شىمكەنت قالالىق جۇقپالى اۋرۋلار اۋرۋحاناسىنا بەيسەنبىدەن باستاپ جەدەل ىشەك ينفەكتسياسى جانە ۋلانۋ دياگنوزىمەن اۋرۋلار تۇسە باستاعان. ناۋقاستاردىڭ باسىم بولىگى دارىگەرلەر كومەگىنە تۇندە جۇگىنگەن. ءسويتىپ جۇما كۇنى تۇسكە دەيىن 39 ناۋقاس اۋرۋحاناعا جاتقىزىلعان. وسى وقيعاعا بايلانىستى وتكىزىلگەن بريفينگ وڭتۇستىك قازاقستان وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايگۇل يمانالينا ناۋقاستاردىڭ 21-ءى –ەرەسەك, 11-ءى – ون ءتورت جاسقا دەيىنگى بالا جانە 7-ەۋى – ءجاسوسپىرىم ەكەنىن ءمالىم ەتتى.
«ۋلانعانداردىڭ اراسىندا جانساقتاۋ بولىمىندە جاتقىزىلعان ەكى ءجاسوسپىرىم بالا بولىمشەگە اۋىستىرىلدى. قازىرگى ۋاقىتتا جانساقتاۋ بولىمىندە جۇكتى ايەل عانا جاتىر. بارلىق ناۋقاستىڭ جاعدايى تۇراقتى, ولارعا ءتيىستى ەم-دوم كورسەتىلۋدە. اۋرۋحانادا توسەك ورىندارى جەتكىلىكتى. العاشقى ساراپتاۋلار ناتيجەسىندە ناۋقاستاردىڭ ءدامحانادا بالمۇزداق جەگەنى انىقتالىپ وتىر. ناۋقاستار ءبىر مەزگىلدە تۇسكەن جوق. كەيبىرى 1-2 كۇن بۇرىن دەنساۋلىقتارىنىڭ سىر بەرە باستاعانىن ايتۋدا», - دەيدى ول.
جۇكتى ايەلدىڭ دەنساۋلىعى دارىگەرلەردىڭ ءجىتى قاداعالاۋىنا الىنعان. وقو قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى جۇماعالي مەدەتوۆتىڭ مالىمدەۋىنشە, وسى جاعداي بويىنشا تەكسەرۋ جۇمىستارى باستالىپتى.
«دەپارتامەنتكە جۇما كۇنى ساعات 10:23-تە شىمكەنت قالالىق جۇقپالى اۋرۋلار اۋرۋحاناسىنان ء«جىتى ىشەك ينفەكتسياسى», گاستروەنتەريت دياگنوزىمەن ناۋقاستار تۇسكەنى جونىندە حابار كەلدى. بەرىلگەن حابارلامادا ناۋقاستاردىڭ كوبى شىمكەنت قالاسىنداعى «يۋجنوە» ءدامحاناسىنىڭ كيوسكىسىنەن بالمۇزداق جەگەن دەگەن مالىمەت كەلتىرىلگەن. سول بويىنشا ءبىز وبلىستىق قوعامدىق دەنساۋلىق ساقتاۋ دەپارتامەنتىنىڭ, قالانىڭ اۋداندىق باسقارما ماماندارىنان, وبلىستىق زەرتحانا ماماندارىنان بريگادا قۇردىق. ولار اۋرۋحاناعا تۇسكەندەر مەن بالمۇزداقتى ساتىپ العان جەرگە, ءوز قۇزىرەتتەرى شەڭبەرىندە, تولىق تەكسەرۋ جۇمىسىن جۇرگىزىپ جاتىر. سول جەردە جۇمىس ىستەيتىندەردەن ساراپتاما الىندى. ءبىر بريگادامىز جۇقپالى اۋرۋلار اۋرۋحاناسىنداعى ءار ناۋقاسپەن جەكە-جەكە سويلەسىپ, ماسەلەنىڭ سەبەبىن انىقتاۋدا. ولاردىڭ جەمىس دامدەس قۇيىلمالى بالمۇزداق جەگەنى بەلگىلى بولدى. تەكسەرۋ قاشان بىتەدى, سول كەزدە قورىتىندىسىن حابارلايمىز», - دەدى جۇماعالي مەدەتوۆ. سونداي-اق ول ساراپتاما قورىتىندىسى الداعى ءۇش كۇندە بەلگىلى بولاتىنىن ايتتى.
ۋلانعاندار سانى جونىندەگى مالىمەت جۇما كۇنى كەشكە قاراي وزگەردى. وبلىستىق ىشكى ىستەر دەپارتامەنتىنىڭ ء باسپاسوز قىزمەتى بالمۇزداقتان ۋلانعانداردىڭ سانى 41 ادامعا جەتكەنىن ءمالىم ەتتى. ازاماتتاردىڭ جاپپاي ۋلانۋى بويىنشا قىلمىستىق ءىس قوزعالعان.
«شىمكەنت قالالىق ءىىب ءال-فارابي اۋداندىق پوليتسيا بولىمىنە جۇقپالى اۋرۋلار اۋرۋحاناسىنان 41 ادام بالمۇزداقتان ۋلانعانى تۋرالى حابارلاما كەلىپ ءتۇستى. اتالعان جايت ءال-فارابي پوليتسيا بولىمىندە سوتقا دەيىنگى تەرگەۋدىڭ بىرىڭعاي تىزىلىمىنە «سانيتارلىق قاعيدالاردى نەمەسە گيگيەنالىق نورماتيۆتەردى بۇزۋ» بويىنشا تىركەلدى. ساراپتاما تاعايىندالدى. پوليتسەيلەر وقيعانىڭ ءمان-جايىن انىقتاۋدا», دەلىنگەن دەپارتامەنت حابارلاماسىندا.
ال قوعامدىق دەنساۋلىق ساقتاۋ كوميتەتىنىڭ ءباسپاسوز قىزمەتى ۋلانعان ادامداردىڭ بارلىعى جەكە كاسىپكەرگە تيەسىلى ساۋدا نۇكتەسىنەن جەمىس دامدەس بالمۇزداق جەگەنىن, الدىن الا بولجامعا سايكەس, بالمۇزداققا ارنالعان قوسپا ءۇي جاعدايىندا جاسالعانىن حابارلادى. ايتا كەتەلىك, جاعدايدى دەنساۋلىق ساقتاۋ مينيسترلىگى ءوز باقىلاۋىنا العان.
عالىمجان ەلشىباي,
«ەگەمەن قازاقستان»
