سوڭعى 8 جىلدان بەرى ەۋروپادا روبوتتاندىرىلعان وپەراتسيا جاساۋمەن شۇعىلدانىپ كەلە جاتقان بىلىكتى مامان قازاقستاندا العاش جاسالعان وپەراتسيادان سوڭ جۋرناليستەرگە بەرگەن سۇحباتىندا وپەراتسيانىڭ ءساتتى وتكەنىن ايتتى. «مۇنداي وپەراتسيانى جۇرگىزۋ ءۇشىن دارىگەرلەر مەن اسسسيستەنتەر بىلىكتى بولۋى كەرەك. بۇگىن وپەراتسياعا قاتىسقان قازاقستاندىق ارىپتەستەرىمە, مەديتسينالىق قىزمەتكەرلەرگە ەرەكشە العىسىمدى بىلدىرەمىن. ەمحاناداعى وپەراتسيالىق زالداردىڭ قولايلىلىعىن دا اتاپ وتكىم كەلەدى», - دەدى شەت ەلدىك دارىگەر.
وپەراتسياعا يتاليادان كەلگەن دارىگەرمەن بىرگە وسكەمەندىك دارىگەرلەر دە قاتىستى. سونىڭ ءبىرى – وسكەمەندەگى №1 قالالىق اۋرۋحانانىڭ حيرۋرگى نارتاي تۇراحانوۆ. «بۇگىنگى كۇن ءبىز ءۇشىن تاريحي كۇن, ەرەكشە كۇن. مۇنداي وپەراتسيا قازاقستاندا عانا ەمەس, تمد ەلدەرى ىشىندە وسكەمەندە العاش رەت جاسالدى دەۋگە بولادى. مەن بۇل وپەراتسياعا اسسسيستەنت رەتىندە قاتىستىم. وپەراتسيا ءساتتى وتكەن سەكىلدى. بىلتىر وسكەمەننىڭ ءتورت دارىگەرى ەۋروپاعا بارىپ, روببوتاندىرىلعان وپەراكتسيا جاساۋدىڭ قىر-سىرىن مەڭگەرىپ قايتتىق, گەرمانيادا, يتاليادا بولدىق. روبوت كومەگىمەن جاسالاتىن وپەراتسيالاردى كوزىمىزبەن كورىپ قانا قويماي ءوزىمىز دە وپەراتسيا جاساۋعا قاتىستىق» دەگەن ول ەندى وسىنداعى ورتالىقتا مۇنداي وپەراتسيانى وزدەرى دە جاساي الاتىنىن جەتكىزدى.
«شىعىس قازاقستاننىڭ دارىگەرلەرىمەن بىرگە ءوزىم دە يتالياعا بارىپ, روبوتتاندىرىلعان حيرۋرگيانى وقىپ كەلدىم. ءبىز بارعان كلينيكادا ءبىر جىلدا 150 وتا جاسالعان ەكەن. زاماناۋي تەحنولوگيانىڭ شىعىستاعى ەمحانالارعا ەنگىزىلىپ جاتقانىنا قۋانىشتىمىن», - دەيدى الماتى قالاسىنداعى ۇلتتىق حيرۋرگيا عىلىمي ورتالىعىنىڭ اسقازان, وڭەش جانە ىشەك جولدارى ءبولىمىنىڭ مەڭگەرۋشىسى ءادىل اداي ۇلى.
وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆتىڭ ايتۋىنشا, روبوت كومەگىمەن جاسالاتىن وپەراتسيا دالدىگىمەن, پاتسيەنتكە قاۋىپسىز ءارى جاراقاتتانۋدان ساقتايتىندىعىمەن ەرەكشەلەنەدى.وبلىس اكىمى دانيال احمەتوۆ ءوڭىر دارىگەرلەرىن شەت ەلدە وقىتۋ جۇمىستارى جالعاسىن تاباتىنىن, بيىل تاعى دا ەكى دارىگەر ششەت ەلگە بارىپ وقيتىنىن تىلگە تيەك ەتتى.
ازامات قاسىم,
«ەگەمەن قازاقستان»
