ناۋرىز ايىنىڭ 17-ءسى مەن 21-ءى ارالىعىندا «كەرۋەن» ساۋدا ويىن-ساۋىق ورتالىعىندا جۇمىس ىستەيتىن كورمە ودان ءارى ارنايى باعىت بويىنشا ەلىمىزدىڭ وزگە وبلىستارىنا كوش تۇزەيدى. رەسپۋبليكانىڭ باستى قالالارىنداعى تانىستىرىلۋ جۇمىسى اياقتالعان سوڭ فوتوسۋرەتتەر استانا كۇنى قارساڭىندا باستاپقى ورنىنا قايتا جايعاستىرىلادى دەپ جوسپارلانۋدا.
«شىن مانىندە, قازاقستاننىڭ ءاربىر جەتىستىگىنىڭ ارتىندا الۋان ءتۇرلى تاعدىرلار تۇر. قازىرگى مەديامادەنيەتتى سۋىرىلا سويلەيتىن شەشەندەر ەمەس, ءومىردىڭ وزىنەن الىنعان شىنايى وقيعالار قالىپتاستىرادى. مۇنداي وقيعالاردى كورسەتۋ بۇقارالىق اقپارات قۇرالدارىنىڭ باستى نىساناسىنا اينالۋعا ءتيىس» دەپ ەلباسى اتاپ وتكەندەي, كورمەدە نەگىزىنەن «100 جاڭا ەسىم» جوباسى جەڭىمپازدارىنىڭ فوتوسۋرەتتەرى, ولاردىڭ اتقارعان جۇمىسى مەن جەتىستىكتەرى جايىندا قىسقاشا ماعلۇمات بەرىلەدى. وسى ارقىلى جوبا ۇيىمداستىرۋشىلارى قازاقستاننىڭ دامۋىنا ەلەۋلى ۇلەس قوسقان, بىراق حالىققا تانىلماعان جاڭا ەسىمدەر مەن ولاردىڭ جەمىستى ءومىربايانىن كوپشىلىككە تانىستىرۋدى ماقسات ەتىپ وتىر. ونىڭ اراسىندا ەلىمىزدىڭ تۋىن بيىككە كوتەرگەن سپورتشىلار مەن اق حالاتتى دارىگەرلەر, مەتسەناتتىقپەن كوزگە تۇسكەن بەلدى كاسىپكەرلەر, سونداي-اق عالىمدار, مادەنيەت پەن قوعامدىق سالادا ەل اۋزىندا جۇرگەن ازاماتتار بار. ياعني «ەلىمىزدىڭ جاڭا ەسىمدەرى» اتتى فوتوكورمەنىڭ مازمۇنىن نەگىزىنەن وسى «100 جاڭا ەسىم» جوباسىنىڭ جەڭىمپازدارى قۇرايدى.
«قازاقستانداعى 100 جاڭا ەسىم» 2017 جىلى ەلباسى نۇرسۇلتان نازارباەۆتىڭ باستاماسى بويىنشا حالىققا كەڭىنەن تانىلماعان, بىراق بەلگىلى ءبىر سالادا ەلەۋلى جەتىستىكتەرگە جەتىپ, مەملەكەتىمىزدىڭ دامۋىنا اۋقىمدى ۇلەس قوسقان ازاماتتاردى تاۋىپ, ولاردىڭ ۇلگى بولارلىق جۇمىسىن دارىپتەۋ ماقساتىندا جۇزەگە اسىرىلعان بولاتىن. بايگەگە ەلىمىزدىڭ تۇكپىر-تۇكپىرىنەن ءتۇرلى ماماندىق يەلەرى قاتىسىپ, ەڭ مىقتى دەگەن 100 ادام اشىق ونلاين داۋىس بەرۋ ارقىلى ىرىكتەلىپ الىندى.
نازەركە جۇماباي,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
