپەن جازىپ جاتتى. حالدەمان 1974 جىلى 72 جاسىندا قونۋعا بەت العان كەزىندە دىڭگەكتەر اراسىنداعى جەلىگە دوڭگەلەگى ءىلىنىپ توڭكەرىلىپ كەتكەن ۇشاعىنىڭ استىندا قالىپ قويىپ قايتىس بولادى. نەمەرەسى يلون بۇل كەزدە اياعىن اپىل-تاپىل باسىپ كەلە جاتقان ءسابي ەدى. اجەسىنىڭ اڭگىمەلەۋىنشە, اتاسى دجوشۋا ۇشاقتى ەشقانداي بايلانىس قۇرالدارىنسىز باسقارا بەرەتىن, ولىممەن تايتالاسىپ جۇرەتىن بىربەتكەي جان بولعان كورىنەدى. يلوندى دا العا جەتەلەگەن ءدال وسى قانداعى مىنەز بولسا كەرەك.
ماسكتىڭ شەشەسى مەي بوي جەتە باستاعاندا-اق سۇلۋ دا سىمباتتى كوركىمەن ورتاسىنان ەرەكشەلەنىپ, وقۋشى كەزىنەن مودەل مەكتەبىنە بارىپ جۇرەدى. دەمالىس كۇندەرى جۋرنالدارعا فوتوسۋرەتكە ءتۇسىپ, پوديۋمدارعا شىعادى. لاۋازىمدى تۇلعالار قاتىساتىن شارالاردا بوي كورسەتىپ, «وڭتۇستىك افريكا ارۋى» بايقاۋىندا فينالعا جولداما الادى. بۇگىندە 60 جاستان اسسا دا مەي حانىم New York, Elle سياقتى ءسان جۋرنالدارىنىڭ مۇقاباسىنان تۇسپەي كەلەدى. ءتىپتى بەيونسە بەينەبايانىنان دا كورىندى. مەي مەن ەررول ماسك (يلوننىڭ اكەسى) ءبىر اۋداندا وسكەن. ەررول مەيدى مەكتەپتە وقۋ ۇلگەرىمى ءۇشىن ۇناتقان ەكەن. ۇيلەنگەننەن كەيىن تۇڭعىشتارى يلوننان سوڭ ءىنىسى كيمبال, قارىنداسى توسكا دۇنيەگە كەلەدى. اناسى يلوننىڭ بالالىق شاعى تۋرالى ەرەكشە سۇيىنىشپەن اڭگىمەلەيدى. يلون ءجيى ويعا كەتەتىن. اڭگىمەڭدى ەستي بەرمەيتىن, الىسقا كوز تىگىپ تۇراتىن, دەيدى ول. وسى جاعداي قايتالانا بەرگەن سوڭ اكە-شەشەسى بالانىڭ قۇلاعى مۇكىس دەپ كۇدىكتەنگەن دە ەكەن. دارىگەرلەر بالانى تەكسەرە كەلە, ەستۋ قابىلەتىن جاقسارتۋ ءۇشىن ادەنويدىن الىپ تاستاۋدى ۇسىنادى. الايدا, بالاسىنىڭ جاعدايى قۇلاققا ەمەس, ميىنا بايلانىستى ەكەنىن ىشكى ءبىر انالىق تۇيسىكپەن سەزگەندىكتەن مەي بۇعان كەلىسپەيدى. «ول باسقا الەمدە جۇرەتىن. قازىر دە سويتەدى. بىراق وعان ەندى كوڭىل اۋدارمايمىن. ويتكەنى ونىڭ جاڭا زىمىران نەمەسە سول ىسپەتتى جاڭا تەحنولوگيانى ويشا جاساپ جاتقانىن بىلەمىن» دەيدى شەشەسى. ماسك بالا كۇنىنەن ءوزىنىڭ ويعا العان دۇنيەسىن ءار تەتىگىنە دەيىن انىق كورە الاتىن قابىلەتكە يە. مۇنى بۇگىنگى ينجەنەرلىك گرافيكامەن سالىستىرۋعا بولادى. ياعني ويىنداعى دۇنيە مەن كوز الدىنداعى بەينەنىڭ الگوريتمدىك بايلانىسىن, جەدەلدىگىن, تىنىسىن, كينەتيكالىق قۋاتىن, نىسانعا اسەرىن انىق كورەتىن تابيعي دارىنى بار. سونداي-اق ەرتە جاستان كىتاپتان اجىرامايتىن وقىمىستىلىعى دا ەرەكشە. باۋىرى كيمبال بالا ماسك