بۇرىنعى ۇزاق مەرزىمدى دوگما ەندى ۋاقىتشا ۇستەمدىك قۇراتىن وتپەلى دوگمالارمەن ورىن الماسۋدا. قىسقاسى, ازاماتتىق سانا قالىپتاسقان قاعيدالار ۇستەمدىگىنەن ارىلا الماي وتىر. ادام بىتكەن بانكتەردە ءوز ەسەپتەرىن اشىپ, بيزنەسكە ءوز اكتسياسىن سالىپ, ءوز قالتاسىنا ەشكىمگە قول سۇقتىرتپاي ءوزى يە بولۋعا تىرىسسا دا, ومىردە بولىپ جاتقاندارعا بايلانىستى ءوز كوزقاراسىن ءتۇيىپ, ءوز پىكىرىن قالىپتاستىرۋعا سونشالىقتى ىنتالى ەمەس. كوبىنە كوپ باسقالاردىڭ ىعىندا كەتۋگە بەيىم. ەكونوميكالىق ەمانسيپاتسيا وزىنە سايكەس الەۋمەتتىك-مورالدىق, رۋحاني-كوزقاراستىق ەمانسيپاتسياعا ۇلاسا الماي كەلەدى.
ءبىزدىڭ عاسىرداعى ەلەكترونيكالىك, قايتا قارۋلانۋ ادام تىرشىلىگىن قايتادان توبىرلاندىرىپ بارا جاتقانداي. ۇيىندە وڭاشا وتىرىپ تا, ءيىن تىرەسكەن كوشەدەگى كوپشىلىكتىڭ اراسىندا جۇرگەندەي, باسقالاردىڭ ىقپالىنان قۇتىلا المايسىڭ. كەز كەلگەن تەلەفون شىلدىرى سەنى ۇيىڭە ءورت تيگەندەي, ەسىگىڭدى ۇرى قاعىپ تۇرعانداي ابىگەرلەندىرە الادى. كىم كورىنگەن جەكە ومىرىڭە قول سۇعىپ, كوڭىل كۇيىڭدى كۇيزەلتىپ, ارىڭدى ساۋداعا سالىپ, كوزقاراسىڭا قىسىم, ادامدىق كۇش-جىگەرىڭە زورلىق-زومبىلىق جاساي الادى. سىرت قاراعاندا دەموكراتياشىل كورىنگەن ۇسىنىستاردىڭ ار جاعىندا دا: ء«بىزدى قولدا. ولاي ەتپە, بىلاي ەت!» – دەگەن الەۋمەتتىك وزبىرلىق قىلاڭ بەرەدى. قۇددى ءبىر تومەننەن نە قاپتالدان بوپسالاۋ جوعارىدان بوپسالاعانداي ەمەس, الەۋمەتتىك قىسىمعا جاتپايتىنداي. قايتكەن كۇندە دە, ءبىزدىڭ زامانداسىمىزدىڭ وزىمەن ءوزى قالىپ, ءوز جاعدايىن ءوزى ويلانىپ, نە ىستەپ, نە قىلاتىنىن, ەشكىمنىڭ ارالاسۋىنسىز, ءوزى انىقتاپ الۋىنا جاعدايى قالماي, ۋاقىتى جەتپەي بارادى. سوندىقتان كوبى نە كەرەكتىڭ ءبارىن يەمدەنىپ وتىرىپ, مۇقتاجدىقتان, كىم كەرەكتىڭ ءبارىن تاۋىپ وتىرىپ, جالعىزدىقتان ارىلا الار ەمەس.
جۇرتتىڭ ورتاسىندا ءجۇرىپ جۇرتتىڭ ءبارى جالعىزدىقتان جاپا شەگۋدە. پارادوكس. بىراق شىنى سولاي. سىرلاسارعا دوس, اقىلداسارعا اعايىن جوق. ونىڭ ەسەسىنە توبىرىنا ىلەستىرىپ اكەتكىسى كەلەتىن توپ كوپ. سوندىقتان دا ءداستۇرلى كوللەكتيۆيزمنەن گورى شىنايى پليۋراليزم كوبىرەك كەرەگىپ تۇر. ويتكەنى توپشىلدىق ادامنىڭ جەكە پىكىرى مەن جەكە باسىنىڭ مۇددەسىن باسا-كوكتەيدى. ال پليۋراليزم الۋان پىكىر يەلەرىنىڭ اراسىنان وزىڭە ۇقساس پىكىرلەس ىزدەتەدى. جەكە باسىڭنىڭ قادىرى مەن پىكىرىن ەشكىم ەزىپ-جانشىمايدى. ەندەشە وسىنداي قالتقىسىز سۇحباتتاس, قاياۋسىز پىكىرلەستىڭ ورنىن تەك كىتاپ قانا تولتىرا الادى. ونى وقىپ وتىرىپ, تەك ءوز زامانداستارىڭ مەن وتانداستارىڭ عانا ەمەس, جالپى ادامزاتتىڭ بۇگىنگى جانە بۇرىنعى ۇرپاقتارىنىڭ ءومىر تاجىريبەلەرى مەن كوزقاراستارىمەن تانىسىپ, ءوز ويلارىڭ مەن سەزىمدەرىڭدى وزگەلەرمەن سالىستىرىپ, ءوز جان دۇنيەڭدى ءوزىڭ ەلەپ-ەكشەلەي الاسىڭ.
ادام جادى مەن ابىروي-نامىسىن كوزدىڭ قاراشىعىنداي ساقتاپ, ار-ۇجدانى مەن سەزىمىن ايالاي سىيلاپ, اقىلى مەن تاجىريبەسىن ۇزدىكسىز بايىتىپ, ادەبيەت اۋەل باستان بەرگى امبەگە ورتاق جاناشىر, امبەگە ورتاق ۇستاز ماڭىزىن ودان ارمەن نىعايتا بەرمەك. سول ارقىلى ازەلدەن بەرگى كيەلى مەرەيىنە قىلاۋ تۇسىرمەي, مۇلتىكسىز ساقتاپ قالا الماق.
ولاي بولاتىنى تۇسىنىكتى. ...ادامزات ىزگىلىك پەن جاقسىلىققا, ادامگەرشىلىك پەن گۋمانيزمگە ۇزبەي تىرىسۋ ارقىلى عانا جەر بەتىندە ءوزىن-ءوزى ساقتاپ قالا الىپ وتىر. ادەبيەت تە تەك سولاي ەتكەن جاعدايدا عانا ادامدار ىقىلاسىن اقتاي الادى.
ازەلدەن ادەبيەتتىڭ پەشەنەسىنە جازىلعانى سول.
ءابىش كەكىلباي ۇلى
