ءباا “بايقوڭىر” كەشەنىنىڭ عارىش ينفراقۇرىلىمىن جاڭعىرتۋعا ينۆەستيتسيا سالۋعا نيەتتى

جۇلدىزدى قالاشىقتا قازاقستان رەسپۋبليكاسى, رەسەي فەدەراتسياسى جانە بىرىككەن اراب امىرلىكتەرىنىڭ دەلەگاتسيالارى كەزدەسىپ, عارىش سالاسىنداعى ارىپتەستىك ماسەلەلەرىن تالقىلادى.

كەلىسسوز قورىتىندىسىمەن «روسكوسموس» اگەنتتىگىنىڭ باس ديرەكتورى يگور كوماروۆ, قر قورعانىس جانە اەروعارىش ونەركاسىبىنىڭ ءمينيسترى بەيبىت اتامقۇلوۆ جانە ءباا عارىش اگەنتتىگى ديرەكتورلار كەڭەسىنىڭ توراعاسى احماد بەلحۋل ال-فالاسي عارىش سالاسىنداعى ءۇش جاقتى ارىپتەستىكتى كەڭەيتۋ جونىندە حاتتاماعا قول قويدى. تاراپتار 2018 ج. ءساۋىر ايىندا عارىش ايلاعىنداعى الەۋەتى جوبالاردىڭ ءمان-جايىن ناقتىلاۋ ءۇشىن بىرلەسكەن جۇمىس توبىن قۇرۋ تۋرالى كەلىستى.

«2017 جىلدىڭ اياعىندا «بايقوڭىر» كەشەنىن دامىتۋ جونىندەگى بىرلەسكەن تۇجىرىمداماعا قول قويىلدى. وسى تۇجىرىمداما اياسىندا عارىش ايلاعىنا سىرتقى ينۆەستيتسيا تارتۋ ماسەلەسى شەشىلدى. بىرىككەن اراب امىرلىكتەرى جوباعا قاتىسۋعا قىزىعۋشىلىق تانىتتى. ارنايى جۇمىس توبى قۇرىلىپ, ۇشجاقتى كەلىسىمگە قول قويىلدى. جوبا اياسىندا 1961 جىلى قوسىلعان «گاگارين ستارتى» الاڭى قايتا جاڭعىرتىلىپ, «سويۋز-2» زىمىران تاسىعىشتار شىعارىلاتىن بولادى. ءارى قاراي مۇندا عارىش سالاسى عانا ەمەس, باسقا دا سالالاردى دامىتىپ, ماسەلەن, تەحنوپاركتى سالامىز. ياعني, بايقوڭىر كەشەنىنىڭ بولاشاعى جارقىن دەپ ويلايمىز», - دەدى قىزىلوردا وبلىسى اكىمىنىڭ ورىنباسارى, «بايقوڭىر» كەشەنىندەگى قر پرەزيدەنتىنىڭ وكىلى سەرىك قوجانيازوۆ.

قر قورعانىس جانە اەروعارىش ونەركاسىبى ءمينيسترىنىڭ كەڭەسشىسى مەيىربەك مولداباەۆتىڭ ايتۋىنشا, «بايقوڭىر» كەشەنىندە بىرلەسكەن جوبالاردى جۇزەگە اسىرۋ اياسىندا عارىش ايلاعىنىڭ دامۋىنا جاڭا سەرپىن بەرىلەدى.

«روسكوسموسپەن بىرگە 2050 جىلعا دەيىن بىرلەسكەن تۇجىرىمدامانى ازىرلەپ, بيۋدجەتتىك قارجىعا قاراپ قالماي, سىرتتان ينۆەستور تارتۋ تۋرالى كەلىستىك. مىنە, ەندى بىرىككەن اراب امىرلىكتەرى ۇسىنىلعان كوممەرتسيالىق ۇشىرىلىمداردى ۇيىمداستىرۋ ماقساتىندا ستارت الاڭقايى مەن زىمىران-تاسىعىشتى جاڭعىرتۋ جوباسىنا قىزىعۋشىلىق ءبىلدىردى», - دەپ اتاپ ءوتتى مەيىربەك مولدابەكوۆ.

ەستەرىڭىزگە سالا كەتەيىك, 21 ناۋرىز كۇنى ساع. 23:44-تە ءباا مەن قازاقستان رەسپۋبليكاسىنىڭ دەلەگاتسيالارى «سويۋز مس-08» عارىش كەمەسىنىڭ «بايقوڭىر» عارىش ايلاعىنداعى № 1 الاڭىنان ۇشىرىلۋىن تاماشالادى.