كۇنىنە ون ساعاتتان, دەمالىستا ءبىر كۇندە ەكى كىتاپتان وقىعانىن ايتادى. بىردە دۇكەن ارالاۋعا شىققان اتا-اناسى يلوننان كوز جازىپ قالادى. دەرەۋ مەي مەن كيمبال كەلگەن ىزدەرىمەن كەرى ءجۇرىپ ىزدەستىرگەندە, جاقىن جەردەگى كىتاپ دۇكەنىندە ەدەندە وتىرىپ, بار دۇنيەنى ۇمىتىپ كىتاپ وقۋعا كىرىسىپ كەتكەن ونى تاۋىپ الادى. ول وسە كەلە ساباقتان سوڭ بىردەن كىتاپ دۇكەنىنە تارتاتىن دا, ءتۇس الەتىنەن كەش تۇسكەنگە دەيىن ءتۇرلى كوركەم ادەبيەتتى, كوميكستەردى, تانىمال عىلىمي كىتاپتاردى وقىپ وتىرا بەرەتىن. «كەيدە مەنى دۇكەننەن قۋىپ شىعاراتىن, بىراق كوبىنە كوپ تيىسپەۋشى ەدى» دەيدى يلون. ونىڭ ءسۇيىپ وقيتىن كىتاپتارىنىڭ ىشىندە «گالاكتيكاعا اۆتوستوپپەن», «ساقينالار ءامىرشىسى», سونداي-اق ايزەك ازيموۆتىڭ, روبەرت حاينلايننىڭ كىتاپتارى بولدى. مەكتەپ پەن اۋداندىق كىتاپحانا اۋقىمىنان اسىپ, 3-4 سىنىپتاردا بريتان ەنتسيكلوپەدياسىن وقي باستايدى. «بۇل وتە پايدالى! ويتكەنى سەن ءوزىڭنىڭ نە بىلەتىنىڭدى بىلمەيسىڭ. جان-جاعىڭدا قانشاما دۇنيە بار ەكەنىن تۇسىنە باستايسىڭ» دەيدى ول. يلون سىنىپتاعى ەڭ بىلگىر بالا اتانادى. تۇسكى استا قارىنداسى توسكا جەر مەن ايدىڭ اراسىنداعى قاشىقتىققا قىزىعۋشىلىق بىلدىرسە, اعاسى بىردەن پەريگەي مەن اپوگەيىن ناقتى ەسەپتەپ بەرەدى. «ەگەر بىردەڭە كەرەك بولسا, ءبىزدىڭ دانىشپاننان سۇراي سال» دەگەن ءسوزدى توسكا ءجيى ايتاتىن. بىراق وقىمىستىلىعىنا قاراي يلون سپورتقا مۇلدەم قىرسىز بولدى. اۋلاداعى, كوشەدەگى بالالار دا ونىمەن وينامايتىندىقتان وقشاۋلانا ءتۇستى. سىنىپتاستارىنىڭ ءبىرى گيدەون فۋرە «شىنىن ايتقاندا ونىڭ ميللياردەر بولاتىن بىردە-ءبىر بەلگىسىن بايقامادىق» دەپ اعىنان جارىلادى. جاقىن دوستارى بولماسا دا ونىڭ وعاشتاۋ كورىنەتىن قىزىعۋشىلىقتارىن كەي قاتارلاستارى ۇمىتپاعان ەكەن. سولاردىڭ ءبىرى تەد ۆۋن ماسكتىڭ مەكتەپكە زىمىران مودەلىن الىپ كەلىپ, ۇزىلىستە ۇشىرعانىن ايتادى. اۋەسقويلار اراسىندا كەڭىنەن بەلگىلى ۇشىراتىن قۇرىلعىسى بار «ەستەس» سياقتى ويىنشىق زىمىراندار وڭتۇستىك افريكادا ساتىلماعاندىقتان, يلون راكەتالاردى ءوزى جاساپ الاتىن. سونداي-اق مەكتەپتەگى پىكىرتالاستاردىڭ بىرىندە قازبا وتىنداردى قولدانۋعا قاتتى قارسىلىق ءبىلدىرىپ, جەردىڭ تابيعي رەسۋرستارىن ءوندىرۋ ساياساتىنىڭ بۇرىستىعىن, كۇن ەنەرگياسىن پايدالانۋدىڭ دۇرىستىعىنا نازار اۋدارتادى. ال تەرەنسي بەني ەسىمدى سىنىپتاسى يلوننىڭ مەكتەپتە-اق وزگە عالامشارلىقتاردى وتارلاۋ تۋرالى قيالدايتىنىن جەتكىزگەن.
