بيىل قازاقستان مەن امەريكا اراسىنداعى ديپلوماتيالىق قاتىناستار تاريحىنىڭ ماڭىزدى وقيعالارىنىڭ ءبىرى – قازاقستان رەسپۋبليكاسى پرەزيدەنتىنىڭ اقش-قا ساپارىنان باستالدى. ۇستىمىزدەگى جىلدىڭ 16–18 قاڭتارىندا نۇرسۇلتان نازارباەۆ رەسمي ساپار بارىسىندا اقش پرەزيدەنتى دونالد ترامپپەن, سونداي-اق اقش-تىڭ رەسمي جانە ىسكەر توپتار وكىلدەرىمەن كەزدەستى. بۇعان قوسا, قازاقستان پرەزيدەنتى بۇۇ قاۋىپسىزدىك كەڭەسىنىڭ وتىرىسىنا توراعالىق ەتتى.
ساپار بارىسىندا 20-دان استام اۆياتسيا جانە عارىشتى زەرتتەۋ, مۇناي-حيميا جانە اۋىلشارۋاشىلىق سالالارىنداعى جوبالاردى, سونىمەن قاتار قۇنى 7 ملرد-تى قۇرايتىن ينفراقۇرىلىمدى دامىتۋ سالاسىنىڭ جوبالارىن جۇزەگە اسىرۋعا باعىتتالعان ينۆەستيتسيالىق جانە ساۋدا-ەكونوميكالىق ىنتىماقتاستىق تۋرالى كوممەرتسيالىق قۇجاتتارعا قول قويىلدى. مەملەكەت باسشىسى اقش-قا رەسمي ساپار اياسىنداعى كەزدەسۋلەردى قورىتىندىلاي كەلە:
– ساپار ءساتتى بولدى. ەڭ باستىسى – ناقتى ماسەلەلەر بويىنشا ناقتى كەلىسىمدەر جاسالدى.
اقش پرەزيدەنتى دونالد ترامپ نۇرسۇلتان نازارباەۆقا كەزدەسۋدەن ەستەلىك رەتىندە گولف سپورتىنىڭ دوبى مەن تاياعىن تارتۋ ەتتى. دونالد ترامپتىڭ گولف سپورتىنىڭ تانىمال جانكۇيەرى جانە بىرنەشە گولف كلۋبىنىڭ قوجايىنى ەكەنى بارشاعا ءمالىم. امەريكا پرەزيدەنتى گولف ويىنى – ءومىرىنىڭ اجىراماس بولىگى ەكەنىن تالاي رەت ايتقان بولاتىن:
– ءار ادام بوس ۋاقىتىن وزىنشە وتكىزەدى. قاۋىرت جۇمىس اراسىندا شارشاعانىڭدى باسىپ, ويىڭدى جيناقتاعان دۇرىس. سوندىقتان دا گولف ويىنىن جاقسى كورەمىن. بۇل – ويعا شومۋمەن بىرگە ءوزىڭدى ەركىن ۇستاپ, بويىڭدى سەرگىتۋگە ارنالعان ويىن. گولف مەنىڭ شىعارماشىلىعىمدى وياتىپ, ومىرىمە قاتىستى ماسەلەلەردى وڭتايلى شەشۋىمە مۇمكىندىك بەرەدى. بۇل – عاجايىپ سپورت ءتۇرى.
امەريكا پرەزيدەنتتەرىنىڭ بارلىعى دەرلىك وسى ويىننىڭ جانكۇيەرلەرى. سوڭعى 130 جىلدىڭ ىشىندە امەريكانى باسقارعان ەكى پرەزيدەنت قانا گولف ويناماعان ەكەن. تاريحتا ەڭ العاش گولف تاياعىن قولىنا العان امەريكا پرەزيدەنتى – اقش-تىڭ 25-ءشى پرەزيدەنتى ۋيليام ماك-كينلي (1897–1901 جج.) بولدى. گولفتىڭ ەڭ جىلدام ويىنشىسى اتاعىنا 41-ءشى پرەزيدەنت ۇلكەن دجوردج بۋش (1989–1993 جج.) يە بولعان. د. بۋش – گولف داڭقى زالىنا ەنگىزىلگەن جالعىز پرەزيدەنت. اق ءۇيدىڭ ەڭ ناتيجەلى گولف ويىنشىسى دەپ اقش-تىڭ 42-ءشى پرەزيدەنتى بيلل كلينتوندى (1993–2001 جج.) اتايدى.
دۇنيەجۇزى بويىنشا گولفپەن 70 ميلليونعا جۋىق ادام شۇعىلدانادى. مۇنىڭ ءوزى رەسمي ويىنشىلار – سپورتشىلار جانە فەدەراتسيا مەن گولف كلۋبتارىنىڭ مۇشەلەرى.
گولفتىڭ زاماناۋي ويىنى مەن العاشقى گولف كلۋبتارى شوتلانديادان شىققان. مۇندا ويىننىڭ العاشقى جازباسى جانە 18 شۇڭقىرلى جۇيە ەرەجەلەرى جاسالعان. الدىن الا ويلاستىرىلعان قۇرىلىمدىق العاشقى تۋرنيرلەر شوتلانديانىڭ ءتۇرلى قالالارىندا وتكىزىلگەن. كوپ ۇزاماي گولف ويىنى جاپپاي انگليانىڭ اۋماعىنا, سودان سوڭ بۇكىل الەمگە تارالعان. بۇگىندە ماسسەلبورو يپپودرومىندا ورنالاسقان Old Links الاڭى گولفتىڭ ەڭ كونە الاڭى بولىپ سانالادى.
قازاقستان رەسپۋبليكاسىنداعى گولفتىڭ دامۋ تاريحى ازدى-كوپتى 20 جىلدى قامتيدى. گولف ويىنى قازاقستاندا ەلىمىزدىڭ پرەزيدەنتى نۇرسۇلتان نازارباەۆتىڭ قولداۋى مەن بەلسەندى اتسالىسۋىنىڭ ارقاسىندا پايدا بولىپ, دامىپ كەلەدى دەپ نىق سەنىممەن ايتا الامىز.
جىل سايىن الماتى قالاسىندا قازاقستان پرەزيدەنتىنىڭ كۋبوگىنە گولفتەن حالىقارالىق تۋرنير وتكىزىلەدى. جىلدان-جىلعا ويىنشىلار سانى ارتىپ, اۋقىمى كەڭەيىپ, باسەكەلەستىك كۇشەيۋدە. وعان قوسا ويىنشىلاردىڭ شەبەرلىگى شىڭدالىپ كەلەدى.
