Photo: Erlan OMAR
كونتسەرت باعدارلاماسىنا سايكەس, ەڭ الدىمەن «جاڭارعان جەر, باق قونعان نۇرلى ەل» ميۋزيكلى كوپشىلىك نازارىنا ۇسىنىلدى. بۇل كوپجانرلى جوباعا استانا قالاسىنىڭ بارلىق مادەني ونەر وشاقتارىنان جاساقتالعان شىعارماشىلىق ترۋپپا بەلسەنە اتسالىسىپ, جيىلعان جۇرتشىلىققا ناۋرىز مەيرامىنىڭ ومىرگە كەلۋ تاريحىنان سىر قوزعايتىن قىزىقتى قويىلىمىن تارتۋ ەتتى. ءداستۇرلى انشىلەر اننەن شاشۋ شاشتى. تەاترلاندىرىلعان كونتسەرتتىك باعدارلاما سوڭىندا ەلباسى نۇرسۇلتان نازارباەۆ حالىققا ءوزىنىڭ جۇرەكجاردى قۇتتىقتاۋىن جەتكىزدى.
– قۇرمەتتى وتانداستار! كوكتەم, جىلۋ, جاڭارۋ, جاقسىلىق كۇنى– ءاز-ناۋرىز مەيرامى بارشا قازاقستاندىقتارعا قۇتتى بولسىن! ۇلىستىڭ ۇلى كۇنى – باعزىدان كەلە جاتقان ۇلىق مەرەكەمىز. كەزىندە ءبىرشاما ۋاقىت جوعالتىپ الىپ ەدىك. ەندى, مىنە, تاۋەلسىزدىگىمىزبەن بىرگە قايتادان ورتامىزعا ورالىپ وتىر. كۇنتىزبە بويىنشا 1 قاڭتاردا ەسىكتەن كىرەتىن جاڭا جىلدى ءوز زامانىندا ءى پەتر باتىس ەۋروپادان اكەلگەن ەكەن. ونىڭ دا ءوز ورنى بار. ايتسە دە, ناۋرىز – قازاق ءۇشىن ەرەكشە مەيرام. كۇن مەن ءتۇننىڭ تەڭەلىپ, بارشا تىرىشىلىك اتاۋلىنىڭ ويانىپ, اينالانى شۋاققا, جىلىلىققا, مەيىرىمگە بولەيتىن كەزى عوي – بۇل مەزگىل. ناۋرىزدى قازاق ەجەلدەن-اق اسىعا كۇتكەن. تۋعان-تۋىس, كورشى-قولاڭ ءبىر-ءبىرىنىڭ ۇيىنە قوناققا بارىپ, ارقا-جارقا ارالاسقان. كەلىسپەي قالعان ادامدار كەشىرىم سۇراسىپ, تابىسقان. دەمەك, ناۋرىز – تاتۋلىق پەن بىرلىكتىڭ, جاڭارۋدىڭ مەرەكەسى. تۇبىندە بۇل مەيرام ءبىزدىڭ نەگىزگى جاڭا جىلىمىز بولادى.
تاۋەلسىزدىگىمىزدىڭ وسىناۋ 26 جىلدىق تاريحىندا ءبىز كوپ شارۋا بىتىردىك. از عانا ۋاقىت ىشىندە قازاقستانىمىز الەمدىك ارەناداعى ءوز ورنىن بەلگىلەپ, دۇنيەجۇزىنە بەلگىلى مەملەكەت بولدى. قولىمىزداعى وسى بارىمىزدى كوزىمىزدىڭ قاراشىعانداي ساقتاپ, باعالاۋىمىز كەرەك. سەبەبى ەلدىڭ بىرلىگى, ورتاق ماقسات جولىندا ءبىر جۇدىرىق بولىپ جۇمىلۋى – بولاشاق تابىستارىمىزدىڭ كوزى بولىپ سانالادى. قازاقتا: «ەسكى جىل ەسىركەسىن, جاڭا جىل جارىلقاسىن» دەگەن جاقسى ءسوز بار. ەندەشە, ۇلىس وڭ بولسىن! بارلىعىڭىزدى ءاز-ناۋرىز مەرەكەسىمەن قۇتتىقتايمىن! وتباسىلارىڭىزعا اماندىق, باقىت, بەرەكە مەن بىرلىك تىلەيمىن!» – دەپ ەلباسى ءوز قۇتتىقتاۋىن جەتكىزدى.
كونتسەرت سوڭىندا مەملەكەت باسشىسى ەكسپو كورمە كەشەنىن ارالاپ, مەرەكەلىك ءىس-شارالارمەن تانىستى.
بيىل ناۋرىزعا ورايلاستىرىلعان باعدارلامالاردىڭ باسىم بولىگى وسى – ەكسپو كورمە كەشەنىنىڭ اۋماعىنداعى الاڭدا ءوتتى. قالا تۇرعىندارى مەن قوناقتارى ءۇشىن ەتنوكورمە اشىلىپ, كەلۋشىلەردى الدار كوسە, قوجاناسىر, تازشا بالا سىندى ەرتەگى كەيىپكەرلەرى قارسى الىپ, كوتەرىڭكى كوڭىل-كۇي سىيلادى. ەلوردالىق تەاترلاردىڭ ارتيستەرى كورەرمەندەردى ۇلتتىق سالت-ءداستۇر, ادەت-عۇرىپتارمەن تانىستىردى, قىششىلار, زەرگەرلەر, كيىز باسۋ مەن ساندىك-قولدانبالى ونەر شەبەرلەرى قولدان جاسالعان بۇيىمدارىن كوپشىلىك نازارىنا ۇسىندى. كيىز ءۇي قالاشىعىنىڭ اۋماعىنداعى سىيىمدىلىعى 1000 ليترلىك تايقازان ورناتىلىپ, ناۋرىز كوجە تاراتىلدى. سونىمەن قاتار ۇلتتىق ويىندار ويناتىلىپ, جينالعان قاۋىمنىڭ نازارىنا وتاندىق جەتەكشى ارتيستەردىڭ قاتىسۋىمەن مەرەكەلىك كونتسەرت ۇسىنىلدى. حالىقتىڭ كوڭىلى كوتەرىلىپ, ساناۋلى ساعان ىشىندە ەكسپو الاڭىن شات-شادىمان كۇيگە بولەدى. مەرەكەلىك ءىس-شارا 22 ناۋرىز كۇنى ءوز جالعاسىن تابادى.
نازەركە جۇماباي,
«ەگەمەن قازاقستان»