ماسك 10 جاسقا تولار كەزدە يوحاننەسبۋرگ گيپەرماركەتىنەن العاش رەت كومپيۋتەردى كوردى. جوعارى ساپالى ەلەكترونيكا دۇكەنىنىڭ بۇرىشىندا تۇرعان بىرنەشە عاجايىپتاردى ءارى-بەرى اينالىپ, اربالىپ قالعان بالا 1980 جىلدارى ساتىلىمعا شىققان Commodore VIC-20 كومپيۋتەرىن قوياردا قويماي اكەسىنە العىزادى. ساتۋشىلار 5 كيلوبايت جادى بار كومپيۋتەردى مەڭگەرۋگە جارتى جىل جۇمساۋ كەرەك دەسە, كۇنى-ءتۇنى كوز الماعان بالا ءۇش-اق تاۋلىكتە كومپيۋتەردىڭ قوياسىن اقتارىپ, وزدىگىنەن ۇيرەنىپ الادى.
وسىلايشا, الاڭسىز بالالىق شاق العا وزا بەرەر مە ەدى, اكە-شەشەسى اجىراسقان سوڭ مەي ءۇش بالاسىمەن قالا سىرتىنداعى ۇيگە كوشەدى. ءبىر جىلدان كەيىن يلون اكەسىمەن بىرگە تۇرۋعا شەشىم قابىلدايدى. جالپى, يلوننىڭ اكەسى ەررولدىڭ وڭتۇستىكافريكالىق رەتىندەگى تامىرى تەرەڭدە. ەررولدىڭ اكەسى ۋولتەر گەنري دجەيمس ماسك ارميا سەرجانتى بولسا, شەشەسى كورا امەليا ماسك انگليادا زيالىلار وتباسىندا تۋىپ-وسكەن ەكەن. ءىرى كەڭسە عيماراتتارى, ساۋدا ۇيلەرى مەن تۇرعىن ۇيلەردى جوبالايتىن قۇرىلىستاردا ينجەنەر بولعان ەررول بالالارىن شەتەلدەرگە ءجيى ساپارعا الىپ شىعادى. الايدا بالالارىنا قاتال بولعانى سونشالىق, يلون اقش-قا كەتەيىك دەي بەرگەن سوڭ بىردە قىزمەتشىنى بوساتىپ, «امەريكالىق بولۋدىڭ» قانداي ەكەنىن ءبىلسىن دەگەن نيەتپەن ءۇي شارۋاسىن بالاسىنا ارتىپ قويادى. جالپى, يلون اكەسى تۋرالى كوپ شەشىلە بەرمەيدى. كەيىن ايەلى دجاستينمەن بىرگە بالالارىن دا اتاسىمەن كەزدەستىرمەۋگە كۇش سالادى.
