01 جەلتوقسان، 2011

حالىقتىڭ ۇلى تاڭداۋىنا – جيىرما جىل!

211 رەت كورسەتىلدى

وسىدان ءدال جيىرما جىل بۇرىن،  1991 جىلعى

1 جەلتوقساندا قازاقستان حالقى نۇرسۇلتان نازارباەۆتى ەلدىڭ تۇڭعىش پرەزيدەنتى ەتىپ سايلادى.

ەلدىك ەرلىگى

ءار ەلدىڭ تاريحىندا بەلەستى وقيعالار بولادى. سول بەلەستى وقيعالاردى باستاپ بەرەتىن ۇلى كۇندەر بولادى. 1991 جىلدىڭ 1 جەلتوقسانى ءبىز ءۇشىن سونداي كۇن. رەسمي تۇردە العاندا ول كۇنى قازاق كەڭەستىك سوتسياليستىك رەسپۋبليكاسىنىڭ پرەزيدەنتىن سايلاۋ وتكىزىلدى. بىراق بۇل رەسمي تۇردە عانا. بو­داندىقتىڭ كۇنى انە-مىنە باتاتىنىن، تاۋەل­سىز­دىك تاڭىنىڭ انە-مىنە اتاتىنىن اركىم دە ءبىلىپ وتىردى. ول كۇندى بۇكىل حالىق كۇتىپ وتىر­دى.  شىن مانىندە ول كۇنى بولاشاق تاۋەلسىز قا­زاقستاننىڭ تاعدىرىن ايقىن­دايتىن ازامات­تىڭ جولى اشىلاتىنى بارشاعا بەلگىلى ەدى. 1991 جىلعى 1 جەلتوقسان كۇنى سايلاۋ ۋچاسكەلەرىنە كارى دە، جاس تا اعىلدى. سايلاۋشىلار تىزىمىنە جازىل­عان­داردىڭ  88،28  پايىزى داۋىس بەرۋگە كەلدى. بۇل – 8 ميلليون 788 مىڭ 762 ادام. ولاردىڭ 98،78 پايىزى داۋىسىن نۇرسۇل­تان نازارباەۆقا بەردى. بۇل  – 8 ميلليون 681 مىڭ 276 ادام. نۇرسۇلتان ءابىش ۇلى نازارباەۆ ەلىمىزدىڭ تۇڭ­عىش پرەزيدەنتى بولىپ سايلاندى. بۇكىل­حالىقتىق  قول­داۋعا يە بولدى. سودان بەرى ەلباسىمىزدىڭ جەڭىستى  جولى جەمىستى جالعاسىپ كەلەدى. نۇرسۇلتان نازارباەۆ وسى جيىرما جىلدىڭ ىشىندە ەلىم دەگەن، جەرىم دەگەن، ەلىنىڭ، جەرىنىڭ قامىن جەگەن ەر ەكەنىن كۇنبە-كۇن كورسەتىپ كەلەدى. سودان بەرگى  جەتى مىڭ  ەكى ءجۇز توقسان بەس  كۇن مەن ءتۇننىڭ  بارىندە دە ەل تىلەۋىن تىلەگەن ەر جۇرەگى ەر تىلەۋىن تىلەگەن ەل جۇرەگىمەن بىرگە سوعىپ،  قازاقستان اتتى ەلدىڭ بولاشاقتى بەتكە العان ۇلى كوشىن ءبىر بەلەستەن ءبىر بەلەسكە اسىرۋمەن كەلەدى. تاعى دا اي­تامىز: نازارباەۆ قازاقتىڭ ەسىكتەگى باسىن تورگە شىعارىپ بەردى. ءبىز وسى­دان شيرەك عاسىر بۇرىن عانا ماسكەۋ «وسى باس­قارىپ بايقاسىنشى» دەپ ەكسپە­ري­مەنت جاساي الاتىن، ءسويتىپ، قازاق جەرىنە تابانى ءتيىپ كورمەگەن كولدەنەڭ كوك اتتىنى ءبىراۋىزدان سايلاتا سالاتىن كەڭەستىك رەس­پۋبليكا ەدىك. نازارباەۆتىڭ باسشىلىعىمەن سول كەڭەستىك رەسپۋبليكادان تاۋەلسىز مەملەكەت، ەگەمەن ەل جاسالدى. ەل بولعاندا دا قا­تارداعى ەل ەمەس، ەگەمەن­دى­گىنىڭ جيىرما جىلدىعىنا دا جەتپەي جاتىپ ەۋرو­پا­نىڭ تورىنە كوتەرىلىپ، كارى قۇرلىققا توبەبيلىك ەتكەن ەل جاسالدى. حالىق ءىسى جولىنداعى قاھارماندىق دەگەن وسىنداي بولماعاندا ەندى قانداي بولادى؟ ادەتتە سايلاۋ داۋىسقا تۇسكەن ادامدى سىنعا سالادى دەيمىز. ول راس. سونىمەن بىرگە كەز-كەلگەن سايلاۋ وعان قاتىسۋشىلاردى دا سىنعا سالادى. حالىقتىڭ ادام تانۋى سىنعا تۇسەدى وندايدا. ەلدىڭ ەلدىگى سىنعا تۇسەدى وندايدا. 1991 جىلعى 1 جەلتوقساندا قازاقستان جۇر­تى تا­ريحتىڭ سول سىنىنا ءتۇستى. حالقىمىز ابى­روي­مەن شىقتى ول سىننان. سايلاۋعا كەلۋىمەن دە، لايىقتى ەرگە داۋىس بەرۋىمەن دە دانالىعىن، دارالىعىن، كەڭ­دىگىن، كەمەڭ­گەر­لىگىن كورسەتتى. ەلدىكتىڭ ەرلىگىن تانىتتى. سودان بەرگى جيىرما جىلدىڭ ىشىندە قازاقستان حالقى ەلدىڭ باعىنا تۋعان ەردىڭ ءتوڭى­رەگىنە توپتاسىپ، ەكى تىزگىن، ءبىر شىلبىردى بەرىپ، ازاماتىم، ار­دا­عىم دەپ سەنىپ، ەلباسىنا ەرىپ كەلەدى، تاۋەلسىزدىكتىڭ ريزىعىن تەرىپ كەلەدى، كەلەشە­گىنىڭ كەمەل بولارىنىڭ كەپىلىن كورىپ كەلەدى. سولاي بولا دا بەرەدى. سول ءۇشىن ەلگە دە راحمەت، ەرگە دە راحمەت. بەرەكەمىزدىڭ باستاۋى بولعان بۇل كۇندى مەرەكە دەۋدىڭ دە، ونى مەرەكەلەۋدىڭ دە ەش ارتىقتىعى جوق. ويتكەنى، بۇل كۇن – ءبىزدىڭ ءوز تاڭداۋىمىزدى ءوزىمىز جاساۋىمىزدى، ءسويتىپ،  ءوز تاعدىرىمىزدى ءوزىمىز شەشۋىمىزدى باستاپ بەرگەن كۇن. بۇل كۇن  – تاريحىمىزدا تۇڭعىش رەت بۇكىل حالىق بولىپ پرەزيدەنت سايلاعان كۇنىمىز. ەلدىكتىڭ جولىنداعى ەڭ العاشقى قا­دامىمىزدى جاساعان كۇنىمىز. ءبىزدىڭ ۇلى كۇنىمىز. مەرەكە قۇتتى بولسىن!

