دۇيسەنبىدە باستالعان سايلاۋ ءۇش كۇنگە سوزىلادى. ايتسە دە, داۋىس بەرۋدىڭ قورىتىندىسى كەلەسى دۇيسەنبىدە جاريالانباق. شەتەلدىك بۇقارالىق اقپارات قۇرالدارى تاراتقان مالىمەتتەرگە سۇيەنسەك, سايلاۋدا كىم جەڭىسكە جەتەتىنى الدەن بەلگىلى. ماسەلەن, Euronews ارناسى م.مۋسانى «قۋىرشاق قارسىلاس» دەپ سانايدى. مۇنىڭ ءوز سەبەبى بار. ول پرەزيدەنتتىككە تىركەلۋ ءراسىمى اياقتالار كۇنى عانا ءوتىنىش بىلدىرگەن. سونداي-اق سايلاۋ ناۋقانى كەزىندە قازىرگى ەل باسشىسى اس-ءسيسيدىڭ كانديداتۋراسىن قولداپ جۇرگەن-ءدى.
Al Jazeera دا جەڭىمپازدىڭ كىم بولاتىنى الدەن بەلگىلى دەپ ەسەپتەيدى. مۇنىڭ سەبەبى رەتىندە ارنا م.مۋسانىڭ بۇعان دەيىن اس-ءسيسيدى قولداعانىن, ەلەكتوراتتاردىڭ داۋىس بەرۋگە ءبارى قاتىسپايتىنىن كەلتىرەدى. وسىنىڭ ءبارىن ەسكەرە كەلە, اس-ءسيسيدىڭ كەزەكتى مارتە مىسىر بيلەۋشىسى اتاناتىنىن بولجاۋ قيىن ەمەس.
جالپى, قازىرگى ەل باسشىسى ابدەل فاتتاح اس-سيسي 2014 جىلعى سايلاۋ كەزىندە جەڭىسكە جەتتى. ەگيپەت زاڭىنا سايكەس, اس-سيسي ەكىنشى مارتە پرەزيدەنتتىككە سايلانۋعا قۇقىعى بار. ابدەل فاتتاحتىڭ ءوزى CNBC ارناسىنا بەرگەن سۇحباتىندا كونستيتۋتسياعا ساي ەكى مەرزىم عانا ەل باسقاراتىنىن مالىمدەگەن.
داۋىس بەرۋدىڭ ءبىرىنشى كۇنى اياقتالعان سوڭ ءباسپاسوز جيىنىن وتكىزگەن پرەمەر-مينيستر شەريف يسمايىل سايلاۋدىڭ ءساتتى ءوتىپ جاتقانىن مالىمدەگەن. ول مىسىرلىقتار شاراعا بەلسەندى قاتىساتىنىنا سەنىم ءبىلدىردى. ونىڭ پىكىرىنشە, سايلاۋدان كەيىنگى كەلەسى كەزەڭ ەل دامۋىنا, ەكونوميكالىق رەفورما جاساۋدىڭ ماڭىزدى قادامى بولماق. ال سايلاۋ جونىندەگى ۇلتتىق كوميسسيانىڭ توراعاسى ماحمۋد ءاش-شاريفتىڭ ايتۋىنشا, سايلاۋ بولىمشەلەرىندە داۋىس بەرى اشىق, زاڭعا ساي جۇرگىزىلىپ جاتىر.
ايتا كەتۋ كەرەك, مىسىر حالقىنىڭ 60 ميلليونعا جۋىعى داۋىس بەرۋ قۇقىعىنا يە. ەل بويىنشا 13 706 سايلاۋ بولىمشەلەرى اشىلعان. سونداي-اق 18 مىڭ سۋديا, 54 ۇكىمەتتىك ەمەس جانە قوعامدىق ۇيىم, 9 حالىقارالىق ۇيىم, 110 مىڭعا جۋىق مەملەكەتتىك جانە قۇقىق قورعاۋ مەكەمەلەردىڭ قىزمەتكەرلەرى جانە باق وكىلدەرى سايلاۋ بارىسىن باقىلايدى.
اباي اسانكەلدى ۇلى,
«ەگەمەن قازاقستان»