1980 جىلدار وڭتۇستىك افريكادا قىلمىس ءورشىپ تۇرعان ەدى. ونىڭ ۇستىنە پرەتوريادان يوحاننەسبۋرگكە دەيىنگى ەڭ قاۋىپتى باعىت سانالاتىن جولعا يلون ءىنىسى كيمبالمەن بىرگە پويىزبەن ساياحاتتايدى. جول بويى كوپ دۇنيەگە قانىققان بالالار كەيىننەن بۇل ساپاردىڭ تاۋەكەلگە بەل بۋعا باۋلىعانىن ايتادى. سول سياقتى اعايىندىلار بولەلەرى (كەيدىڭ بالالارى) راسا, ليندون, پيتەر ريۆپەن بىرگە تالاي قىزىقتى وقيعالاردى باستان كەشەدى. بىردە پاسحا جۇمىرتقالارىن بوياپ, اۋقاتتى كورشىلەرىنە ساتسا, تاعى بىردە حيميا قوسىندىلارىمەن جارىلعىشتار جاساپ ءماز بولىستى. ءتىپتى ويىن اۆتوماتتارى زالىن اشىپ كاسىپپەن دە اينالىسىپ كورمەك بولدى. 13-16 جاستارىندا يوحاننەسبۋرگتەگى كەشتەر مەن ەرەكشە ويىندارعا دا قاتىستى. سپورتقا جوقتىعىنان بۇزاقىلاردان تاياق تا جەدى.
جالپى, ماسك بىرنەشە ەليتالىق مەكتەپتە اۋىسىپ وقىعانىمەن سىنىبىندا ۇزدىكتەر ساناتىندا بولعان ەمەس. بىراق فيزيكا مەن ماتەماتيكا سياقتى پاندەردە وتە وزىق بولدى. وزدىگىنەن بەيسيك, كوبول, پاسكال سياقتى باعدارلامالاۋ تىلدەرىن جەتىك مەڭگەرىپ الدى جانە عىلىمي-فانتاستيكالىق ادەبيەتتەرگە جاقىن بولۋىنىڭ اسەرىنەن بولار, «ساقينالار ءامىرشىسى» سياقتى ويعا سىيمايتىن زاتتار مەن ايداھارلار تاريحى ىسپەتتى دۇنيەلەر جازعىسى كەلەتىن. بىردە مۇلدەم ءمان بەرمەگەن ءبىر ءپان ءۇشىن كەلەسى سىنىپقا كوشپەيتىندىگى تۋرالى ايتقاندا, اڭ-تاڭ بولعان ماسك اتالعان ءپاندى وقىپ ەڭ جوعارى بالل جينايدى.
ماسك 17 جاسىندا وڭتۇستىك افريكادان كاناداعا كەتتى. ودان ءسال بۇرىن پرەتوريا ۋنيۆەرسيتەتىندە ءتۇسىپ, فيزيكا مەن ماشينا قۇرىلىسىن زەرتتەي باستاعانىمەن, بەس ايدان كەيىن تاستاپ كەتتى. ايتۋىنشا, اتالعان وقۋ ورنىندا كانادالىق قۇجاتتار كەلگەنشە ۋاقىت وتكىزۋگە تۋرا كەلگەن. تاعى ءبىر نۇسقا – مىندەتتى اسكەري بورىشىن وتەۋدەن جالتارۋ ءۇشىن بولۋى مۇمكىن. ول ۇزاق ۋاقىت بويى ارمانداعان امەريكاعا بىردەن نەگە بەت تۇزەمەدى دەگەن ساۋال تۋادى. زاڭنامانىڭ وزگەرۋىنە بايلانىستى مەيدىڭ بالالارىنا كانادا ازاماتتىعىن الۋعا مۇمكىندىك الۋىنىڭ قاتىسى بولۋى مۇمكىن. ال ماسك ءباسپاسوز ءماسليحاتتارىندا مۇنى اتا-بابالارىنىڭ جولىمەن جۇرۋگە بالايدى. دەسە دە كومپيۋتەر مەن تەحنيكاعا دەگەن ولشەۋسىز ىڭكارلىك يلون ماسكتى كرەمني جازىعىنا قاراي تارتاتىن دا تۇراتىن...
دۋمان اناش,
«ەگەمەن قازاقستان»
(جالعاسى بار)