ساۋىتبەك ابدراحمانوۆ.

  «بولاشاق!» دەپ بەرگەم سوندا داۋسىمدى   زامانالار الماستى، ءتۇن قۇشاعىن تاڭعا اشتى. ازات ەلگە سايلاندى، پرەزيدەنت العاشقى.   تاۋەلسىزدىك ورنادى، شاتتىقتا شەك بولمادى. پرەزيدەنتىن العاشقى، بۇكىل حالىق قولدادى.   كىم ۇمىتار بۇل كۇندى، جۇرەك تولقىپ، بۇلقىندى. پرەزيدەنت العاشقى، ەل تۋىمەن ءبىر تۇردى.   تاس جارارداي تولقىنى، تاۋ بۇزارداي سەرپىنى. ەلباسىمەن ەڭ العاش، بيىكتەدى ەل تۋى.   جاقسىلىقتار جالعاستى، تالابىمىز تاۋعا استى. ەل مەرەيىن كوتەردى، ەلباسىمىز العاشقى.   بار حالىقپەن تۋىستىق، بار ۇلتپەن ۇعىستىق. ەلباسىمەن ورنادى، ەلدە بىرلىك، تىنىشتىق.   بار جاقسىمىز جاعىمدى، ەلباسىمەن تانىلدى. جارقىراعان عاجايىپ، جاڭا استانا سالىندى.   تابىسقا بار مىڭ نەگىز، قول سوزامىز كۇنگە ءبىز. ەلباسىمەن ەڭ العاش، بەكىتىلدى ىرگەمىز.   جانىنىڭ كوپ جارىعى، جانعان لاۋلاپ جالىنى. ەلباسىمەن ەڭ العاش، ەلىمدى الەم تانىدى.   جارقىراعان كوگىڭدە، جانعا قۇرمەت، سەنىم دە. ەلباسىمەن بيىكتەپ، بارا جاتىر ەلىم دە! ماحمۇتباي امىرە ۇلى، قازاقستان جازۋشىلار وداعىنىڭ مۇشەسى. قىزىلوردا.
سوڭعى جاڭالىقتار

تارازى باسى تەڭ

سپورت • بۇگىن، 20:30

العاشقى كۇنى – ەكى قولا

سپورت • بۇگىن، 20:25

التىننان القا تاقتى

سپورت • بۇگىن، 20:25

ۇقساس جاڭالىقتار