ۇلتتىق ەكونوميكا ءمينيسترى تيمۋر سۇلەيمەنوۆ پەن قارجى ءمينيسترى باقىت سۇلتانوۆ 2018 جىلعا ارنالعان نەگىزگى ماكرو كورسەتكىشتەر مەن بيۋدجەت پارامەترلەرى تۋرالى بايانداما جاسادى.
ۇلتتىق ەكونوميكا ءمينيسترى تيمۋر سۇلەيمەنوۆ 2017 جىلى اتاۋلى ءجىو 52,4 ترلن تەڭگە دەڭگەيىندە باعالانعانىن اتاپ ءوتتى. ول 558 ملرد تەڭگەگە ۇلعايعان. ناقتى ءوسىم 4% قۇراعان. 2018 جىلعى قاڭتار-اقپاندا ەكونوميكانىڭ ءوسىمى 4% قۇرادى.
2018 جىلى مۇنايدىڭ بولجامدى باعاسى ءبىر باررەلىنە $45-دان $55 دەيىن ۇلعايدى. مەتاللداردىڭ باعا يندەكسى 0,4% ارتتى.
«2017 جىلعى ناقتىلانعان بازانى ەسەپكە الا وتىرىپ, 2018 جىلى اتاۋلى ءجىو 57,2 ترلن تەڭگە كولەمىندە بولجانادى. بۇل تامىزدا ماقۇلدانعان كورسەتكىشتەن 1,3 ترلن تەڭگەگە ارتىق. ناقتى ءجىو 3,8% دەڭگەيىندە كۇتىلۋدە (ەسك. – بۇعان دەيىن 3,1% بولجاندى). جان باسىنا شاققانداعى ءجىو $9 200 دەيىن ۇلعايادى», — دەدى ۇلتتىق ەكونوميكا ءمينيسترى تيمۋر سۇلەيمەنوۆ.
بۇدان وزگە, ونەركاسىپتىڭ ءوسۋى 3,3% دەيىن ارتۋىمەن قايتا قاراستىرىلدى. بۇل وڭدەۋ ونەركاسىبىنىڭ كۇتىلەتىن اسا جوعارى وسىمىمەن — 5,1% بايلانىستى.
سونداي-اق, ەنەرگەتيكا مينيسترلىگىنىڭ بولجامدارى بويىنشا 2018 جىلى مۇناي ءوندىرۋ كولەمى 87 ملن توننانى قۇرايدى. مۇنايدىڭ الەمدىك باعالارىنىڭ ۇلعايۋىن جانە ەكونوميكانىڭ ءوسىمىن ەسكەرە وتىرىپ, ەكسپورت $54 ملرد دەيىن, ال يمپورت $34 ملرد دەيىن ارتادى.
ينفلياتسيا بۇعان دەيىن بەكىتىلگەن 5–7% دالىزىندە ساقتالادى.
تۇزەتىلگەن ماكروبولجام نەگىزىندە 2018 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى ناقتىلاندى.
«كىرىستەر (ترانسفەرتتەردى ەسەپكە الماعاندا) 2018 جىلى 5,7 ترلن تەڭگە كولەمىندە باعالانادى. بۇل بەكىتىلگەن جوسپارعا قاراعاندا 190 ملرد تەڭگەگە جوعارى. ۇلتتىق قورعا تۇسىمدەر بولجام بويىنشا 546 ملرد تەڭگەگە ۇلعايىپ جانە 2,6 ترلن تەڭگەنى قۇرايدى», — دەدى تيمۋر سۇلەيمەنوۆ.
جىل سوڭىنا ۇلتتىق قوردىڭ ۆاليۋتالىق اكتيۆتەرى $58,3 ملرد كولەمىندە بولجانىپ وتىر. بۇل ءجىو-گە قاتىستى 34,7% قۇرايدى.
قارجى ءمينيسترى باقىت سۇلتانوۆ, ءوز كەزەگىندە, بيىلعى جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسىن تانىستىردى, ول مەملەكەت باسشىسىنىڭ قازاقستان حالقىنا جولداۋلارىندا جانە پرەزيدەنتتىڭ 5 الەۋمەتتىك باستاماسىندا بەرگەن تاپسىرمالارىن ىسكە اسىرۋعا باعىتتالعان.
2018 جىلعا ارنالعان رەسپۋبليكالىق بيۋدجەتتىڭ بەكىتىلگەن كورسەتكىشتەرىن ناقتىلاۋعا ەلدىڭ وزگەرتىلگەن ماكروەكونوميكالىق كورسەتكىشتەر بولجامى نەگىز بولدى.
وسىلايشا, رەسپۋبليكالىق بيۋدجەت تۇسىمدەرى 181,4 ملرد تەڭگەگە ۇلعايتىلىپ, 8 759,7 ملرد تەڭگەنى قۇرادى. بۇل نەگىزىنەن مۇناي باعاسى مەن ءوندىرۋ كولەمىنىڭ ۇلعايۋى ناتيجەسىندە مۇنايعا ەكسپورتتىق كەدەندىك باجدارىنان سالىنعان تۇسىمدەر ەسەبىنەن بولدى.
2018 جىلعا ارنالعان رەسپۋبليكالىق بيۋدجەت شىعىستارى 417 ملرد تەڭگەگە ۇلعايىپ, 9 643 ملرد تەڭگەنى قۇرايدى. وسى قاراجات كولەمىنەن 292,5 ملرد تەڭگە مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جانە ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋلارىن ىسكە اسىرۋعا باعىتتالاتىن بولادى.
«مۇعالىمدەردىڭ جالاقىسىن 30-دان 50%-كە كوتەرۋگە 61,8 ملرد تەڭگە بولىنەدى, ءبىلىم بەرۋ تاپسىرىسىن 20 مىڭ گرانتقا ۇلعايتۋعا 5 ملرد تەڭگە ءبولۋ ۇسىنىلادى. مۇگەدەكتەر كۇتىمىمەن اينالىساتىن ادامدارعا جاڭا جاردەماقى بەرۋگە – 2,7 ملرد تەڭگە; اۋىلدىق ەلدى مەكەندەردى اۋىز سۋمەن قامتاماسىز ەتۋگە قوسىمشا 30,9 ملرد تەڭگە باعىتتالاتىن بولادى», — دەدى باقىت سۇلتانوۆ.
بۇدان وزگە, بيۋدجەت جوباسىندا پرەزيدەنتتىڭ تاپسىرمالارى مەن بۇرىن قابىلدانعان مىندەتتەمەلەر بويىنشا جالپى سوماسى 99,4 ملرد تەڭگەنى قۇرايتىن شىعىستار ەسكەرىلدى. باقىت سۇلتانوۆ اتالعان قاراجاتتار اياسىندا استانا (25 ملرد تەڭگە) جانە الماتى (10,7 ملرد تەڭگە) قالالارىن ودان ءارى دامىتۋ, اسكەري قىزمەتشىلەردى تۇرعىن-ۇيمەن قامتاماسىز ەتۋ (18,7 ملرد تەنگە) بويىنشا ءىس-شارالار مەن جوبالار قارجىلاندىرىلاتىنىن ايتتى.
