ەتنيكالىق كوشى-قوندى رەتتەۋگە ىقپال ەتۋ ماقساتىندا ءۇشىنشى رەت ءوتىپ وتىرعان شاراعا ەڭبەك جانە حالىقتى الەۋمەتتىك قورعاۋ, ىشكى ىستەر, سىرتقى ىستەر, دەنساۋلىق ساقتاۋ, ادىلەت مينيسترلىگى, استانا جانە الماتى قالالىق, وبلىستىق كوشى-قون پوليتسياسىنىڭ قۇرىلىمدىق بولىمشەلەرىنىڭ جاۋاپتى ماماندارى قاتىستى.
بۇگىنگى اكتسيا كەزىندە قۇزىرلى ورگان وكىلدەرى تاۋەلسىزدىك جىلدارى ەلىمىزگە كوشىپ كەلىپ, ءتۇرلى سەبەپتەرمەن 2016 جىلدىڭ 1 قاڭتارىنا دەيىن قازاقستان رەسپۋبليكاسىنىڭ ازاماتتىعىن الا الماي جۇرگەن ورالماندار مەن ەتنيكالىق قازاقتارعا «حالىقتىڭ كوشى-قونى تۋرالى» زاڭى مەن وزگە دە قاۋلى, نورماتيۆتىك قۇجاتتار اياسىندا ءتۇسىندىرۋ جۇمىستارىن جۇرگىزدى.
سونداي-اق جيىنعا مەملەكەتتىك ەمەس ۇيىم جەتەكشىلەرى, ورالماندارعا ارنالعان قوعامدىق بىرلەستىكتەردىڭ باسشىلارى قاتىسىپ, قانداستارىمىز ءدوپ كەلگەن قۇجاتتىق قيىندىقتار جايلى باياندادى. وڭىرلەردەگى قۇجاتسىز جۇرگەن اعايىننىڭ وكىلدەرى بەينەبايلانىس ارقىلى ءوز وتىنىشتەرىن ايتىپ, مەملەكەتتىك قۇزىرلى ورگان قىزمەتكەرلەرىنەن سۇراقتارىنا جاۋاپ الدى.
«تاۋەلسىزدىكتىڭ العاشقى جىلدارىنان باستاپ ەلىمىزگە كوشىپ كەلسە دە ءالى كۇنگە دەيىن قازاقستان ازاماتتىعىن الا الماي جۇرگەن اعايىندارىمىزدىڭ سانى از ەمەس ەكەن. ءبىز بۇگىنگى اكتسيا اياسىندا وسى ماسەلەلەر بويىنشا ۇسىنىستار ازىرلەيمىز. «نۇر وتان» پارتياسى ازاماتتىعىن الا الماي جۇرگەن قانداستارىمىزدىڭ ماسەلەسىن كوتەرىپ, قاتىستى مينيسترلىكتەرگە رەسمي حات جازادى. ءسويتىپ ءبىز وسى جونىندە ۆەدومستۆوارالىق كوميسسيانىڭ قۇرىلۋىنا ىقپال ەتكىمىز كەلەدى. ال ول كوميسسيا بۇگىنگى جيىندا كوتەرىلگەن ماسەلەلەردى شەشۋگە اتسالىسادى», دەيدى «نۇر وتان» پارتياسى رەسپۋبليكالىق قوعامدىق قابىلداۋ بولمەسى مەڭگەرۋشىسىنىڭ ورىنباسارى ارىستانعالي سانسىزباەۆ.
جينالىس سوڭىندا اكتسياعا قاتىسقان بەس مينيسترلىك پەن مەملەكتتىك ەمەس ۇيىم جەتەكشىلەرى بۇل ماسەلە تولىق شەشىلگەنگە دەيىن ارەكەت ەتۋ ءۇشىن, بىرلەسكەن كوميسسيا قۇرۋ بويىنشا ۇسىنىس قابىلداندى.
ايتا كەتەيىك, «نۇر وتان» پارتياسىنىڭ بىلتىر 14 شىلدەدە باستاعان «كوش كولىكتى بولسىن» رەسپۋبليكالىق اكتسياسى بۇعان دەيىن دە قانداستارىمىزدى «حالىقتىڭ كوشى-قونى تۋرالى» زاڭىنان حاباردار ەتۋ جانە قۇقىقتارىن قورعاۋ ماقساتىندا ەكى رەت وتكىزىلگەن بولاتىن.
