بۇل ويىنعا ستانيمير ستويلوۆ قۇراما ويىنشىلارىن وزگەرتىلگەن قۇراممەن شىعاردى. العاشقى ماتچتا قاقپا كۇزەتكەن نەناد ەريچتىڭ ورنىنا «قايراتتىڭ» قاقپاشىسى ۆلاديمير پلوتنيكوۆ تۇردى. كۇزدە بولاتىن رەسمي ويىندارعا دەيىن بارلىق فۋتبولشىنى سىناقتان وتكىزەمىن دەگەن باپكەر, كوماندانىڭ نەگىزگى ويىنشىسى دميتري شومكونىڭ ورنىنا عافۇرجان سۇيىمباەۆتى سالدى. ال قالعان فۋتبولشىلار سول كۇيى وزدەرىنىڭ ۇيرەنشىكتى ورىندارىنا جايعاستى.
ويىن تاجىريبيەسىنىڭ ازدىعى بولار, سول قاپتالداعى قورعانىسقا جاۋاپتى بولعان سۇيىمباەۆ ويىننىڭ 24-مينۋتىندا ايىپ الاڭىندا ءتارتىپ بۇزىپ, قاقپامىزعا ايىپ دوبى بەلگىلەندى. پەنالتيدى ورىنداعان يۆەلين پوپوۆ ءمۇلت كەتپەدى. ەۋروپا الاڭدارىندا دوپ تەۋىپ جۇرگەن بولگاريالىقتار مىقتى لەگيونەرلەرىنىڭ ارقاسىندا باسىمدىلىقتى جىبەرە قويمادى. تەك ەكىنشى تايم باستالار تۇستا بولگاريا باپكەرى پەتار حۋبچەۆ ماسكەۋلىك تسسكا ساپىندا وينايتىن گەورگي ميلانوۆ پەن سوفيالىق تسسكا-نىڭ ليدەرى ستانيسلاۆ مونولەۆتى الماستىردى. ال ستويلوۆ الاڭعا ەركەبۇلان تۇڭعىشباەۆ پەن ماگومەد پاراگۋلكوۆتى شىعاردى. وڭ قاپتالدا ۆينگەر قىزمەتىن ورىنداعان تۇڭعىشباەۆ 56-مينۋتتا قورعاۋشىلار قاتەلىگىن پايدالانىپ, تارازى باسىن تەڭەستىردى.
وسى جەردە ايتا كەتۋىمىز كەرەك, باپكەرىمىز نەگىزگى شابۋىلشى قىزمەتىن اتقارعان سەرگەي حيجنيچەنكونىڭ ورنىن رومان مۇرتازاەۆقا بەرگەن-ءتىن. مۇرتازاەۆ قاپتالدان ورتالىق شابۋىلشى رولىنە اۋىسۋىمەن شيراق قيمىلعا كوشتى. تابلوداعى ەسەپتىڭ تەڭەسۋىنە دە «استانا» ويىنشىسىنىڭ سەپتىگى مول بولدى. سولعىن قيمىلداعان سەرگەي حيجنيچەنكونىڭ ورنى ەندى وسىدان كەيىن مۇرتازاەۆقا بۇيىرىپ تا قالار.
ال ودان كەيىن ورتادا ويقاستاعان باۋىرجان يسلامحان قۇرامانىڭ كاپيتانى رەتىندە جىگىتتەردى شابۋىلعا باستاپ وتىردى. ادەمى پاستارىنىڭ ءبىرشاماسى بولگاريا قاقپاسىنىڭ الدىندا قاۋىپتى ساتتەر تۋىنداتتى. ءتىپتى, رومان مۇرتازاەۆ قاقپانىڭ ماڭدايشاسىن دا اۋىر سوققىمەن ءبىر تەكسەرىپ الدى. ەكىنشى تايمنىڭ ءبىرشاما بولگىندە حۋبچەۆ شاكىرتتەرى تەك قورعانۋمەن بولدى.
ال قۇراما ساپىنا جاڭادان الىنعان سەيداحمەت, پاراگۋلگوۆ, پەرتسۋح سەكىلدى جاس تالانتتار سەنىمدى قيمىلدارعا كوشتى. ءوسىپ كەلە جاتقان جاستاردىڭ ونەرى بارشا قازاقستاندىق جانكۇيەردىڭ كوڭىلىنەن شىقتى. تەحنيكاسى دا, جىلدامدىعى دا قارسىلاستان كەم تۇسپەيتىن جىگەرلى جاستاردى كورگەنىمىزدە ەل فۋتبولىنىڭ بولاشاعى بار ەكەنىنە سەنگەندەي بولدىق.
ويىننىڭ ەكىنشى تايمىن تۇگەلىمەن ءوز باقىلاۋىمىزدا ۇستاپ, باسىمدىلىققا يە بولعانىمىزبەن سوڭعى مينۋتتا ءبىر قاتەلىك جىبەرىپ الدىق. ەركەبۇلان تۇڭعىشباەۆ ايىپ الاڭىنىڭ ماڭىندا سپاس دەلەۆتى شالىپ قۇلاتتى. ستاندارتتىق جاعداي نيكولاي بودۋروۆتىڭ باسپەن گول سوعۋىنا اكەپ سوقتىردى. ەڭ سوڭعى سەكۋندتاردا سوعىلعان گول قازاقستان قۇراماسىنىڭ ءالى سوڭعى مينۋت سيندرومىنان ايىقپاعانىن كورسەتەدى.
ەندى, كۇزدە بولاتىن گرۋزياعا قارسى ويىنعا تىڭعىلىقتى دايىندىق جۇمىستارى جۇرەدى. رەسمي ماتچتاردا مۇنداي قاتەلىكتەر ورىن الماس دەپ ۇمىتتەنەمىز.
ستانيمير ستويلوۆ, قازاقستان قۇراماسىنىڭ باس باپكەرى:
– ۆەنگريا مەن بولگارياعا قارسى وتكەن ويىندار ءبىزدىڭ جىگىتتەردىڭ دەڭگەيىن كورسەتتى. ءبىز مۇنىمەن توقتاپ قالمايمىز. كۇزگە دەيىن جاستارىمىزدىڭ ويىنىن دا, تاكتيكالىق ساۋاتتىلىعىن دا ارتتىرا بەرەمىز. ۆەنگريانى ۇتتىق دەپ داندايسىمايمىز. سوڭعى سەكۋندتا كەز كەلگەن قارسىلاس گول سوعىپ كەتۋى مۇمكىن.
پەتار حۋبچەۆ, بولگاريا قۇراماسىنىڭ باس باپكەرى:
– قازاقستان قۇراماسى ءبىزدى تاڭعالدىردى. بۇرىن الماتىدا وتكەن جولداستىق ويىندا 2:1 ەسەبىمەن وڭاي جەڭگەن ەدىك. ال بۇگىنگى جەڭىسىمىز ءتىپتى ءبىر كەزدەيسوق ساتتىلىك سەكىلدى. دەمەك بىزگە ءالى كوپ ەڭبەك ەتىپ, ويىنىمىزدى تۇزەۋ كەرەك دەگەن ءسوز. قازاقستان قۇراماسىنا ساتتىلىك تىلەيمىن.
ەرمۇحامەد ماۋلەن,
«ەگەمەن قازاقستان»
