نەگىزىندە تەك نارىقتىق قاتىناستار ارقىلى الەۋمەتتىك-ەكونوميكالىق ماسەلەلەردى شەشۋ مۇمكىن ەمەس. بۇل ارادا مەملەكەتتەن ءتيىستى قولداۋ كورسەتىلۋى قاجەت. پرەزيدەنتتىڭ وسى بەس الەۋمەتتىك باستاماسىنان حالىقتى مەملەكەت تاراپىنان جان-جاقتى قولداۋ ءىسى انىق كورىنەدى.
نۇرسۇلتان نازارباەۆتىڭ بەس الەۋمەتتىك باستاماسى قازاقستاندى ورتالىق ازيا ەلدەرى اراسىنداعى كوشباسشى مەملەكەتكە اينالدىرادى. ويتكەنى وندا زاماناۋي الەۋمەتتىك شارالاردى قولعا الۋ, حالىقتىڭ الەۋمەتتىك-تۇرمىستىق جاعدايىن كوتەرۋ, ەكونوميكانى دامىتۋ ماقساتىندا ءبىر مەزگىلدە جاڭا نەگىزدەردى قالىپتاستىرۋ كوزدەلگەن.
قازىرگى تاڭدا كوپتەگەن ەلدەر ءوز حالقى سانىنىڭ وسۋىنە ساي ءىس-قيمىلدار جاساۋدا. قازاقستاندا دا الداعى 25 جىلدا حالىق سانى 20 پايىزعا ارتادى. سوندىقتان پرەزيدەنت ن.نازارباەۆ ءوز باستاماسى ارقىلى ەلدىڭ ءاربىر تۇرعىنىنا باسپانا الۋدى قولجەتىمدى ەتۋدى كوزدەپ وتىر. بۇل ءوز كەزەگىندە بىرنەشە ماسەلەلەردىڭ ءبىر مەزگىلدە وڭتايلى شەشىلۋىنە مۇمكىندىك بەرەدى. بىرىنشىدەن, حالىقتىڭ ءومىر ءسۇرۋ دەڭگەيى ارتادى. ەكىنشىدەن, قۇرىلىس سالاسىنىڭ ەكونوميكالىق تۇرعىدا دامۋىنا جول اشىلادى. ۇشىنشىدەن, ەلەكتر ەنەرگياسىن ءتيىمدى ءارى ۇنەمدى تۇتىناتىن, ەكولوگيالىق تازا, ينفراقۇرىلىمى جەتىلگەن ۇيلەر پايدا بولادى. تورتىنشىدەن, جاستاردى قولجەتىمدى, ساپالى بىلىممەن, جۇمىسپەن قامتۋعا, حالىق دەنساۋلىعىن جاقسارتۋعا باعىتتالعان جۇمىستار قارقىن الادى.
تاۋەلسىزدىگىن جاريالاعالى بەرى قازاقستان ءوز ەكونوميكاسىن دامىتۋ ماقساتىندا جۇيەلى جۇمىستار جۇرگىزدى. بۇل ورايدا قازاقستان شاعىن جانە ورتا كاسىپكەرلىكتىڭ ءرولىن ارتتىرۋعا بارىنشا كوڭىل اۋدارىپ كەلەدى. پرەزيدەنت باستاماسىندا ايتىلعان ميكروكرەديتتەۋدى ۇلعايتۋ ءىسى وسى باعىتتاعى جۇمىستارعا سەرپىن بەرەتىنى ءسوزسىز. بۇل ارادا قولداعى مۇمكىندىكتەردى ءتيىمدى پايدالانۋ, وقىتۋ باعدارلامالارى ارقىلى شاعىن كاسىپكەرلىك سالاسىنداعى ازاماتتار مەن جاس كاسىپكەرلەرگە قولداۋ ءبىلدىرۋ ماڭىزدى.
قازاقستان پرەزيدەنتىنىڭ الەۋمەتتىك باستامالارى بويىنشا ەل تۇرعىندارى تابىسىنىڭ ايىرماسىن ازايتۋعا, وسى ماسەلەدەگى تەڭسىزدىكتى تومەندەتۋگە قاتىستى ناقتى شارالار قولعا الىنباق. بۇل ورايدا از جالاقى الاتىندارعا سالىناتىن سالىق جۇكتەمەسى 10 پايىزدان 1 پايىزعا دەيىن تومەندەتىلەتىنى بەلگىلى بولىپ وتىر. بۇل قوعامداعى تەڭسىزدىككە قارسى ءىس-ارەكەتتىڭ ناقتى كورىنىسى بولىپ تابىلادى.
ساپالى ءبىلىم بەرۋ ءىسى جاھاندىق دەڭگەيدەگى باسەكەگە قابىلەتتىلىكتى ارتتىراتىن زاماناۋي ۇدەرىستەردە جەتەكشى رولگە يە. بۇل ماسەلە پرەزيدەنتتىڭ ءۇشىنشى الەۋمەتتىك باستاماسىندا ايتىلعان. وندا جوعارى تەحنيكالىق ءبىلىم بەرۋگە نازار اۋدارۋ, ستۋدەنتتەردىڭ جاعدايىن جاقسارتۋ ماسەلەلەرى اتاپ كورسەتىلگەن.
الداعى ون جىلدا قازاقستاندا جوعارى ءبىلىم الۋعا تالپىناتىن جاستار سانى ۇلعايا ءتۇسىپ, وسى سالاداعى ءبىلىم وشاقتارىنا دەگەن سۇرانىس ارتادى. سوندىقتان قازاقستاندىق جاستاردىڭ ءبىلىم ىزدەپ شەتەل اسىپ كەتپەۋى ءۇشىن ولارعا ءوز ەلىندە جاعداي جاسالۋى قاجەت. مىنە, قازاقستان پرەزيدەنتى ءوزىنىڭ بەس باستاماسىندا وسى ىقتيمال تۇيتكىلدەردىڭ الدىن الۋعا قاتىستى ءتيىستى شارالاردى قازىردەن ىسكە اسىرۋدى تاپسىرىپ وتىر.
ن.نازارباەۆتىڭ قولجەتىمدى ءارى ساپالى ءبىلىم بەرۋگە بايلانىستى باستاماسى ايماق ەلدەرى اراسىندا قازاقستاندى ءبىلىم بەرۋ سالاسىندا جەتەكشى ورىنعا شىعارادى.
الداعى 25 جىل كولەمىندە قازاقستان حالقىنىڭ 70 پايىزى قالالىق جەرلەرگە شوعىرلانۋى مۇمكىن. بۇل ءوز كەزەگىندە تازا ەنەرگياعا دەگەن سۇرانىستى ۇلعايتا تۇسەدى. سوندىقتان دا قازاقستان پرەزيدەنتى ەلدىڭ وڭتۇستىك وڭىرىنەن استاناعا دەيىن گاز قۇبىرىن تارتۋ قاجەتتىگىن ءوزىنىڭ بەس الەۋمەتتىك باستاماسىندا اتاپ كورسەتتى. بۇل – شىنايى ستراتەگيالىق ماڭىزدى جوبا. اتالعان جوبا ىسكە اسسا, بۇعان دەيىن پايدالانىپ كەلگەن كومىردى تۇتىنۋ توقتاتىلىپ, ەكولوگيالىق ماسەلەلەر شەشىمىن تابادى, حالىقتىڭ دەنساۋلىعى, ءومىر ءسۇرۋ دەڭگەيى جاقسارادى.
الەكساندر كۆاسنەۆسكي,
پولشا رەسپۋبليكاسىنىڭ بۇرىنعى پرەزيدەنتى
