قازاقستاننىڭ تۇكپىر-تۇكپىرىندەگى ءداستۇرلى ءانشى-تەرمەشى, كۇيشىلەردىڭ باسىن ءبىر ارنادا توعىستىرىپ, ەلىمىزدىڭ ءار ايماعىندا قالىپتاسقان ونەر مەكتەپتەرىنىڭ تاڭداۋلى تۋىندىلارىن دارىپتەۋ ماقساتىندا ۇيىمداستىرىلعان بايقاۋ, اتادان-بالاعا مۇرا بولىپ كەلە جاتقان ءتول ونەرىمىز كۇي, جىر-تەرمەنى دامىتىپ, زامانعا ساي جاڭاشالاندىرىپ, وسكەلەڭ ۇرپاققا ناسيحاتتاۋدى كوزدەيدى.
ايتا كەتەيىك, قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترىلىگىنىڭ قولداۋىمەن «Qazaqstan» رترك» اق بىرلەسىپ 2017 جىلى «مەن قازاقپىن» اتتى حالىقارالىق تەلەۆيزيالىق مەگاجوباسىن جۇزەگە اسىرعان بولاتىن.
«Qazaqstan» رترك اق باسقارما توراعاسى ەرلان قارين بيىل, «مەن قازاقپىن» جوباسىنا ەلىمىزدىڭ 14 ايماعىنان, 170 اۋدان قاتىسادى دەپ جوسپارلانىپ وتىرعانىن تىلگە تيەك ەتتى.
«سونداي-اق, ادەتتەگىدەي شەتەلدەگى قانداستارىمىزدى تارتۋ ءۇشىن رەسەيدىڭ استراحان, موڭعوليانىڭ بايان-ولگەي جانە قىرعىزستاندا ۇيىمداستىرۋ جۇمىستارىن جۇرگىزەتىن بولامىز. بۇل جوبا ۇلتتىق ءتول ونەرىمىزدى دامىتۋ عانا ەمەس, جاڭا ەسىمدەر اشۋمەن قاتار, ەلىمىزدەگى ءانشى-تەرمەشىلەر مەن كۇيشىلەردىڭ ونەرىن كەڭىنەن ناسيحاتتاۋ», دەدى ول.
وتكەن جىلى, بۇل اۋقىمدى جوباعا 3000-نان استام ۇمىتكەر ءوتىنىش ءبىلدىرىپ, وبلىستىق ىرىكتەۋگە 700-دەي ادام قاتىسقان بولاتىن. ال, استانادا وتكەن تەلەۆيزيالىق جوباعا 57 ونەرپاز باق سىناسىپ, ونەرلەرىن ورتاعا سالدى. ءۇش ايعا سوزىلعان تەلەۆيزيالىق بايقاۋدا ءانشى, كۇيشى, تەرمەشىلەردىڭ ۇزدىگىن انىقتاۋعا قازىلار القاسىمەن بىرگە كورەرمەندەر دە داۋىس بەرۋ ارقىلى اتسالىستى. وسىلايشا «مەن قازاقپىن» مەگاجوباسىنىڭ ءبىرىنشى ماۋسىمداعى شىعارىلىمى تاۋەلسىزدىك كۇنى قارساڭىندا مارەگە جەتتى. جەڭىمپازداردى ماراپاتتاۋ استانا قالاسى ورتالىق كونتسەرت زالىندا ءوتىپ, فيناليستەر جانە ونەر شەبەرلەرىنىڭ قاتىسۋىمەن گالا كونتسەرت ءوتتى. حالىقارالىق دەڭگەيدە ۇيىمداستىرىلعان «مەن قازاقپىن» مەگا جوباسىنا ونەرپازداردى تارتۋ ءۇشىن شەت ەلدەرگە ءىسساپار ۇيىمداستىرىلىپ, قىتاي, رەسەي, موڭعوليا ەلدەرىندە تۇراتىن قانداستارىمىز دا ونەرلەرىن كورسەتۋىگە مۇمكىندىك العان بولاتىن.
جيىنعا قاتىسقان مىرزاتاي جولداسبەكوۆ جاھاندانۋ زامانىن دا اركىمنىڭ شىلاۋىندا كەتىپ قالماۋ ءۇشىن, دەربەستىگىمىزدى, ۇلتتىق كودىمىزدى, اتادان جەتكەن اسىل مۇرامىزدى ساقتاۋ كەرەكتىگىن العا تارتتى.
«اتالعان جوبانى ۇيىمداستىرۋداعى نەگىزگى مىندەت وسى دەپ ەسەپتەيمىن. ءبىزدىڭ بالا كەزىمىزدە مۇنداي اقپارات قۇرالدارى جوق. ۇلكەندەردىڭ ايتقان ەرتەگى جىرلارىمەن ەرجەتتىك. ءوز باسىم مايلىقوجانىڭ وسيەتىمەن ءوستىم دەپ ايتا الامىن. ويتكەنى اقىل مەن پاراساتتا, قايىرىمدىلىقتا سوندا», دەدى م.جولداسبەكوۆ.
سونداي-اق, جوبا اياسىندا ءار ءوڭىردىڭ تاريحىنا, ەل ىشىندەگى اعايىننىڭ تۇرمىس-تىرشىلىگىنە بايلانىستى 20 فيلم دايىندالىپ, ەفيرگە شىققان ەدى. ايتا كەتەيىك, شىعارماشىلىق ۇجىمنىڭ ەڭبەگى لايىقتى باعالانىپ بيىل وتكەن «تۇمار» ۇلتتىق تەلەۆيزيالىق بايقاۋىندا «ۇزدىك ويىن-ساۋىق جوبا» اتالىمىن جەڭىپ الدى.
راۋان قايدار,
«ەگەمەن قازاقستان»
