اعاسىنىڭ سوڭىنان وقۋعا تۇسكەن قارىنداسى كەيىن اۋىلداعى تاياققا سۇيەنگەن اتا-اناسىن قالاعا كوشىرىپ اكەلەدى. الايدا قامقور اكە-شەشە ناشاقور بالاسىنان كورمەگەن قۇقايدى كورەدى. زەينەتاقىلارىن بەرگەنى ءوز الدىنا ۇيدەگى قىمبات بۇيىم, قۇندى زاتتارىنىڭ بارلىعىنان ايرىلادى.
قارىزعا بەلشەسىنەن باتىپ, ەسىرتكىگە ەسىرگەن ۇلدارى شىر-پىر بولعان اكەسىنىڭ «قاسيەت دەگەن ءسوزدى ۇقتىرا المادىم-اۋ ساعان» دەگەن سوزىنە قاراماستان شاڭىراقتارىنىڭ تورىندە تۇراتىن كۇمىستەلگەن ەرتوقىمدى دا ساۋداعا سالادى. قوس قاريا تاس قالادان, شۋلى شاھاردىڭ بەزبۇيرەك تۇرعىندارىنان ابدەن تۇڭىلەدى. اۋىلدىڭ اقپەيىل ادامدارىن اڭسايدى. دەگەنمەن دە دراما سوڭى جاقسىلىقپەن تۇيىندەلەدى. قىر بالاسىن قىزىققا باتىرام دەپ ەسىرتكى ساتقاندار ميليتسيانىڭ قۇرىعىنا تۇسەدى. بابادان جەتكەن قۇندى مۇرا – كۇمىستەلگەن ەرتوقىم دا شاڭىراق تورىنە ورالادى. ال جاتسا-تۇرسا دا دارحان دالانى اڭسايتىن جىگىتتىڭ اكە-شەشەسى «اۋىلدا ات ۇستىندە جۇرسەڭ مۇنداي بولماس ەدىڭ-اۋ, قاراعىم! ءجۇر, اۋىلعا قايتايىق. دالانىڭ جۇپار اۋاسى مەن بال قىمىزىنان ارتىق ەم جوق» دەپ ۇلىن الىپ تۋعان اۋىلىنا تارتادى. قىسقاسى, قويىلىمدى كورسەڭىز ايالى اۋىلعا دەگەن ساعىنىشىڭىز ەسەلەنە تۇسەدى.
پسيحولوگيالىق درامانىڭ اۆتورى – بولات ۇزاقوۆ. قويۋشى رەجيسسەرى – تەاتردىڭ كوركەمدىك جەتەكشىسى ساحان اكەلەەۆ. تۋىندىنى وسكەمەندىك زيالى قاۋىم وكىلدەرىمەن بىرگە تاماشالاعان وبلىس اكىمىنىڭ ورىنباسارى اسەم ءنۇسىپوۆا جاس ۇرپاققا بەرەر تاعىلىمى مول وسىنداي قويىلىمداردى ستۋدەنتتەر مەن مەكتەپ وقۋشىلارىنا كورسەتۋ قاجەتتىگىن اتاپ ءوتتى. قويىلىمدا نەگىزگى كەيىپكەرلەردىڭ ءبىرى ناشاقور جىگىتتىڭ اكەسىنىڭ ءرولىن سومداعان اكتەر قانات نيازبەكوۆ بۇل دراما كەزىندە ساحنالانعانىمەن, رەجيسسەر باسقا تۇرعىدان كەلگەنىن, وقيعانى تاماشا شيەلەنىستىرە بىلگەنىن ايتتى. «بىزگە باعا بەرەتىن كورەرمەن قاۋىم عوي. ماسەلەن, مەن ءوز رولىمە كوڭىلىم تولدى دەپ ايتا المايمىن. ءالى دە شيكى تۇستارى بار. مۇنداي قويىلىمدار 4-5 رەت ەمەس, 10-15 مارتە قويىلۋى كەرەك. سول كەزدە بارىپ اكتەر اشىلادى. ولقى تۇستار تۇزەلەدى», دەيدى اكتەر.
درامانىڭ قويۋشى رەجيسسەرى ساحان اكەلەەۆ قويىلىمدا عاسىر دەرتىنىڭ زاردابىنان بولەك ۇلتتىق قۇندىلىقتارىمىزدى ۇلىقتاۋ, وتكەنىمىزدى ۇمىتپاۋ ماسەلەسىنە ەرەكشە نازار اۋدارىلعانىن جەتكىزدى. قويىلىمدى ساحنالاماس بۇرىن بۇل تاقىرىپتى مۇقيات زەرتتەگەنىن, وسكەمەن قالاسىنداعى ناشاقورلار ديسپانسەرىنە بارىپ, ەسىرتكىگە ەلتىگەن جاستاردىڭ مىنەز-قۇلقىن باقىلاعانىن تىلگە تيەك ەتتى. «سەنەسىز بە, سەنبەيسىز بە, قالاداعى جاستاردىڭ ءبىرازى پايىزى ناشاقور.
ولاردىڭ باسىم كوپشىلىگى وزگە ۇلت وكىلدەرى بولسا, ءبىر-ەكى پايىزى ءوزىمىزدىڭ قاراكوزدەر. ءتىپتى قازىرگى ۋاقىتتا ناشاقورلىق دەرتى مەكتەپتەرگە دە جەتىپ جاتىر. ەسىرتكىنى ادەمى كونفەت قاعازىنا وراپ, وقۋشىلارعا ۇسىنىپ, ولاردى ناشاقورلىققا تارتىپ جاتقاندار بار. بۇل – وتە قاۋىپتى. ءبىزدىڭ نەگىزگى قارۋىمىز ونەر عوي. مەن ازامات رەتىندەگى, رەجيسسەر رەتىندەگى ۇستانعان پوزيتسيامدى جۇرتشىلىققا وسى قويىلىم ارقىلى جەتكىزۋگە تىرىستىم. بايقاساڭىز, ساحنادا التى قۇرلىقتىڭ سۋرەتى تۇر. وسى ارقىلى ناشاقورلىقتىڭ عالامدىق قاسىرەت ەكەندىگىن دە كورسەتكىمىز كەلدى. قازاقتىڭ سالت-ءداستۇرىن, حالقىمىزدىڭ بويىنداعى اسىل قاسيەتتەردى ساقتاۋدىڭ قانشالىقتى ماڭىزدىلىعىن كورەرمەنگە ۇعىندىرۋعا تالپىندىق. الداعى ۋاقىتتا وبلىس اكىمى دانيال احمەتوۆ پەن مادەنيەت باسقارماسىنىڭ قولداۋىمەن وسى درامامەن ءوڭىرىمىزدىڭ بارلىق اۋداندارىن ارالاساق پا دەگەن جوسپارىمىز بار», دەيدى تەاتردىڭ كوركەمدىك جەتەكشىسى.
ازامات قاسىم,
«ەگەمەن قازاقستان»
وسكەمەن
