2012 جىلى كاسىپكەر وتەمىس جۇماعاليەۆ "بيزنەستىڭ جول كارتاسى-2020" مەملەكەتتىك باعدارلاماسى اياسىندا جىلىجاي قۇرىلىسىنا 14 پايىزدىق مولشەرلەمەمەن سۋبسيديالاۋ تۇرىندەگى قولداۋعا يە بولعان. باعدارلاما اياسىندا مەملەكەت سۋبسيديانىڭ 7 پايىزىن تولەيدى. بيىل كوكتەمدە 2 گەكتار جىلىجايدان 30 تونناعا جۋىق كوكونىس جينالدى. وعان قوسا شارۋالار تىڭايتقىشتار ساتىپ الۋعا سۋبسيديا الادى. قازىر كاسىپكەردىڭ جىلىجايىنىڭ الاڭى ەكى گەكتار, وندا 30 ادام جۇمىس ىستەيدى. 2014 جىلدان بەرى مۇندا 200 توننا قىزاناق, 100 توننا قيار, 3 توننا ءتاتتى بولشار بۇرىشى ءوندىرىلدى.
2017 جىلى اتىراۋ وبلىسىندا "بيزنەستىڭ جول كارتاسى-2020" باعدارلاماسى بويىنشا 1 543,5 ملن تەڭگە ءبولىندى. 312 جوبا قارجىلاندىرىلىپ, 1210 جۇمىس ورنى قۇرىلدى.
اتالعان باعدارلاما بويىنشا تاعى ءبىر تابىستى جوبا اشىلدى. 711 مىڭ تەڭگە كولەمىندە قايتارىمسىز نەسيە العان كاسىپكەر ماحامبەت اۋدانى المالى اۋىلىنان وتباسىلىق دارىگەرلىك امبۋلاتوريا اشتى. ءبىر جىلدان بەرى حالىققا قىزمەت كورسەتىپ كەلەدى. "Start up-اكادەميا" جوباسى اياسىندا "دامۋ" قورىنىڭ اتىراۋ وبلىسىنداعى بولىمشەسى رايحان حايرۋلليناعا بيزنەس جوبا جاساپ, بايقاۋدا قورعاۋعا كومەكتەستى. سونىڭ ناتيجەسىندە كاسىپكەر ءىسىن دامىتۋعا ايماقتاعى كاسىپكەرلەردەن 150 مىڭ تەڭگە قولداۋ العان.
- بالالاردى دا, ۇلكەندەردى دە قابىلدايمىن. كۇنىنە ءۇش-ءتورت ادام كەلەدى. ماقساتىم ەمدىك ماسساجدى بارىنشا ءتيىمدى ەتۋ. مىسالى, ماسساج قالادا 4000 تەڭگە بولسا, مەندە 1000, 1500 تەڭگە. العا قاراي كەڭەيتىپ, جەر الىپ, ۇلكەن عيمارات سالعىم كەلەدى. مەملەكەتتىڭ قولداۋى بار جەردە بۇل ويىمنىڭ جۇزەگە اسارىنا سەنەمىن,-دەيدى رايحان حايرۋللينا.
ايتا كەتۋ كەرەك, مەملەكەتتىك باعدارلامالارمەن بىرگە اتىراۋ وبلىسىندا كاسىپكەرلىكتى قولداۋدىڭ وڭىرلىك باعدارلاماسى دا بار. مىسالى 2017 جىلى "بيزنەس ايماق" باعدارلاماسى بويىنشا جەرگىلىكتى بيۋدجەتتەن 350 ملن تەڭگە ءبولىندى. سول ارقىلى 67 بيزنەس جوبا جۇزەگە اسىپ, 123 جۇمىس ورنى قۇرىلدى. "التىن كەمە" باعدارلاماسى بويىنشا 304 ملن تەڭگەنىڭ 13 جوباسى ماقۇلدانىپ, 25 جۇمىس ورنى اشىلدى.
جەرگىلىكتى اتقارۋشى ورگاندار تاراپىنان شاعىن جانە ورتا بيزنەستى دامىتۋعا, ەكونوميكانى ديۆەرسيفيكاتسيالاۋعا بارلىق جاعداي جاسالىپ جاتىر. ايماق كاسىپكەرلەرىمەن كەزدەسۋدە وبلىس اكىمى نۇرلان نوعاەۆ مەملەكەت باسشىسىنىڭ تاپسىرمالارىن ورىنداۋ اياسىندا اتىراۋ وبلىسىندا مەملەكەتتىك ورگاندار بيزنەس كليماتتى جاقسارتۋعا جۇمىستانىپ جاتقانىن ايتتى. بۇل رەتتە شاعىن نەسيەلەۋ ارقىلى كاسىپكەرلىكتى قولداۋدىڭ مەملەكەتتىك, وڭىرلىك باعدارلامالارى قولدانىسقا يە.
