وسىمەن ەكىنشى رەت وتكىزىلىپ وتىرعان ۇلتتىق بايگەنىڭ بيىلعى جاڭالىعى – تەك تەاتر توڭىرەگىندە جۇرگەن تالانتتاردى عانا ەمەس, وپەرا, بالەت, ونەرتانۋ سەكىلدى ونەردىڭ بىرقاتار سالالارىندا جۇرگەن ۇزدىكتەر ءۇشىن دە جۇلدە تاعايىنداعانى بولدى. بايقاۋ ءبىر جىلعى شىعارماشىلىق جۇمىستاردى ساراپقا سالىپ, قارا ءۇزىپ كەلگەن دارالارعا 18 اتالىم بويىنشا سىيلىق تابىستادى. بايقاۋدىڭ تالاپ ۇدەسىنەن شىققان تالانتتاردىڭ ءبارى م.لەرمونتوۆ اتىنداعى مەملەكەتتىك اكادەميالىق ورىس تەاترىندا وتكەن سالتاناتتى كەشتە باس قوسىپ, ونەر ادامدارىنىڭ عانا ەمەس, وزگە ساناتتاعىلاردىڭ دا قىزىعۋشىلىعىن وياتا باستاعان «ساحناگەر» سىيلىعىنىڭ قۋانىشىن بىرگە ءبولىستى. سالتاناتتى شارانى قازاقستان تەاترلارى اسسوتسياتسياسىنىڭ پرەزيدەنتى, كسرو حالىق ءارتىسى, كسرو جانە قازاقستان مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك ەرى ءاسانالى ءاشىموۆ پەن قازاقستاننىڭ ەڭبەك سىڭىرگەن قايراتكەرى, م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى اسحات ماەميروۆ قۇتتىقتاۋ سوزبەن اشتى.
اسسوتسياتسيا كەڭەسىنىڭ شەشىمىمەن انىقتالعان ۇزدىكتەر قاتارىنىڭ قاراسى بىلتىرعىعا قاراعاندا بيىل الدەقايدا مول كورىندى. ءبىر عانا ء«ۇمىت» جۇلدەسى جەڭىمپازدارى ەسىمىنىڭ ۇزىن سانى وتىزعا جەتىپ جىعىلعانىن ايتساق تا, جەتكىلىكتى بولار دەيمىز. رەسپۋبليكا تەاترلارىندا ەڭبەك ەتىپ, ءارتۇرلى ونەر جوبالارىندا جارقىراي كورىنىپ جۇرگەن جاس ارتىستەردىڭ ارقايسىسى ارنايى ديپ-
لوم مەن 200 مىڭ تەڭگەنى ەنشىلەدى.
«ساحنالىق عۇمىر» اتالىمى بار سانالى ءومىرىن «تەاتر دەيتىن ءبىر سيقىرعا» ارناپ, ساحنانىڭ جانكەشتى ساربازدارىنا اينالىپ, ۇلتتىق تەاتر ونەرىنىڭ دامۋى ءۇشىن ايرىقشا ەڭبەك ءسىڭىرىپ كەلە جاتقان جەتى مايتالمانعا تابىستالعانى جالپى جۇرتتى تەبىرەنتتى. ولار – م.اۋەزوۆ تەاترىنىڭ ابىز ءارتىسى ءسابيت ورازباەۆ, ن.ساتس تەاترىنىڭ ساڭلاعى تاتيانا تارسكايا, «تيۋز»-دىڭ تالانتتى اكتريساسى روزا اشىربەكوۆا, شىعىس قازاقستان وبلىستىق اباي اتىنداعى مۋزىكالىق دراما تەاترىنىڭ دارابوزى بەكەن يماحانوۆ, وسى تەاتردىڭ ىرگەسىن كوتەرىسكەن ىرىلەردىڭ ءبىرى كۇلاش ساكيەۆا, مەملەكەتتىك قۋىرشاق تەاترىنىڭ مارعاسقا ءارتىسى ءسابيلا ءابۋوۆا جانە بەلگىلى رەجيسسەر رۋبەن اندرياسيان.
«ۇزدىك اكتەرلەردىڭ» قاتارىندا رومان چەحونادسكي, داۋرەن سەرعازين, اينۇر بەردىمۇحامەدوۆا, انتونينا پياك, تولەۋبەك ارالباي, كەنجەبەك باشاروۆ, تولقىن نۇربەكوۆا, گۇلباحار ناسىروۆا, بولات مومىنجانوۆ اتالسا, سونداي-اق «ۇزدىك مەنەدجەر» بولىپ بەرىك جامەنوۆ, «ۇزدىك سىنشى» ءاليا بوپەجانوۆا, «ۇزدىك
تەاترتانۋشى» ەركىن جۋاسبەك, «ۇزدىك دراماتۋرگ» اقىن يران-عايىپ, «ۇزدىك ساحنا سۋرەتشىسى» باقىت سرايلوۆ, «ۇزدىك رەجيسسەر» ناتاليا دۋبس كورەرمەن قۇرمەتىنە بولەندى. ال قازاقستان مادەنيەتىنىڭ وركەندەۋىنە ءوز ۇلەسىن قوسىپ, «استانا وپەرا» تەاترىنداعى قويىلىمداردا جانە الىس-جاقىن شەتەلدەردە ءساتتى ونەر كورسەتىپ جۇرگەن سۇندەت بايعوجين «ۇزدىك وپەرا ءسوليسى», وسى تەاترداعى ارىپتەسى ءمادينا باسباەۆا «ۇزدىك بالەت ءارتىسى» اتاندى. «تەاتر ونەرىنىڭ دامۋىنا قوسقان ەرەكشە ۇلەسى ءۇشىن» اتالىمى بويىنشا تاعايىندالعان جۇلدەلەر تاعى دا بىرقاتار ساحنا ونەرىنىڭ سايىپقىراندارىنا بۇيىرىپ, ولاردىڭ ءبارى دە حالىقارالىق تەاتر كۇنى ونەرگە قىزمەت ەتىپ جۇرگەندەردىڭ بارشاسىن قۋانىشقا بولەيتىن «ساحناگەر» سىيلىعى ءۇشىن العىسىن ءبىلدىردى.
ايگۇل احانبايقىزى,
«ەگەمەن قازاقستان»
الماتى
