استانادا وتكەن بۇل جيىندى اشقان ءارى جۇرگىزىپ وتىرعان ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ باسشىسى, قحا عىلىمي-ساراپشىلىق كەڭەسىنىڭ توراعاسى ايگۇل سادۋاقاسوۆا ەلباسىنىڭ بەس باستاماسى حالىقتىڭ ءال-اۋقاتىن الەۋمەتتىك جوبالار ارقىلى جاقسارتۋدىڭ باستى قازىعى بولعانىن ايتىپ, بۇل ەلدىڭ دامۋ باعدارىنا تىڭ سەرپىن بەرگەنىن اتاپ ءوتتى. سونداي-اق ول مۇنداي اۋقىمدى الەۋمەتتىك جوبالاردى جۇزەگە اسىرۋعا قحا عىلىمي-ساراپشىلىق كەڭەسى دە ءۇن قوسىپ, مەملەكەتتىڭ حالىق الدىنداعى مىندەتتەمەلەرىن ۇتىمدى ورىنداۋ باعىتىنداعى شارالاردى تالقىلاۋدى ماقسات ەتكەنىن جەتكىزدى.
بۇدان كەيىن قازاقستان حالقى اسسامبلەياسى حاتشىلىعىنىڭ سەكتور مەڭگەرۋشىسى ازات جولدىباەۆ ءسوز سويلەپ, مەملەكەتتىك ماڭىزدى باعدارلامالاردىڭ ىسكە اسىرىلۋىنا اسسامبلەيا دا وزىندىك ۇلەسىن قوسىپ كەلە جاتقانىن اتاپ ءوتتى. ول ەلباسى نۇرسۇلتان نازارباەۆتىڭ اسسامبلەيانىڭ ءرولىن كۇشەيتىپ, ەتنوسارالىق قارىم-قاتىناستاردى رەتتەۋ ءۇشىن «قازاقستان حالقى اسسامبلەياسى تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى تاپسىرما بەرگەنىن ەسكە الىپ, وسىعان بايلانىستى زاڭ جوباسى كۇنى كەشە ءماجىلىستىڭ العاشقى وقىلىمىندا ماقۇلدانعانىن جەتكىزدى.
جيىندا «اتامەكەن» ۇلتتىق كاسىپكەرلەر پالاتاسى دەپارتامەنتىنىڭ ديرەكتورى باۋىرجان ورازعاليەۆ پرەزيدەنتتىڭ بەس الەۋمەتتىك باستاماسىنىڭ ءبىرى – شاعىن نەسيە بەرۋدى كوبەيتۋ ماسەلەسىنە توقتالدى. ول 2017 جىلى جالپى سوماسى 32 ميلليارد تەڭگە بولاتىن 7200 شاعىن نەسيە بەرىلگەنىن اتاپ ءوتىپ, سوڭعى جىلدارى كاسىبىن اشقىسى كەلگەن جاندارعا مەملەكەت تاراپىنان قولداۋ كوبەيىپ جاتقانىن اتادى. جاستارعا كاسىپكەرلىكتىڭ قىر-سىرىن ۇيرەتىپ, ءبىلىم ساپاسىن ارتتىرۋ ءۇشىن ۇلتتىق كاسىپكەرلەر پالاتاسى ءبىلىم جانە عىلىم مينيسترلىگىمەن بىرلەسىپ, 2 مىڭعا جۋىق وقۋ باعدارلاماسىن زەرتتەۋدى باستاپتى. قازىرگى تاڭدا سونىڭ 700-گە جۋىعى جان-جاقتى زەرتتەلىپ, ءتيىستى ۇسىنىستار بەرىلگەن. الداعى ۋاقىتتا ءبىلىم ساپاسىن ارتتىرۋعا ارنالعان باعدارلامالارعا حالىقارالىق ساراپشىلاردى تارتۋ ماسەلەسى دە كوزدەلىپ وتىر.
بۇدان كەيىن «باستاۋ بيزنەس» جوباسى تۋرالى ايتقان ب.ورازعاليەۆ بۇل باعدارلاما نەگىزىنەن الەۋمەتتىك جاعدايى تومەن جانە ءوزىن-ءوزى جۇمىسپەن قامتىپ جۇرگەن ازاماتتارعا ارنالعانىن اتاپ ءوتتى.
«باستاۋعا», اسىرەسە اۋىل تۇرعىندارىنىڭ قىزىعۋشىلىعى جوعارى ەكەن. وسى باعدارلامادان وتكەن ازاماتتاردىڭ 60 پايىزى ءوز ءىسىن اشۋعا دەگەن ىنتاسى ويانىپ, كاسىپكەرلىكپەن اينالىسۋعا قۇلشىنا كىرىسەتىن كورىنەدى. بۇل ءبىزدىڭ بولجامىمىزدان بىرنەشە ەسە كوپ كورسەتكىش. ەندى بيىل قوسىمشا 20 ميلليارد تەڭگە ءبولىپ, شاعىن نەسيەلەردىڭ جالپى سوماسىن 62 ميلليارد تەڭگەگە جەتەتىن بولسا, بۇل ءناسىبىن كاسىپتەن تاپقىسى كەلەتىندەرگە ۇلكەن كومەك, دەيدى ب.ورازعاليەۆ.
عىلىمي-ساراپشىلىق كەڭەستىڭ وتىرىسىندا پرەزيدەنتتىڭ باسقا دا الەۋمەتتىك باستامالارى تالقىلانىپ, قاتىسۋشىلار جوبالاردى جۇزەگە اسىرۋعا بايلانىستى ويلارىن ورتاعا سالدى.
قىمبات توقتامۇرات,
«ەگەمەن قازاقستان»
